Nehemi 8 - U TIENU MAAMA TILI 2013

Li bali maama cogu guani bi niba U Tienu kani 8—11 Esidirasi cogi li bali maama Isidayeli yaaba nintuali

¹ O cileleelo n den ñani, Isidayeli niba yaaba n den ye bi dogi nni kuli den cua. Bikuli den taani leni yanyenma yaa fanma n tiegi u dogu bilinciamu buliñoabu, mi Ñima Buliñoabu kani. Bi den yedi li bali maama bando Esidirasi, ke wan taa Musa bali maama tili, U Tienu n den teni Isidayeli yaaba yaa bali maama yeni ki cuani.

² Wani o kopadiciamo Esidirasi den taa li bali maama tili ki cuani li nitaanli kani, bani bi jaba, bi puoba leni yaaba n baa fidi ki gaa mi maama kuli. Li den tie o cileleelo dakpiali.

³ Esidirasi den se yaa fanma n tiegi u dogu bilinciamu buliñoabu yaabu n yi mi Ñima Buliñoabu kani, ki cogi li tili yeni, ki cili ku tiŋaagu ki yaa caa hali u yensiinu, ke bi jaba, bi puoba leni yaaba n baa fidi ki gaa mi maama kuli ye likani. Bi niba kuli den cengi bonŋanla wan cogi yaala.

⁴ Esidirasi den doni ki se ban den taa ti daadi ki ŋanbi yaa sedikaanu, li taanli yeni po. Matitia, Sem, Anaya, Uriya, Hilikiya leni Maaseya den se o jienu po ki baali o, ke Pedaya, Mikayeli, Malikiya, Hasumi, Hasibadana, Sakari leni Mesulami mo se o ganu po.

⁵ Esidirasi n den gbabidi li tili yeni, bi niba kuli den nua, kelima wan den se naankani yeni, o den kpedi ki cie bi niba kuli. Wan den gbabidi li, bi niba kuli den fii ki sedi.

⁶ Esidirasi den jaandi ki kpiagi o Diedo U Tienu yua n yabi. Bi niba kuli den yugidi bi nii ki yedi: «Amina! Amina,» ki labini tiipo ki kpiagi o Diedo.

⁷ Li yaa puoli, Josue, Selebia, Jamini, Akubi, Sebetayi, Hodiya, Maaseya, Kelita, Asariya, Josabadi, Hanani, Pelaya leni Levi buolu den bundi bi niba po li bali maama, ke nilo kuli se o kaanu.

⁸ Bi den cogi U Tienu bali maama tili bonŋanla, ki go bundi ke bi niba kuli n fidi ki gaa ban cogi yaala.

⁹ Nehemi, yua n den tie guveneeri, li bali maama bando Esidirasi, yua n go den tie o kopadiciamo leni Levi buolu, yaaba n den bangi bi niba yeni, den yedi bi niba kuli: «Dinla yaa daali gagidi o Diedo yi Tienu po. Yin da boandi yi pala ki yaa buudi yeni,» kelima bi niba kuli n den gbadi li bali maama n yedi yaala, bi den buudi.

¹⁰ Bi go den yedi ba: «Kuni mani ki ban ŋmani yaa nandi n pia mi kpama, ki ño yaa bonñokaala n mani, ki boagidi mi jiema ki pa yaaba n ki pia, kelima dinla tie yaa daali n gagidi ti Diedo po. Da boandi mani yi pala, kelima o Diedo n puuni yaa pamanli tie yi fidu.»

¹¹ Levi buolu moko den duani bi niba kuli yama ki yedi ba: «Suo mani, kelima dinla tie yaa daali n gagidi. Da boandi mani yi pala.»

¹² Lanwani, bi niba kuli den kuni ki ban dini ki go ñuni, ki soani mi jiema yaaba n ki pia po, ki mangi bi pala boncianla, kelima bi den gaa ban den bundi bi po yaa maama.

A suga jaanma

¹³ Li dalieli, Isidayeli diedanba, bi kopadicianba leni Levi buolu kuli den taani li bali maama bando Esidirasi kani, ki baa cengi U Tienu bali maama bundima.

¹⁴ Bi den laa ke li diani U Tienu n den teni Musa yaa bali maama nni, ke Isidayeli buolu baa yaa ye a suga nni, o cileleelo yaa jaanma yogunu,

¹⁵ ki go kpaani bi dogi nni kuli leni Jerusalemi nni, ki yedi: «Gedi mani a juana po ki ban baa olivie tiidi beni, ban ko yua leni li fuali nni yua, mirti tiidi beni, ti kpakpafaadi leni yaa tiidi n pia ti faadi boncianla kuli beni, ki tii a suga nani lan diani maama.»

¹⁶ Lanwani, bi niba kuli den gedi ki ban baa i beni ki tii a suga bi diena yula po, bi luoli nni, U Tienu diegu luoli nni, u bilinciamu buliñoabu, mi Ñima Buliñoabu fanma nni leni yaabu n yi Efrayimi Buliñoabu yaa fanma nni kuli.

¹⁷ Yaa nitaanli n den ñani ti yonbidi kuli den tii a suga ki ye a niinni. Ki cili Nun bijua Josue yogunu, ki pundi hali landaali, Isidayeli buolu naa go den jaani laa jaanma buolu. Bi den mangi bi pala hali boncianla.

¹⁸ Bi den cogi bi po U Tienu bali maama tili daali kuli, ki cili mi jaanma cilidaali, ki ban pundi hali mi juodima daali. Bi den jaani laa jaanma danalele, ki taani taancianli li daniili daali nani lan den bili maama.