Nehemi 10 - U TIENU MAAMA TILI 2013

Ku niligu niani ke bi baa guani ki kubi li bali maama

¹ Lani kuli yaa po, ti den poli ki niani ki diani. Ti yudanba, Levi buolu leni ti kopadicianba den tieni bi maalima tin diani yaa tila yeni po.

² Yaaba n den tieni bi maalima nne: Hakalia bijua Nehemi, yua n den tie guveneeri,

³ Sekiasi, Seraya, Asariya, Jeremi,

⁴ Pasehuri, Amaria, Malikiya,

⁵ Hatusi, Sebania, Maluki,

⁶ Harim, Meremoti, Abidiasi,

⁷ Danieli, Gineton, Baruki,

⁸ Mesulami, Abiya, Mijamini,

⁹ Maasia, Biligayi leni Semaya. Bikuli den tie kopadicianba.

¹⁰ Levi buolu: Asania bijua Josue, Henadadi cuuli yua Binuyi, Kadimieli

¹¹ leni bi kpiiba Sebania, Hodiya, Kelita, Pelaya, Hanani,

¹² Mise, Rehobi, Hasabia,

¹³ Sakuri, Selebia, Sebania,

¹⁴ Hodiya, Bani leni Bininu.

¹⁵ Isidayeli yaaba yudanba mo den tie: Pareyosi, Pahati-Moabi, Elami, Satu, Bani,

¹⁶ Buni, Asigadi, Bebayi,

¹⁷ Adonija, Bigifayi, Adini,

¹⁸ Ateli, Esekiasi, Asuri,

¹⁹ Hodiya, Hasumi, Betisayi,

²⁰ Halifi, Anatoti, Nebayi,

²¹ Magipiasi, Mesulami, Hesiri,

²² Mesesabeeli, Sadoki, Yadua,

²³ Pelatia, Hanani, Anaya,

²⁴ Hose, Hanania, Hasubi,

²⁵ Halosesi, Pila, Sobeki,

²⁶ Rehum, Hasabina, Maaseya,

²⁷ Ahiya, Hanani, Anani,

²⁸ Maluki, Harim leni Baana.

²⁹ Isidayeli yaaba, yaaba n sieni, bi kopadicianba, Levi buolu, a buliñoaguuda, bi yanyinba, U Tienu diegu naacenba leni yaaba n den paadi leni bi nilanba ki ŋoadi U Tienu bali maama kuli, bi puoba, bi bijaba leni bi bisiaba, yaaba n den baa fidi ki gaa bonla kuli,

³⁰ den taani leni bi Jufilieba yaaba n tie nikpiaga. Bi den niani ki poli ke bi baa tuo ki yaa ŋua U Tienu n den teni o naacemo Musa yaa bali maama n yedi yaala, ke bi baa tuo ki yaa tiendi Li Miali Diedo ti Tienu mabilikaama, o ñoamabona leni o bali maama n yedi yaala.

³¹ Lanwani, ti den niani ke ti kan pa mi diema niba ti bisiaba, ke ti kan taa bi bisiaba mo ki teni ti bijaba.

³² U Tienu fuodima daali, bi jaanma daali, bi yaa cuani ŋalikama bi kuaditoama ki baa kuadi, ti kan daa bi kani liba kuli. Binaluoba yaa yen pendi kuli, ti baa fuoni ki tinga li binleleeli, ki cabi yaaba n kubi ti pana mo.

³³ Ti den bili ke binli kuli ti baa yaa lubi i ligi waamu waamu o Diedo diegu tuonli po.

³⁴ Laa ligi baa yaa tie tin baa yaa puuni U Tienu yaa dupen po, daali kuli padili, U Tienu fuodima daali yaa pada po, i ŋmapaani leni mi jaanma yaa pada po. I ligi yeni go baa yaa tie yaa pada n sieni ke bi padi U Tienu po, ban padi yaa pada ki miadi sugili Isidayeli yaaba tuonbiadi po leni yaala n tiendi U Tienu diegu nni kuli po.

³⁵ Tinba bi kopadicianba, Levi buolu leni Isidayeli yaaba, yaaba n sieni, ti den toani tiatia ki baa bandi diegu kuli n baa cuani ti daadi yaa yogunu U Tienu diegu po. Binli kuli ti baa cuani yaa daadi n dagidi ki juu a pada o Diedo ti Tienu padibinbinli po, nani lan diani li bali maama nni maama.

³⁶ Ti go den bili ke binli kuli ti baa cuani ti tinmu bonluonkakpiala leni ti tiidi kuli yaa bonluonkakpiala U Tienu diegu nni.

³⁷ Ti baa yen cuani ti bonjakpiala leni ti yandi bontonkpiamu U Tienu diegu nni, bi kopadicianba kani nani lan diani maama li bali maama tili nni. Ti baa yen cuani ti ne leni ti pe bontonkpiamu, ki teni yaa kopadicianba n tuuni U Tienu diegu nni.

³⁸ Ti go baa yen cuani ti yonŋanma waamu leni tin pia yaa paabu, i tiidi kuli bonluonkaala, duven bonpaano leni mi kpama U Tienu diegu diena nni, ki teni ba. Levi buolu n baa yaa die ti kuani bonluonkaala yaa diim. Bi baa cua tin ko yaa tinmu dogi nni ki gaa bani bi ba.

³⁹ Alono yaabili o kopadiciamo baa yaa yegi leni Levi buolu, ban gaani diim yeni yaa yogunu. Bani Levi buolu baa ñani ban gaa gaa yaala yeni niinni diim, ki cuani ti Tienu diegu nni, ku ŋalimandiegu diena nni.

⁴⁰ Laa diena nne, ke Isidayeli yaa leni Levi buolu baa cuani yaa paabu n tie ŋalikama, duven bonpaano, mi kpama leni U kaangagidiŋamu tiadi. Bi kopadicianba yaaba n die li tuonli, a buliñoaguuda leni bi yanyinba den ye lankane. Yeni ti kan ŋaa ti Tienu diegu.