Nehemi 12 - U TIENU MAAMA TILI 2013

Nehemi bogini li tuonli n baa cuoni maama 12—13 Bi kopadicianba leni Levi buolu yela

¹ Bi kopadicianba leni Levi buolu, yaaba n den ñani ti yonbidi ki yegi leni Seyalitieli bijua Sorobabeli leni Josue, ki guani ki kpeni nne: Seraya, Jeremi, Esidirasi,

² Amaria, Maluki, Hatusi,

³ Sekania, Rehum, Meremoti,

⁴ Ido, Ginetoyi, Abiya,

⁵ Mijamini, Maadia, Biliga,

⁶ Samayeja, Joyalibi, Yedaya,

⁷ Salu, Amoki, Hilikiya leni Yedaya. Bani n den tie bi kopadicianba leni bi kpiiba yudanba, Josue yogunu.

⁸ Levi buolu den tie: Josue, Binuyi, Kadimieli, Selebia, Juda leni Matania yua n den gobidi ti pagidi yani, wani leni o diegu yaaba.

⁹ Bakibukia leni Uni den ye leni ba, ki todi ba.

¹⁰ Josue den mali Joakimi, Joakimi n maa Eliasibi, Eliasibi n maa Yoyada,

¹¹ Yoyada n maa Jonatan, Jonatan mo n maa Yadua.

¹² Bi kopadicianba bado Joakimi yogunu, yaaba n den tie bi kopadicianba diedanba nne: Seraya diegu nni, Melaja n den tie o diedaano, Jeremi diegu nni, Hanania.

¹³ Esidirasi diegu nni, Mesulami, Amaria diegu nni, Yohanani.

¹⁴ Meluki diegu nni, Jonatan, Sebania diegu nni, Josefi,

¹⁵ Harim diegu nni, Adina, Merayoti diegu nni, Helikayi.

¹⁶ Ido diegu nni, Sakari, Gineton diegu nni, Mesulami.

¹⁷ Abiya diegu nni, Sikiri, Minyamini leni Moadia diegu nni, Pilitayi.

¹⁸ Biliga diegu nni, Samua, Semaya diegu nni, Jonatan.

¹⁹ Joyalibi diegu nni, Matinayi, Yedaya diegu nni, Usi.

²⁰ Salayi diegu nni, Kalayi, Amoki diegu nni, Ebeli.

²¹ Hilikiya diegu nni, Hasabia, Yedaya diegu nni, Netaneyeli.

²² Bi kopadicianba yudanba Eliasibi, Yoyada, Yohanani leni Yadua yogunu, bi den diani Levi buolu, bi diedanba leni bi kopadicianba yela Persi bado Dariyusi bali yogunu.

²³ Levi buolu diedanba yela den diani daali kuli jama tila nni, hali Eliasibi yaabili Yohanani yogunu.

²⁴ Levi buolu yudanba Hasabia, Selebia leni Kadimieli bijua Josue tuonli den tie ki yaa se ki tiegi bi kpiiba ki yiini ki kpiagidi ki go pagi o Diedo bi yaa yogunu yaa pundi, nani U Tienu nilo Davidi n den bili maama.

²⁵ A buliñoaguuda Matania, Bakibukia, Abidiasi, Mesulami, Talimoni leni Akubi tuonli den tie ban yaa guu ban biliti ti tiadi yaa diena nni buliñoana kani.

²⁶ Bi den ye Yotisadaki yaabili Joakimi, Josue bijua yogunu, guveneeri Nehemi leni Esidirasi yua n den tie o kopadiciamo leni li bali maama bando yaa yogunu.

Jerusalemi bilini gagidima jaanma

²⁷ Jerusalemi bilini gagidima jaanma yogunu, bi den yini Levi buolu ban ye naankani kuli, ki cuani ba Jerusalemi ke ban jaani i bilini gagidima jaanma leni ti pagidi leni i yani, ki pua ti kupandi leni ti gogiditi buoli kuli.

²⁸ Bi yanyinba den ñani Jerusalemi gaanilindima, Netofa dobila nni,

²⁹ Beti-Giligali, Geba leni Asimafeti yaa dogi nni ki taani, kelima bi den maa a dobila Jerusalemi lindima.

