Mi Tiadima 7 - U TIENU MAAMA TILI 2013

Isidayeli buolu gagidi o Diedo po

¹ O Diedo yi Tienu yaa gobidi ki kuani yi yin baa diedi yaa diema yeni niinni, o baa deli yi nintuali yaa nibuoli n yabi ki cie yi. Lani n tie: Hititi, Giligasi, Amoriti, Kanana, Hiviti, Perisiti leni Jebusi yaaba. Laa nibuoleleedi pia u paalu ki cie yi.

² Yaa yogunu ke o Diedo yi Tienu teni ke yi pua ki paadi laa nibuoli, yin da baa ŋantaadoba leni ba. Yin da gbadi bi ninñima mo.

³ Yin da baa puotaali ŋantaado leni laa nibuoli yaaba, yin da taa yi bisiaba ki pa bi bijaba, ki nan da taa bi bisiaba mo yi bijaba po.

⁴ Yi yaa tieni yeni, yi baa teni yi bijaba n foagidi leni nni, ki teni ban ban kpiagi tientoe, ki fiini o Diedo pali yi po, wan bolini yi tontoni.

⁵ Diidi yin baa soani ba yaa tuonli: yi baa tudi ki lu bi padibinbina, ki mudi bi butana, ki kua Akera budaadi, ki juu bi nannana mo kuli u mu nni.

⁶ Yi baa tieni yeni, kelima yi tie yaa nibuolu n gagidi ki ŋani o Diedo yi Tienu po. O Diedo yi Tienu gandi yi, ke yin tua i nibuoli siiga, o yaa nibuoliceli mi tinfanma nni.

O Diedo kubi o ñoanianu

⁷ Laa tie kelima yi coali yabi ki cie yaa nibuoli n sieni kuli ka, ke o Diedo den gandi yi, ki nagini yi o kani. Yi yaa buolu n wa ki cie yaa nibuoli n sieni kuli.

⁸ O Diedo yaa tieni yeni, li tie ke o bua yi, ki go bua ki kubi, wan den poli yaa poli leni yi baanba. O Diedo den ñani yi leni yaa nuu n pa, ki faabi yi ti yonbidi diema nni, Ejipiti bado Faraon nuu nni.

⁹ Lani, yi baa bandi ke Li Miali Diedo yi Tienu n tie U Tienu, yaa Tienu n tiegi. O kubi o ŋantaado leni o ŋanbili yaaba n bua o, ki kubi o bali maama hali nifiima tudili.

¹⁰ Ama o tuu i panpaani tontoni yaaba n nani o po. O bolindi ba tontoni.

¹¹ Yi baa kubi min teni yi dinla yaa bali maama, yaa mabilikaama leni yaa ñoamabona, ki go tieni lan yedi yaala.

¹² Yaa yogunu ke yi cengi a naa ñoamabona, ki kubi ki go tieni ŋan yedi yaala, o Diedo yi Tienu baa kubi wan den poli ki niani yaala leni yaa ŋanbili yi baanba.

¹³ O baa bua yi, ki seligi yi, ki teni yin yaa maa ki pugidi. O baa seligi yi madi leni yi tinga bonluonkaala. O baa seligi yi ŋalikama, yi duvenpaano, yi kpama, yi ne leni yi yanbidi madi, wan den poli leni yi baanba ke o baa pa yi yaa diema nni.

¹⁴ Yi baa tua yaaba n baa li seli ki cie i nibuoli kuli. Yi siiga nni, yi kan go baa yaa joa, bi yaa pua n tie ŋoaliga. Yi yangola siiga mo, kan go baa yaa yandi n ki maa.

¹⁵ O Diedo baa foagidi yi kani u yianu. O kan faligi yi leni yin den bani Ejipiti nni yaa yianyuogidi siiga, ba yianyendu. Ama, o baa soani laa fala yaaba n nani yi po.

¹⁶ Yi baa bolini o Diedo yi Tienu n baa teni yin paadi yaa nibuoli yeni kuli. Ninñimiba n da cuo yi bi po, yin da pugi bi tieni, kelima li baa yaa tie yi po diagu yo.

O Diedo tie yua n kubi o niba

¹⁷ Yi yaa ti yedi yaa yogunu yi pala nni: «I naa nibuoli yabi ki cie ti. Ti baa fidi ki deli yi lede?»

¹⁸ Yin da jie ba. Yin tiadi mani o Diedo yi Tienu n den tieni Faraon leni Ejipiti yaaba yaala.

¹⁹ O Diedo yi Tienu paalu n den ñani yi Ejipiti nni yaa yogunu, yi den laa wan den waani ba yaa falaciamo. Yi den laa mi biigicianma buoli kuli, sinankeene leni li bonlidinkaala. O Diedo yi Tienu baa soani yin jie yaa nibuoli kuli yene.

²⁰ O Diedo yi Tienu baa soani bi po a naalonlonbiada, hali yaaba n sieni ki wuondi yi nintuali kuli n bodi ki gbeni.

²¹ Yi gbani n da digibi bi po, kelima o Diedo yi Tienu ye yi siiga. O tie yaa Tienu n yabi, ki go pia i jeje.

²² O Diedo baa yaa deli laa nibuoli kuli waamu waamu ban foagidi yi nintuali. Yi kan fidi ki bolini ba tontoni, lani n tie ti moayandi n da ti yabidi ki fii yi po.

²³ O Diedo yi Tienu baa teni yin paadi ba. O baa digi ba, hali bikuli n bodi ki gbeni.

²⁴ O baa taa bi badiba ki tieni ba yi nuu nni, yin paadi ba, ki teni bi yela n bodi mi tinfanma nni. Oba kuli kan fidi ki sedi yi nintuali, hali yin baa bolini ba ki gbeni.

²⁵ Yi baa juu bi buli nannana kuli u mu nni. Yi yama n da kua bi ŋanjilifa bi bi wula yua n maa bi buli po, ki da taa la yi yula po, ke lan da ti tua diagu yi po. Li gundi o Diedo yi Tienu po.

²⁶ Yin da kuani cancaginbonliba kuli yi diedi nni, ke yin da ti bodi nani lani yeni. Yi baa yaa nua ke li tie cagindi, ki go gundi, kelima li tie kuale.