Mi Tiadima 4 - U TIENU MAAMA TILI 2013

U Tienu bali maama kubima

¹ Musa den yedi Isidayeli yaaba: «Moala, cengi mani, ki tieni min bangi yi yaa ñoamabona leni yaa bali maama, ki yaa ye, ki go diedi o Diedo yi baanba Tienu n puni yi yaa diema.

² Yin da pugini liba kuli min bili yi po yaa bali maama yeni nni, yin da wadi liba mo lienni. Ama yi baa kubi o Diedo yi Tienu bali maama, nani min teni yi ma, maama.

³ Yi nuni laa o Diedo n soani o bulo Baali-Peori maama. O Diedo yi Tienu den bolini yi siiga, yaa niba n den ŋoadi o bulo Baali-Peori yeni kuli.

⁴ Ama yinba, yaaba n den ŋoadi o Diedo yi Tienu yeni kuli, ye dinla leni yi miana.

⁵ Diidi mani, n den bangi yi mi mabilikaama leni a ñoamabona, nani o Diedo n Tienu n den puogi nni maama, ke yin yaa kubi, ki go tiendi likuli bonŋanla, yin baa kua ki diedi yaa diema yeni niinni.

⁶ Yi baa kubi la, ki go tieni lan yedi yaala. Yi yaa kubi, ki go tiendi lan yedi yaala, nibuotoe baa yaa nua yi ke yi tie yanfuodanba leni banda. Yeni, bi yaa gbadi li naa bali maama.» Lani bi baa yedi: «U naa nibuociamu kan fidi ki yaa tie nibuoto, li yàá tie yaa nibuolu n pia mi banma leni mi yanfuoma yaa ka!»

⁷ U laa nibuociamu mo n pia u tieni, ke u kuu leni u, nani Li Miali Diedo ti Tienu n kuu leni ti maama, ki todi ti, ti yaa mia o yaa yogunu?

⁸ Bi u laa nibuociamu mo n baa mi mabilikaama leni a ñoamabona, ke li tiegi nani min teni yi yaa bali maama dinla ne?

U Tienu doagidi Horebi juali kani

⁹ Musa den yedi: «Fangi mani yi yula, ki yaa faami yi miana po bonŋanla, yi yema dana nni kuli. Yin da sundi yi nuni n laa yaala. Yin da tuo lan foagidi leni yi pala. Yin bangi la yi bijaba leni yi yaabila.

¹⁰ Da sundi mani yin den sedi o Diedo yi Tienu nintuali yaa daali Horebi juali kani. Lanyogunu, o Diedo n den yedi nni: ‹Taani ku niligu kuli n kani. N baa teni ban gbadi n maama, ki bangi ma bi bijaba. Yeni, bi baa yaa fangi nni, bi miali yema nni kuli.› »

¹¹ Yi den nagini ki sedi li juali tiipo. Li juali kuli den co u mu, ki do hali tanpoli. Li biigili, ku muñiiboangu leni ku gbangbadigu den ye.

¹² O Diedo den maadi leni yi u mu siiga. Yi den gba u nialu leni mi maama, ama yi naa den nua o nunga. U nialu bebe n den li ña.

¹³ O den doagidi yi po o ŋantaado, wan den puogi yi yin kubi yua leni o bali mapiiga, wan den diani yaama mu tanpabiliedimu po.

¹⁴ Lanyogunu, o Diedo den puogi nni min bangi yi a ñoamabona leni mi mabilikaama. Yin baa kua ki diedi yaa diema yeni niinni, yin moandi ki tieni lan yedi yaala.

Fangi mani yi yula leni i buli

¹⁵ Musa den yedi Isidayeli yaaba: «Fangi mani yi yula bonŋanla, kelima o Diedo n den maadi leni yi u mu siiga Horebi kani yaa daali yeni, yi naa den laa o nungiba.