³⁰ Bi kopadicianba leni Levi buolu den gagidi ki ŋanbi bi baa, ki go gagidi ki ŋanbi Isidayeli yaaba, u dogu buliñoana leni u bilini.

³¹ N den teni ke Juda buolu yudanba doni u bilinu po. N den boagidi yanyin-cagiciamalie. Li cagikpiali den cuoni u bilinu po jienu po, ki tiegi ti Bugidi Buliñoabu.

³² Hose leni Juda buolu yudanba boagidima den cuoni bi yaa puoli po

³³ leni Asariya, Esidirasi, Mesulami,

³⁴ Juda, Benjamen, Semaya, Jeremi,

³⁵ bi kopadicianba leni bi kakacinba, ki pugini Asafi yaabili Sakari. Asafi den mali Sakuri, Sakuri n maa Mise, Mise n maa Matania, Matania n maa Semaya, Semaya n maa Jonatan, Jonatan mo n maa wani Sakari.

³⁶ Sakari den ŋua, wani leni o kpiiba Semaya, Asareeli, Milalayi, Gilalayi, Maayi, Netaneyeli, Juda leni Hanani ki tugi U Tienu nilo Davidi baantatiadi. Li bali maama bando Esidirasi den ye bi liiga.

³⁷ Ban den pundi li Ñinbunli Buliñoabu kani, bi den sua ke bi ye Davidi dogu dojiidikaanu nintuali. Bi den doni u bilinu dokaanu kani. Bi den kpedi ki caadi Davidi badidiegu, ki cuoni ki ban pundi hali mi Ñima Buliñoabu, u dogu puoli.

³⁸ Li cagilieli den tagini ganu po. N den ŋua bi puoli, u bilinu po, mini leni Isidayeli yaaba boagidiliema. Ti den tagini ki ñani mu Buamu Diefoagili kani, u bilinu n piagi naani,

³⁹ Efrayimi Buliñoabu, bu Buliñoakpelibu, i Jami Buliñoabu kani, Hananeeli Diefoagili leni Meya yaa Diefoagili kani, ki ban ñani hali i Pe Buliñoabu kani. Ti den ban sedi li kpaadidieli Buliñoabu kani.

⁴⁰ A yanyincagilieda yeni den sedi U Tienu diegu nni. Mini leni li bali danba yaaba n den yegi leni nni moko den sedi

⁴¹ leni bi kopadicianba Eliakim, Maaseya, Minyamini, Mise, Eliyonayi, Sakari leni Hanania yaaba n den kubi kakacinba

⁴² leni Maaseya, Semaya, Eleasari, Usi, Yohanani, Malikiya, Elami leni Eseli. Bi yanyinba den yiini. Jisilakija den gobidi ba.

⁴³ Landaali bi den padi a pada boncianla, ki mangi bi pala kelima U Tienu den puni Isidayeli yaaba li pamancianli. Bi puoba leni a bila moko den mangi bi pala. Lane bi niba den gbadi Jerusalemi pamanli kpaani hali foagima.

Bi kopadicianba leni Levi buolu biini

⁴⁴ Landaali, bi den teni ke bi niba guu bu paabu, ki tinga bonluonkakpiala leni ban ñandi yaa diim n bili yaa diena nni. Bi den puogi ba ban yaa gaani ki biliti lienni li dobila kpaandi, li bali maama n bili ban yaa tendi bi kopadicianba leni Levi buolu yaaba yaala. Juda buolu pala den mani ke bi kopadicianba leni Levi buolu kubi bi tuonli,

⁴⁵ ki kubi U Tienu tuonli leni mi gagidiŋanbima yaa tuonli. Bi yanyinba leni a buliñoaguuda moko den kubi bi tuona nani Davidi leni o bijua Salomon n den bili maama,

⁴⁶ kelima hali yogu, Davidi leni Asafi yogunu, li den pia bi yanyinba yudanba yaaba n gobidi ti pagidi yani leni i tuondi yani U Tienu kpiagidi po.

⁴⁷ Sorobabeli yogunu leni Nehemi yaa yogunu kuli, Isidayeli yaaba kuli den tendi bi yanyinba leni a buliñoaguuda bi biini daali kuli. Bi den tendi Levi buolu moko yaala n gagidi, ke bi mo tendi Alono yaabila bi kopadicianba bi yaa biinu.