Mi Tiadima 3 - U TIENU MAAMA TILI 2013

Isidayeli yaaba diedi Basan bado Ogi diema

¹ Musa den pugini ki yedi: «Ti den fii ki taa Basan sanu. Basan bado Ogi leni o niba kuli den ñani ki tuogi ti bu toabu Edreyi dogu nni.»

² O Diedo den yedi nni: «Ŋan da jie o kelima n taa wani, o niba leni o diema kuli ki tieni a nuu nni. Ŋan soani o nani ŋan soani Amoriti yaaba bado Sihoni, yua n den ye Hesibon maama yeni.»

³ O Diedo ti Tienu go den taa Ogi, Basan bado leni o niba kuli ki mubini ti. Ti den pua ki paadi ba, ki bolini ba, ki naa ŋaa o niba siiga ke ba niyendo cia.

⁴ Lanyogunu po, ti den fie o dogi kuli. Laa den pia ba doyendu, yuu ke tii den fie u. Ogi, Basan bado diema nni kuli, tin den fie yaa dogi den tie dogi piiluoba, yii n ye Arigobi diema nni.

⁵ Bi den maa yaa bilini n kpedi ki den lindi laa dogi kuli, ki ban pia ti buliñoaluoditi leni mu sendabimu. Yaa dogi n ki den pia bilini moko, den yabi hali boncianla.

⁶ Ti den bolini laa dogi kuli, nani tin den soani Sihoni Hesibon bado maama yeni. Ti den bolini i dogi kuli, bi jaba, bi puoba leni a bila kuli.

⁷ Ama ti den fagi ti yucela po, i dogi yandi leni i piama kuli.

Galaadi diema boagidima

⁸ Lanyogunu, li den tieni yene ke ti den fie Amoriti badiliediba kani, yaa diema n ye Jurden boanjaali, ki cili Arinoni kpenu, ki taa ki ban pundi hali Hermon juali kani.

⁹ Sidon yaaba den yi Hermon yene “Siriyon,” Amoriti yaaba mo n yaa yi Hermon “Seniri.”

¹⁰ Ti den fie Jurden duoli dogi kuli, Galaadi leni Basan, ki taa ki ban pundi hali Salika leni Edreyi, Basan bado Ogi dogi.

¹¹ Basan bado bebe n tie yua n den sieni Refayimi yaaba siiga. O duanu den tie kudi duanu, yuu n ye Anmoni yaaba dociamu Raba nni. U foaginu den tie nukpanduna yia, u pianu mo nukpanduna naa, joa yaa nukpanduna.

¹² Lanyogunu yo, ke ti den diedi laa diema. N den puni Rubeni buolu leni Gadi buolu yo mi diema yeni, ki cili Aroyeeri, Arinoni kpenu leni Galaadi juali boagidima leni li dogi.

¹³ N den puni Manase buolu, yuu n tie buolu boagidima, yaala n den sieni Galaadi nni leni Basan bado Ogi diema kuli. Arigobi dobila kuli leni Basan kuli n tie ban den yi naani Refayimi diema.

¹⁴ Manase bijua Yayiiri n den taa Arigobi diema kuli, ki yaa caa hali Gesuri leni Maakati yaaba tinbianu. O go den teni o yeli Basan, ke bi ji yi likani, Yayiiri dobila.

¹⁵ N den taa Galaadi diema ki puni Makiri.

¹⁶ N den puni Rubeni buolu leni Gadi buolu mo, Galaadi diema poyendu. Arinoni kpenu n den tie bi bianu, Yaboki kpenu mo n den tie, bani leni Anmoni yaaba bianu

¹⁷ leni Araba moko. Jurden n den tie u tinbianu, ki cili Kinereti, ki yaa caa hali Araba ñincianma, mi Ñincianyaama yaama n ye, Pisiga juali jiidima, ki goa puoli po.

¹⁸ Lanyogunu yo, ke n den teni yi li naa ñoamabonli: «O Diedo yi Tienu taa laa diema ki teni yi ke yin diedi ma. Yinba a jakoanda kuli, yin bobi yi jatiadi ki cua ki tagini yi kpiiba Isidayeli yaaba nintuali.

¹⁹ Yi puoba, yi biwaala leni yi yandi bebe n baa sedi min puni yi yaa dogi yeni niinni, kelima n bani ke yi pia ti yandi boncianla.

²⁰ Yin todi mani yi kpiiba, hali o Diedo n pa ba ban kali bonŋanla, nani yinba yeni, ke bani moko n diedi o Diedo yi Tienu n puni ba yaa diema, Jurden kandima yeni. Lani yaa pendi, yi siiga yendo yendo kuli, baa fidi ki lebidi ki guani min puni o yaa tinga yeni niinni.»

²¹ Lanyogunu, n den teni Josue a naa ñoamabona ki yedi: «A nuni laa o Diedo yi Tienu n tieni laa badiliediba yaala. O Diedo baa tieni yene, ŋan baa tagini yaa diema nni kuli.

²² Yin da jie ba mani, kelima o Diedo yi Tienu wani o ba n baa koani yi po.»

Musa kan kua Kanana diema nni

²³ Lanyogunu, n den jaandi ki mia o Diedo ki yedi:

²⁴ «O Diedo U Tienu, a cili ki waani a naacemo a nuu paalu leni ŋan yabi maama, kelima u laa tienu n ye tanpoli leni ki tinga nni, ki baa fidi ki togidi ŋan tieni yaa tuona leni a bancianma?

²⁵ N miadi a, ŋan tieni sugili ki li pa nni u sanu, min baa ki le yaa dieŋanma n ye Jurden kpenu kandima. Tuo mini mo n li le li joaŋama leni Liban diema.»

²⁶ Ama o Diedo pali den beni n po, kelima yi po. Waa den cengi nni. O Diedo den yedi nni: «Li dagidi, da go maadi nni laa maama!

²⁷ Do Pisiga juali po, ki taa a nunjoma ki teli puoli, nintuali, nuganu leni nujienu po kuli, ki ñuadi bonŋanla, kelima a kan kandi Jurden kpenu ne.

²⁸ Teni Josue a ñoamabona. Paagi o pali, ki cuo ki sieni o gbanu, kelima wani n baa kua bi naa niba liiga, ki teni ban je ŋan baa le yaa diema yeni faali.»

²⁹ Lanyogunu, li sua ke ti kaa ku joaloangu nni, yaagu n tiegi leni Beti-Peyori.