Mi Tiadima 2 - U TIENU MAAMA TILI 2013

¹ Ti den lebidi ki ŋoadi mi Ñincianmoanma sanu ki gedi mi fanpienma nni, nani o Diedo n den yedi nni maama. Ti den taa u yogunu boncianla ki baa lagidi Seyiiri juali.

Isidayeli yaaba poandi Edomi, Moabi leni Anmoni diema nni

² O Diedo den yedi nni:

³ «Li waagi boncianla ke yi kaagi ki lindi li naa juali. Lebidi mani ki teli nujienu po!

⁴ Teni ku niligu yeni li naa ñoamabonli: ‹Yi baa balini ki tagini yi kpiiba Esayu bijaba yaa tinbianu, yaaba n ye Seyiiri. Bi baa jie yi, ama yin bogini ki guudi mani!

⁵ Yin da ña ke yi baa tuogi leni ba bu toabu, kelima mii puni yi baa yin baa ciini yi taana naankani mi diema nni. Li tie ke n den boagidi ki puni Esayu yo, Seyiiri juali.

⁶ Yi baa daa bi kani leni yi ligi, ba yin baa je yaa jiema. Yi baa daa bi kani leni yi ligi, ba yin baa ño yaa ñima.›

⁷ Moamoani de, o Diedo yi Tienu seligi yi nii tuona kuli, ki bandi yi cenli laa fanpiencianma nni. Diidi bina piinaa, ke o Diedo yi Tienu ye leni yi. Yi naa luo liba kuli.

⁸ Tin den tagini naani, den foagi leni ti kpiiba Esayu bijaba yaaba n ye Seyiiri juali po, ki go foagi leni yaa sanu n tagini ki ña Araba, Elati leni Etisiyoni-Gebeli. Li yaa puoli, ti den pegidi ki tagini yaa sanu n caa Moabi fanpienma po.

⁹ O Diedo den yedi nni: ‹Ŋan da baa Moabi yaaba, ki nan da bogini ke a baa tieni ba bu toabu. Mii puni a ŋan diedi kaanuba kuli bi diema nni. N puni Loti bijaba yo n diedi Ali diema.›

¹⁰ Emiti yaaba den cili ki ye lankane hali yogu. Bi den tie yaa nibuolu n pia u paalu ki yabi, ki go tie yaa niba n kpedi boncianla, nani Anaki buolu yeni.

¹¹ Bi den nua ba nani Refayimi yaaba leni Anaki yaaba yeni. Moabi yaaba den yi ba Emiti buolu.

¹² Horiti buolu mo n den cili ki ye Seyiiri diema nni. Esayu bijaba den cua ki pua ki paadi ba ki bolini ba, ki kali bi kaanu, nani Isidayeli yaaba n den tieni maama ki kali ki diedi o Diedo n den puni ba yaa diema nni yeni.»

¹³ O Diedo den teni ti li naa ñoamabonli: «Moala, yin fii mani ki kandi Seledi kpenu.» Lani, ti den fii ki kandi.

¹⁴ Tin den ñani Kadesi-Barneya, ti den puagi piitaa n binanii yo, ki fidi ki kandi Seledi kpenu. Laa puagidi nne, ke yaa jaba n den baa fidi ki gedi toabu, ki tie laa nifiima kuli den bodi, nani o Diedo n den poli ki yedi ba maama.

¹⁵ O Diedo nuu den maa bi po, ki bolini bikuli li nagili nni.

¹⁶ Mi kuuma n den dini yaaba n den baa fidi ki gedi toabu laa niba siiga kuli ki gbeni yaa yogunu,

¹⁷ o Diedo den maadi leni nni ki yedi:

¹⁸ «Dinla, ŋan tagini ki ña Moabi tinbianu, ki pundi Ali tinbianu, ki nagini Anmoni yaaba.

¹⁹ Ŋan da baa ba, ŋan da fii ke a baa tieni leni ba bu toabu, kelima mii puni a ŋan diedi kaanuba kuli Anmoni yaaba diema nni. N puni Loti bijaba yo n diedi Anmoni diema.»