¹⁶ Da kuani mani yi yula ti tuonbiadi nni, ki fii ki ban tagi buloba, ki nandi o leni joa bi pua,

¹⁷ bi yangiba yaaga n ye ki tinga nni, bi nuangiba yaaga n yugi tanpoli,

¹⁸ bi bonfuodiliba yaala n balini ki tinga po, bi jamoba yua n ye ki tinga tiipo, mi ñima nni.

¹⁹ Fangi mani yi yula, ki da ti yaadi ki diidi tanpoli, u yienu, o ŋmaalo, a ŋmabila leni tanpoli gola kuli, ki kuani yi yama nni, ke yi baa gbaani ki pugi ba. Li tie, o Diedo yi Tienu n boagidi ki puni yaa bonla ki tinga nibuoli kuli.

²⁰ Ama yinba, o Diedo taa yi ki ñani yi Ejipiti kudi buaga nni, ke yin tua yaa niba n tie o yaa yaaba, nani yin tie maama dinla.

²¹ O Diedo pali den beni n po, kelima yi yaa po. O den poli ke n kan kandi Jurden kpenu, ki kua o Diedo yi Tienu n puni yaa dieŋanma, ke man tua yi yaama yeni niinni.

²² N baa kpe yaa diema n tie ne niinni, ki naa kandi Jurden. Ama yinba, yi baa kandi Jurden, ki diedi laa dieŋanma.

²³ Fangi mani yi yula, ki da ti sundi, o Diedo yi Tienu n kuani leni yi yaa ŋantaado yeni po, ki da ti tagi yi yula po bulo, bi nannanliba, o Diedo yi Tienu n den kuani yi, yin da tieni yaala yeni siiga.

²⁴ O Diedo yi Tienu tie nani yaa mu n co yene, ki go tie li nunponli Tienu.

²⁵ Yi yaa ti baa a bila leni a yaabila yaa yogunu, ki waagi ki ye mi diema nni, yin da ti joagini yi yula, ki tagi i buli bi nannanaba. Yin da tieni yaala n ki dagidi o Diedo yi Tienu po, ke yi baa fiini o pali.

²⁶ Tanpoli leni ki tinga n tie siedinba mini leni yinba siiga dinla. Li yaa tie ke yi tieni laa tuonbiadi buolu, yi baa kpe ki bodi tontoni yin baa kandi Jurden ki diedi yaa diema yeni niinni. Yi miana kan foagidi, kelima yikuli baa bodi cain.

²⁷ O Diedo baa yadi yi i nibuoli siiga. Lanwani, yi baa yaa tie niba waamu bebe o Diedo n baa gedini yi yaa nilandiema yeni niinni.

²⁸ Lanpo yo ke yi baa kpiagi i buli, yii n tie o nisaalo n tagi yaala, ke li tie daadi, tana, yaala n kan fidi ki le, ki je, ki gbadi, bi ki gbadi nuuluba.

²⁹ Lankane, ke yi baa lingi o Diedo yi Tienu. Yi baa le o, li yaa tie ke yi lingi o leni yi yantiana kuli.

³⁰ Laa bonla kuli yaa tieni yi, ke yi ye li paboanli nni yaa yogunu, yi baa lebidi ki guani o Diedo yi Tienu kani, ki cengi o nialu.

³¹ O Diedo yi Tienu tie mi ninñingbadima Tienu, yua n kan ŋaa yi, ki kan bolini yi mo. O kan sundi wan den poli ki niani yaala yi baanba.»

Isidayeli yaaba yumanli

³² Musa den yedi Isidayeli yaaba: «Buali mani yaa dana n den pendi hali yogu, ya n den ye ke yi daa ye. Yi baa bandi, ke hali U Tienu n den tagi o nisaalo ki tinga nni yaa daali, laa bonla buolu daa kpa tieni. Naani, ki taa puoli ki yaa caa hali nintuali, yi kpa gbadi ke bi maadi li buolu maama?

