Nehemi 1 - U TIENU MAAMA TILI 2013

Nehemi guani Jerusalemi ki maa u bilini 1—7 Nehemi baa Jerusalemi laabaalo

¹ Hakalia bijua Nehemi maama togida: Persi bado Aritakiselisesi bali binpiiliedi, yaa ŋmaalo n yi Kisile yaa niinni, mini Nehemi den ye u dociamu Susi nni.

² N kpiiba siiga yendo, Hanani leni nitoaba den ñani Juda diema ki cua. N den buali ba yaa Jufinba n faabi leni ti yonbidi ki guani ki kpeni Jerusalemi leni Jerusalemi laabaali kuli.

³ Bi den guani ki yedi nni ke yaa niba n sieni leni yaaba n ñani ti yonbidi ki guani ki kpeni Juda diema nni ye likani leni o falaciamo leni yaa fe n kandi, ke Jerusalemi bilinciami mudi mudi, ke u mu mo buoni u buliñoana.

Nehemi jaandi ki mia Isidayeli yaaba po

⁴ Min den gbadi laa bonla kuli, n den kali ki buudi. N den ye leni li paboanli ki luo bu ñoabu dana boncianla, ki jaandi ki miadi U Tienu yua n ye tanpoli,

⁵ ki yedi o: «Li Miali Diedo U Tienu yua n ye tanpoli, fini yua n yabi ki pia i jeje, fini yua n kubi ŋan den bili yaa ŋantaado leni yaaba n bua ŋa, ki kubi a bali maama, ki gba bi po mi ninñima,

⁶ cengi, a nuni mo n diidi nni. Cengi moala mini a naacemo n miadi a yaala. Ku ñiagu leni u yensiinu kuli, n miadi a tinba a naacenba Isidayeli yaaba po, ki doagidi ti tuonbiadi, tin den tieni a po yaadi, kelima mini leni n baadiegu yaaba kuli, ti tieni ti tuonbiadi.

⁷ Ti tudi a po, tii kubi ŋan den teni a naacemo Musa yaa bali maama, yaa ñoamabonbilikaana leni yaa mabilikaama.

⁸ Tiadi ŋan den puogi a naacemo Musa wan yedi ti yaala: ‹Yi yaa tieni ti tuonbiadi, n baa yadi yi i nilanbuoli siiga.

⁹ Ama yi yaa lebidi ki guani n kani ki go kubi n bali maama, ki tiendi man yedi yaala mo, lanwani ba bi yaa gedini yi ti yonbidi hali ŋanduna bianu, n baa ñani yi lipo ki taani yi, ki guani yi min den gandi yaa kaanu nni, ki bili ke bi baa yaa kpiagidi nni likani yeni.›

¹⁰ Tinba Isidayeli yaaba tie a naacenba leni a nibuolu, ŋan den daa ki faabi yaa nibuolu leni a fidu leni a paalu.

¹¹ N Diedo, ŋan cengi mini a naacemo n miadi a yaala leni a naacenba yaaba n bua ki fangi a yeli n miadi a yaala. Teni ke mini a naacemo sanu n pendi dinla, ki go teni min baa ki nunmanga o bado kani.» Lanyogunu, n den tie yua n tendi wani o bado o bonñokaala.