Mi Tiadima 9 - U TIENU MAAMA TILI 2013

Isidayeli ki tiegi ki cie yaaba n sieni

¹ Musa den yedi Isidayeli yaaba: «Cengi mani! Dinla yi baa duodi Jurden. Yi baa gedi ki diedi yaa diema n yabi, ki go pia u paalu ki cie yi. Yi baa diedi mi dogi, yii n yabi, ke i bilini pia u paalu ki go kpedi hali boncianla.

² Yaa nibuoli n ye mi niinni, pia u fidu ki go kpedi boncianla, nani Anaki buolu yeni. Yi bani Anaki buolu. Yi gba ke bi maadi bi maama ki tua: ‹Ŋme n baa fidi ki mua jama Anaki buolu kani?›

³ Lanwani, yin bandi dinla, ke o Diedo yi Tienu ye wani o ba yi liiga, nani yaa mu n buondi yeni. Wani o ba n baa faligi ba, ki bolini ba yi nintuali. Yi baa deli ba likani tontoni, nani o Diedo n den yedi yi maama.

⁴ O Diedo yi Tienu yaa deli ba yaa yogu, yin da yedi yi pala nni: ‹Li tie ti teginma po yo, ke o Diedo teni ke ti kua ki diedi yaa diema n tie ne.› Bi biadima po n teni, ke o Diedo deli ba yi nintuali.

⁵ Laa tie yi teginma leni yi tagiŋamu po ka, ke yi baa kua ki diedi bi diema. Ama li tie bi biadima po yo, ke o Diedo yi Tienu deli ba yi nintuali, ke wan den poli ki niani yi yaajanba, Abalahama, Isaaka leni Jakob yaala n tieni.

⁶ Lanwani, yin bandi ke laa tie yi teginma po ka, ke o Diedo puni yi laa dieŋanma, ke yin diedi ma, kelima yi tie tupaali danbe.»

Ku niligu tagili: wula naabiga

⁷ Musa den yedi: «Tiadi mani, ki da sundi, ke yi den bieni o Diedo yi Tienu pali mi fanpienma nni. Hali yin ñani Ejipiti diema nni yaa daali, ki taa ki pundi hali yin cua u naa kaanu yaa daali, yi den fiindi mi yiema o Diedo po.

⁸ Horebi kani, yi den fiini o Diedo pali. Lani, o Diedo pali den beni yi po, hali ke o den bua ki bolini yi.

⁹ Min den doni li juali po yaa yogunu ki baa gaa mu tanpabimu, o Diedo n den kuani o ŋantaado leni yi leni yaamu yeni, n den tieni li juali po, dana piinaa leni ñiadi piinaa. Mii dini jiema, mii den ñuni ñima mo.

¹⁰ O Diedo den teni nni mu tanpabiliedimu yeni, U Tienu nubili n diani yaamu yaa po. Yaa maama n den diani lienni tie, li taanli daali, li juali po, wan den kpa yedi yaama, u mu siiga.

¹¹ Dana piinaa leni ñiadi piinaa n den pendi yo, ke o Diedo den teni nni mu tanpabiliedimu, o ŋantaado tanpabimu yeni.

¹² Lanwani, o Diedo den yedi nni: ‹Fii ki ña ne ki jiidi tontoni, kelima a niba, ŋan ñani yaaba Ejipiti diema nni yeni biidi bi yula. Bi jaligi ki ŋaa min den bili bi po yaa sanu, ki taa ti kudi ki duadi bi yula po o bulo.›

¹³ O Diedo den yedi nni: ‹N laa bi naa niba ki sua ke bi tie tupaali danba.

¹⁴ Cedi min bolini ba, ki ñani bi yela mi tinfanma nni. Lani, n baa teni ŋan tua yaa buolu n pia u paalu, ki go yabi ki cie u naa nibuolu.›

¹⁵ N den guani ki jiidi li juali ke o ŋantaado tanpabiliedimu ye n nuu nni, ke li juali mo kuli co u mu.

¹⁶ N den laa ke yi tieni ti tuonbiadi o Diedo yi Tienu po, ki duadi yi yula po ki naabiga, ki lebidi tontoni ki ŋaa o Diedo n den waani yi yaa sanu.

¹⁷ Lani yaa po yo, ke n den mabi ki mudi yi nunbu nni, min den kubi yaa tanpabiliedimu.»

Musa mia bi po sugili

¹⁸ Musa den yedi: «N den laabi o Diedo nintuali dana piinaa leni ñiadi piinaa, nani mi kpiama yeni, ki naa dini jiema ki naa ñuni ñima mo, kelima yin den tieni yaa tuonbiadi kuli po, ki fiini o Diedo pali.

¹⁹ N den tieni yeni, kelima n den laa ke o Diedo gbie leni li pabiencianli, ki bua ki bolini yi. Lanyogunu moko, o Diedo den gaa n miabu.

²⁰ O Diedo pali den beni Alono po boncianla. O den bua ki bolini o. Lanyogunu, n den mia Alono moko yaa po sugili.

²¹ N den taa ki naabiga yeni, yi tuonbiadi n den tagi yaaga, ki den juu ka u mu nni. N den mudi ga yomi yomi, ke ki tua wagima. N den taa mi wagima yeni ki luni yaa ñinsanu n ña li juali po ki ji yeni nni.

²² Tin den kaa Tabeera, Masa leni Kibiroti-Hataava, yi den fiini o Diedo pali.

²³ O Diedo n den soani yi Kadesi-Barneya, o den yedi: ‹Gedi mani ki ban kua min puni yi yaa diema yeni niinni, ki diedi ma.› Yi den yie o Diedo yi Tienu ñoamabonli. Yii den dugi o po. Yii den cengi o.

²⁴ Hali min bandi yi yaa yogunu, yi li tie niyiekaabe o Diedo po.

²⁵ O Diedo n den jagi ke o baa bolini yi, n den baa ki laabi o nintuali dana piinaa leni ñiadi piinaa.

²⁶ N den mia o Diedo ki yedi o: ‹Li Miali Diedo U Tienu, ŋan da bolini a buolu yuu n tie a piama, ŋan den faabi yuu a yabinu nni, ki den ñani u Ejipiti nni leni a paalu.

²⁷ Ŋan tiadi a naacenba Abalahama, Isaaka leni Jakob po. Ŋan da diidi yaa buolu n tie ne tupaalu, u biadima leni u tuonbiadi ka.›

²⁸ Ŋan da teni ke ŋan ñani ti yaa diema nni niba n yedi: ‹O Diedo naa pia yaa paalu n baa kuani ba wan den niani ba yaa diema nni. Wan nani ba yeni yaa po yo, ke o den ñani ba ki baa kpa ba mi fanpienma nni.›

²⁹ Ba leni lani kuli, bi tie a yaa niba leni a yaa piame, ŋan den ñani yaaba leni a paalu leni a fidu.»