³³ Naani nibuoto kpa gbadi U Tienu nialu, ke o maadi u mu nni, nani yin gbadi maama ki go baa pia miali?

³⁴ Naani li kpa baa yaa tienu n cua ki gandi u yuli po nibuolu nibuotoe siiga? Naani tiento kpa tieni biigima, sinankeene, bancianma, bonlidinkaala, jama leni paalu, nani Li Miali Diedo yi Tienu n tieni yi po maama, yi nunbu nni, Ejipiti nni?

³⁵ Yinba wani baa li yumanli ki bandi laa bonla kuli. O Diedo tieni yi po yeni, ki bua yin bandi ke Li Miali Diedo tie U Tienu, ke tiento ki ye kali wani.

³⁶ O den teni ke yi gbadi o nialu tanpoli po, ki laa o fantancianma ki tinga nni, ki gbadi o maama u mu siiga, kelima o bua ki bangi yi.

³⁷ O den bua yi baanba. Lani n teni ke bi puoli, o gandi bi puoliŋuani, ki cua wani o ba, ki ñani yi Ejipiti nni leni o paalu.

³⁸ O den deli yi nintuali yaa nibuoli n yabi ki go pia u paalu ki cie yi. O puni yi bi diema, ki teni ke yi diedi ma, ki kua mi niinni, ke mi tua yi yaama, nani lani n tie maama dinla.

³⁹ Lanwani, dinla, yin bandi ki go kubi yi pala nni, ke Li Miali Diedo n tie U Tienu tanpoli po leni ki tinga po, ke tiento kuli ki ye.

⁴⁰ Yin kubi o mabilikaama leni o ñoamabona, min teni yi yaala dinla. Yeni, yi baa ye leni li pamanli, yinba leni yi bijaba yaaba n baa ŋoadi yi yaa puoli. Yi miana mo baa foagidi o Diedo yi Tienu n puni yi yaa diema nni, yaa yogunu kuli po.»

U wuonkaanu dotaadi

⁴¹ Lanyogunu, Musa den gandi dogitaa Jurden boanjaali puoli.

⁴² Yua n kpa o yieninlielo ke li tie jalibu, ke laa tie ke o bi nani o ka, o baa fidi ki sani ki kua laa dogi siiga doyendu nni, ki faabi o miali.

⁴³ Lani n den tie i naa dogi: Beseri yuu n ye mi fanpienma nni, Rubeni buolu yaaba po, Ramoti, Galaadi diema nni, Gadi buolu yaaba po leni Golan Basan diema nni, Manase buolu yaaba po.

Musa maliema: li bali maama tiadima 4.44—11.32 Musa guani ki tiadi bi niba li bali maama

⁴⁴ Mine n tie Musa n den bili Isidayeli yaaba nintuali yaa bali maama.

⁴⁵ Ban den ñani Ejipiti yaa yogunu, Musa n den teni Isidayeli yaaba, yaa mabilikaama leni yaa ñoamabona n yeni.

⁴⁶ Lanyogunu den sua ke bi ye Jurden kandima, yaa joaloangu n tiegi leni Beti-Peyori, Amoriti yaaba bado Sihoni diema nni. Wani Sihoni yeni den ye Hesibon, ama Musa leni Isidayeli yaaba den paadi o, ban den ñani Ejipiti yaa yogunu.

⁴⁷ Bi den fie o diema leni Basan bado Ogi diema. Amoriti yaaba badiliediba yeni kuli den ye Jurden kandima, u yienu n pudi naanpo.

⁴⁸ Isidayeli yaaba den diedi yaa diema n den cili Aroyeeri, Arinoni kpenu boanjaali po, ki taa ki yaa caa hali Siyon juali yaali n go tie Hermon juali.

⁴⁹ Li go taa yene ki cili yaa diema n ye Jurden joaloangu nni, ki goa puoli, ki taa ki yaa caa hali Araba ñincianma po, yaama n ye Pisiga juali jiidima tiipo.