²⁰ Bi go den nua ke laa kaanu moko tie Refayimi dieme. Refayimi yaaba n den kaa likani hali yogu, ke Anmoni yaaba den yi ba Samisumiti buolu.

²¹ Bi den tie yaa nibuolu n pia u paalu, ki yabi ki go kpedi boncianla nani Anaki yaaba yeni. O Diedo den bolini ba Anmoni yaaba nintuali, ki teni ke bi fie bi tinga ki kali bi kaanu.

²² Lani n tie o Diedo n den tieni yaala Esayu bijaba po, yaaba n den ye Seyiiri diema nni. O den bolini Horiti yaaba bi nintuali. Bi den fie ki diedi bi tinga ki kali bi kaanu, ki taa ki ti pundi hali dinla.

²³ Kafitori yaaba, yaaba n den ñani Kafitori diema nni, n den bolini Afi yaaba, bani yaaba n den ye li dobila, ki taa ki ti pundi hali Gasa dogu, ki mo kali bi yaa kaanu.

²⁴ O Diedo go den yedi nni: «Fii mani ki kandi Arinoni joaloangu! Diidi, n teni yi Amoriti yaaba bado Sihoni yua n ye Hesibon leni o diema kuli yi nuu nni. Moala, yin diedi ma ki taa ma. Fii mani ki bogini ki baa o bu toabu!

²⁵ Dinla, n baa teni ki tinga nibuoli kuli n yaa ye leni i jeje leni ti jawaanciandi kelima yi po. Bi yaa li gbadi yi yeli ñama laabaalo, bi baa yaa digibi, li paboanli mo n cuo ba.»

Isidayeli yaaba diedi Sihoni diema

²⁶ Tin den ye Kedemoti fanpienma nni, n den soani a tonda Sihoni, Hesibon bado kani leni mi yanduanma maama, ki yedi:

²⁷ «N bua ki poandi a diema nni. N li baa tagi u sanu ki kan jadi ganu bi jienu.

²⁸ Min baa je a kani yaa jiema kuli, ŋan teni min pa mi ligi. Min go baa ño yaa ñima mo kuli, ŋan teni min pa mi ligi. N baa yaa cuoni bebe yo ki pendi.

²⁹ Lani n tie Esayu bijaba yaaba n ye Seyiiri diema nni leni Moabi yaaba, yaaba n ye Ali n den puni nni yaa sanu. Amoko n pa nni li sanu, hali min poandi Jurden ki kua o Diedo ti Tienu n puni ti yaa diema nni.»

³⁰ Ama Sihoni Hesibon bado, naa den bua ki tuo tin tagini o diema nni, kelima o Diedo yi Tienu n teni ke o yantiali paagi, ki juagi o pali mo, ki ŋaa o yi nuu nni, nani yin nua maama dinla yeni.

³¹ O Diedo den yedi nni: «Diidi, moala n baa teni a Sihoni leni o diema. Moala, ŋan taa o diema ki diedi ma.»

³² Sihoni leni o niba kuli den ñani ke bi baa tuogi ti bu toabu Yahatisi kani.

³³ O Diedo ti Tienu den taa o ki teni ti, ke ti den pua ki paadi wani, o bijaba leni o niba kuli.

³⁴ Lanyogunu yo, ke ti den taa o dogi kuli ki kpa li niba kuli, bi jaba, bi puoba leni a bila kuli, ki naa ŋaa ke ba niyendo cia.

³⁵ Tin den fagi yaala ti yula po bebe den tie ti yandi leni tin den fie yaa dogi yaa fagidi.

³⁶ Ki cili Aroyeeri, Arinoni kpenu boanjaali po leni yaa dogu n ye ku joaloangu nni, ki yaa caa hali Galaadi, laa den baa tin ki den fidi ki paadi yaa dogu. O Diedo ti Tienu den taa ikuli ki teni ti.

³⁷ Ama ti naa den nagini Anmoni bijaba diema, Yaboki kpenu kani, a juana dogi bi leni o Diedo ti Tienu n den kuani ti yaala kuli.