Nehemi 13 - U TIENU MAAMA TILI 2013

Nehemi n lebidi yaala U Tienu diegu nni

¹ Lanyogunu bi den cogi Musa bali maama tili nni, ki laa ke li diani ke Anmoni buolu yua leni Moabi buolu yua kan taani U Tienu niba siiga,

² kelima baa den tuogi Isidayeli yaaba ki puni ba mi jiema leni mi ñima, ki go den yini Balaam ki suu o i ligi ke wan soli bani Isidayeli yaaba. Ama ti Tienu den lebidi ti solindi ke ti tua gaali.

³ Isidayeli yaaba n den gbadi li bali maama, bi den ñani bi nilanba kuli bi siiga.

⁴ Hali ke laa bonla daa tieni, bi den gandi o kopadiciamo Eliasibi ke wan yaa die U Tienu diegu diena maama. Nani wan den tie Tobiya kpiilo yeni,

⁵ wani Eliasibi den ŋanbi ki teni o diecianli, ban den kpa kuandi naani bu paabu, a dugibila, ti tiadi, ŋalikama, o duvenpaano leni mi kpama kuli yaa diim, ke li tie Levi buolu, bi yanyinba leni a buliñoaguuda po. Bi go den kuandi ban ñandi yaala bi kopadicianba po moko laa dieli nni.

⁶ Mii den ye Jerusalemi laa bonla kuli n den tieni yaa yogunu, kelima n den guani ki gedi Babilonni bado Aritakiselisesi po, o bali piitaa n binlieli binli. Li binli juodima, o den puni nni u sanu

⁷ ke n guani Jerusalemi. N den laa Eliasibi n tieni yaa bonbiadila, ki teni Tobiya li dieli U Tienu diegu luoli nni.

⁸ N pali den fii hali boncianla, ke n taa Tobiya n die yaa tiadi kuli ki ñani li dieli nni ki luni niinpo.

⁹ N den teni ke bi ŋanbi a diena ke n guani ki bili U Tienu diegu tiadi, bu paabu leni a dugibila.

¹⁰ N go den gbadi ke baa tendi Levi buolu lan bili ban yaa tendi ba yaala, ke bani leni bi yanyinba, yaaba n den kubi U Tienu diegu tuonli mo den sani, ke yuakuli gedi o kuanu po.

¹¹ N den funi leni li bali danba ki yedi ba: «Be yaa po ke yi ŋaa U Tienu diegu?» N den yini ki taani Levi buolu leni bi yanyinba, ki guani ki kuani ba bi tuonli nni.

¹² Lanwani, Juda buolu den cuani ti tiadi n bili yaa diena nni ŋalikama, duvenpaano leni mi kpama kuli yaa diim.

¹³ N den guuni o kopadiciamo Selemia leni li bali maama bando Sadoki leni Levi buolu yua Pedaya ti tiadi n bili yaa diena nni. Matania yaabili Hanani, Sakuri bijua den pugidi bi po, kelima bikuli den tie ban dugi yaaba yaa po. Bi tuonli den tie ban yaa boagidi bu paabu bi lieba.

¹⁴ «N Tienu, tiadi n po kelima laa bonla po. Da sundi min soani leni yaa teginma a diegu nni leni ŋan bili tin yaa ŋua yaala kuli niinni.»

¹⁵ Lanyogunu n den laa Juda diema nni, ke bi niba ŋmaadi i duventiidi bonluonkaala, duven ŋanbikaanu U Tienu fuodima daali. Bi tianba den kuandi a ŋalikama baba, ki tungi i ŋunbi duven, duven tiidi bonluonkaala, a kankana leni bonbuolu kuli ki caani Jerusalemi U Tienu fuodima daali. N den funi leni ba ban kuadi bi kuadima yaa daali.

¹⁶ Tiiri yaaba, yaaba n den ye Jerusalemi moko den kpendi nni i jami leni bonkuadibuolu kuli, ki kuadi Juda buolu po U Tienu fuodima daali, Jerusalemi nni.

¹⁷ N den funi leni Juda niciama, ki yedi ba: «Yin tiendi yaa tuongunda, ki cagini U Tienu fuodima daali ne mo bua ki yedi be?

¹⁸ Yi yaajanba ki den tieni yeni ka? Lani yaa po ka ke U Tienu cuani yaa fala n tie ne tinba leni u dogu ne po? Yinba mo go cagini U Tienu fuodima daali, ki didi baa teni o pali n fii Isidayeli yaaba po.»

¹⁹ Lane, n den bili ke ban yen luoni Jerusalemi buliñoana u yienu n kua yaa yogunu, hali ke U Tienu fuodima daali daa cili, ki da luodi a mo, ke U Tienu fuodima daali daa pendi. N den sieni n naacenba a buliñoana kani, ke ban da tuo tugiliba n kua u dogu nni, U Tienu fuodima daali.

²⁰ Lanwani, a kpenkpenda leni yaaba n kuadi bonkuadibuolu kuli, den dua niinpo yenma bi milie.

²¹ N den funi leni ba ki yedi: «Be yaa po ke yi dua u bilinu puoli? Yi yaa go tieni yeni kuli, n baa cuo yi.» Hali lanyogunu, baa go cua U Tienu fuodima daali.

²² N go den bili ke Levi buolu n ŋanbi bi baa, ki cua ki yaa guu a buliñoana, ki gagidi ki ŋanbi U Tienu fuodima daali. «N Tienu, ŋan tiadi n po kelima laa bonla po, ki kubi nni kelima a ninñingbadicianma po.»

²³ Lanyogunu, n den laa yaa Jufinba n taa yaa puoba n tie Asidodi dogu yaaba, yaa puoba n tie Anmoni buolu leni Moabi buolu.

²⁴ Bi bila siiga boagidima den bani Asidodi yaaba mabuolu, bi tianba mo den bani mabuotoe, ama oba kuli ki den bani Jufinba yaa mabuolu.

²⁵ N den funi leni ba ki soli ba. N den pua bi siiga bi tianba ki ŋabi bi yudi, ki teni ke bi poli hali U Tienu po, ke bi kan go pa bi bisiaba bi nilanba bijaba, ki kan go taa bi nilanba bisiaba bi bijaba po, bi bi yula po mo.

²⁶ N den yedi ba: «Isidayeli bado Salomon ki den tieni ti tuonbiadi laa bonla nni ka? I nilanbuoli kuli siiga ki den pia yaa bado n naani leni o. U Tienu den bua o, ki teni ke o tua Isidayeli yaaba kuli bado. Ama ba yeni bi nilanpuoba den kuani o ti tuonbiadi nni.

²⁷ Tii go bua ki gbadi ke yi tiendi laa tudicianma ti Tienu po, ki taani bi nilanpuoba.»

²⁸ Yoyada bijua yendo, yua n den tie bi kopadicianba bado Eliasibi yaabili, den cuadi leni Horoni yua Sanbala. N den deli o ki foagidi n kani.

²⁹ «N Tienu, ŋan tiadi bi po, kelima bi cagini li padili tuonli leni ŋan den kuani yaa ŋantaado leni bi kopadicianba leni Levi buolu.»

³⁰ N den ñani nilamo kuli Isidayeli yaaba siiga, ki ŋanbi ba. N den ñii bonŋanla yaa bali maama n bili kopadiciamo leni Levi buolu yua kuli n baa yaa tiendi yaala o tuonli nni.

³¹ N go den bili Isidayeli yaaba n baa yaa tendi ti daadi leni li bonluonkakpiala kuli yaa yogunu. «N Tienu, ŋan tiadi n po, ki mangi n po a nunga.»