Ose Tili 10 - U TIENU MAAMA TILI 2013

Isidayeli yaaba diema bodima

¹ Isidayeli yaaba den tie Nani yaa duventiidi n ŋani, Ki luoni boncianla yeni. Ama bi bonluonkaala n den yabidi ki pugidi, Bi den pugidi a padibinbina. Bi diema piama n den yabidi ki pugidi, Bi den kpie ki ŋanbidi a butana mo ki pugidi.

² Bi tie palalie danba, Moala bi baa tugi bi tudima tugili. O Diedo baa tudi ki lu bi padibinbina, Ki bolini bi butana mo.

³ Moala bi baa yaa tua: «Tii go pia bado, Kelima tii fangi o Diedo. Ba ti yaa bi pia bado wani daa, O bi baa fidi ki tieni ti po be?»

⁴ Bi pua mi faama, Ki polini fanma fanma po, Ki kuani o ŋantaado. Ama mi teginma tie bi po nani yaa moabiadigu N pia ti loabidi, ki pudi a bana nni yeni.

⁵ Samari yaaba gbani baa wudi, Beti-Afeni naabiga yeni po. Bi baa mua ki kuuma po. Yaa kopadicianba n tuuni o po mo baa digibi, Kelima o kpiagidi kan go yaa ye bi siiga.

⁶ Bi baa tugi o ki gedini Asiiri diema nni, Ki ban pa o badiciamo. I fe baa cuo Efrayimi buolu li po. Bani Isidayeli yaaba baa yaa ye leni i fe, Kelima bi janbi po.

⁷ Li gbeni Samari yaaba leni bi bado po n yeni, O tie nani yaa daagu n maa u ñingbanu po yeni.

⁸ Ban den tiendi ti tuonbiadi Ki padi yaa pada a juana yula po yeni, baa bodi. Ti konkondi leni ti moabiaditi Baa pudi a padibinbina yeni yula po. Isidayeli yaaba baa yedi a joaciama: «Wuoni mani ti!» Ki yedi a joabila mo: «Baa mani ti po!»

Isidayeli yaaba baa yendi ban buli yaala

⁹ Isidayeli yaaba, hali Gibeya dogu cagindi daali, Yi li tiendi ti tuonbiade. Yi li baa ki se lienni kaa lebidi. Lani n teni ke bu toabu n nandi Laa nibiadiba Gibeya dogu nni.

¹⁰ N baa waani ba fala, I nilanbuoli baa taani ki fii bi po, Ki loli ba bi tuonbiaciandi po.

¹¹ Efrayimi buolu den tie nani yaa naasalo N bani li tuonli bonŋanla, Ki bua ki yaa ŋmaadi ŋalikama. N baa maani o tulu yuu n ŋani yeni po ku daagu, Ki doali o li naakuuli. Juda diema yaaba baa yaa ko, Bani Jakob buolu baa yaa la Yaala n mudi a tangbana, ki fuli.

¹² N yedi Isidayeli yaaba: «Tieni mani mi teginma, Lani n tie yin baa yaala n ŋani, Ŋanbi mani yi pala nani yua n cuo U koapaanu ki pedi ki ŋanbi u yeni, Kelima u yogunu pundi, Ke yin lingi mini o Diedo, Hali min baa cua ki yadi yi po mi faabima.

¹³ Ama hali moala yi ko mi biadima, Ki yendi ti tuonbiadi, Ki di i boandi bonluonkaala, Kelima yi dugi yi paalu po Leni yi jakoanda coali po.

¹⁴ Li tie lani yaa po yo, ke bu toabu baa cua yi niba siiga, Yin baa sani ki wuoni naankani kuli baa bodi. Laa kaani kuli baa soani nani o bado Salimani N den baa Beti-Alibeli dogu, Ki taani ki bolini binaanba Leni a bila kuli yenma maama yeni.

¹⁵ Isidayeli yaaba, Diidi mani Beteli n baa cuani yi po yaala, Kelima yi biadikandikaama po. Mi yenpudima yogunu, mi janjanma n baa cili, Bi baa kpa Isidayeli diema bado.»