Mi Tiadima 1 - U TIENU MAAMA TILI 2013

Musa macilikaama: Isidayeli yaaba yema tiadima 1.1—4.43

¹ Diidi Musa n den maadi leni Isidayeli yaaba kuli yaa maama, Jurden boanjaali po, mi fanpienma nni Araba tialu nni. Laa tialu tiegi Sufi ki ye Paran, Tofeli, Laban, Hatiseloti leni Di-Sahaba siiga.

² A yaa ñani Horebi, ki baa tagini yaa sanu n ña Seyiiri juana po, ki ban pundi Kadesi-Barneya, li tie piiga n dayenli cenle.

³ Li binpiinaadili, piiga n cilo dakpiali, Musa den waani Isidayeli yaaba, o Diedo n den puogi o wan yedi ba yaa maama kuli.

⁴ Musa n den paadi Sihoni, Amoriti yaaba bado, yua n den ye Hesibon dogu nni leni Ogi, Basan bado, yua mo n den ye Asitaroti leni Edreyi ke li pende, ke laa bonla den tieni.

⁵ Jurden boanjaalieli po, Moabi yaaba diema nni, Musa den cili ki bundi li bali maama ki yedi:

⁶ «O Diedo ti Tienu den maadi ti Horebi juali kani ki yedi: ‹Yi waagi boncianla li naa juali kani.

⁷ Moala, fii mani ki tagini ki gedi ki kua, Amoriti yaaba juana nni leni a lindima kuli, Araba nni, a juana po, Sefela tialu nni, nuganu po, mi ñincianma jaali po, Kanana yaaba diema nni Liban po, ki yaa caa hali u kpenciamu Efrati po.

⁸ Diidi mani, n bili mi diema yi nintuali. Gedi mani ki taa min den poli ke o baa pa yi yaajanba Abalahama, Isaaka Jakob leni bi puoliŋuani yaama yeni.› »

Musa dini bi bujiaba

⁹ Lanyogunu yo, ke n den maadi leni yi yaa maama n tie ne: «N kan fidi ki tugi yi mini nbebe.

¹⁰ O Diedo yi Tienu teni ke yi yabidi nani tanpoli ŋmabila yeni.

¹¹ O Diedo yi yaajanba Tienu n teni yin go yabidi yeni hali taalima tudili, ki go seligi yi mo nani wan yedi maama.

¹² Mini nbebe, n baa fidi ki tugi yi yiema leni yi koankoana kuli tugili lede?

¹³ Lanwani, gandi mani yaa jaba n pia mi yama leni mi yanfuoma yi buoli siiga, ban bani yaaba bonŋanla, n baa tuni ba yi yuli.»

¹⁴ Yi den guani nni ki yedi: «Ŋan jagi ke a baa tieni yaala yeni, tie yaa bonla n ŋani.»

¹⁵ Lanwani, n den taa yaaba n tugi yi buoli yuli, yaa jaba n den pia mi yama ke bi go bani ba bonŋanla. N den teni ke bi tua niba tudili tudili, niba kobiga kobiga, niba piimuu muu leni niba piigapiiga yudanba. N go den puogi tianba li tidianli tuonli yi siiga.

¹⁶ Li yogunu po, n den teni yi bujiaba li naa ñoamabonli: «Cengi mani yi kpiiba, ki nan jia ti buudi yuakuli po leni wan pia yaa maama leni o kpiilo bi leni o caano.

¹⁷ Yi bujiali nni, yin da pia gagidimiba kuli. Yin da jie niloba kuli kelima U Tienu n die li bujiali. Lanwani, li yaa tie ke buudiba jiama pa yi po hali boncianla, yi baa cuani ti n yaa kane, min gbadi ti.»

¹⁸ Lanyogunu po, min den bili ke yi baa yaa tiendi yaala kuli n yeni.

Isidayeli yaaba yiema Kadesi kani

¹⁹ Ti den ñani Horebi ki poandi yin den laa mi fanpienma yaama n yabi, ki go foagi yeni niinni kuli. Ti den taa yaa sanu n caa Amoriti yaaba juali po, nani o Diedo ti Tienu n den bili ti po maama. Ti den ban pundi Kadesi-Barneya.

²⁰ N den yedi yi: «Yi pundi Amoriti yaaba juali kani, o Diedo n den puni yi yaali yeni.

²¹ Diidi mani, o Diedo yi Tienu bili mi diema yeni yi nintuali. Gedi mani ki ban diedi ma, nani o Diedo yi yaajanba Tienu n den yedi maama. Yin da jie mani, yi gbani mo n da jeli.»

²² Yikuli den cua n kani ki yedi nni: «Tin soani bi niba ti liiga, ban gedi ki ban diidi mi diema yeni, ki waani ti tin baa tagini yaa sanu ki pundi mi dogi nni.»

²³ N den sua ke laa yantiali ŋani. N den taa yi siiga piiga n jabilie, buolu kuli nni niyendo.

²⁴ Bi den tagini ki doni li juali po, ki pundi hali Ekoli joaloangu nni, ki diidi diidi mi diema.

²⁵ Bi den cie mi diema yeni niinni bonluonkaala ki cuani ki waani ti. Bi den yedi ti: «O Diedo ti Tienu n puni ti yaa diema yeni tie yaa diema n ŋani bonŋanla.»

²⁶ Ama yin ki den bua ki gedi mi niinni yeni, yi den tua niyiekaaba o Diedo yi Tienu ñoamabonli po.

²⁷ Yi den yenbidi yi gbandiena nni ki tua: «O Diedo pia ti po ki nanga, lani n teni ke o den ñani ti Ejipiti diema nni, ki ti ŋaa ti Amoriti yaaba nuu nni, ke ban bolini ti.

²⁸ Ti baa gedi le? Ti kpiiba den teni ke tikuli gbani wudi ban den waani ti, ke bi tie yaa nibuolu yaa niba n yabi, ki go kpedi ki cie ti. Li tie yaa dogi n yabi, ke bi go maa yaa bilini n kpedi boncianla ki lindi yi. Ti den laa ba Anaki bijaba mi diema yeni niinni.»

²⁹ N den yedi yi: «Yi tugusoama n da sani mani! Yin da jie ba mo!

³⁰ O Diedo yi Tienu yua n ye yi liiga yeni, baa koani yi po, nani wan den tieni yi po maama Ejipiti nni.

³¹ Yi den laa mi fanpienma nni, o Diedo yi Tienu den tiebi yi maama, nani o joa n tiebi o bijua maama yeni, yin den tagi yaa sanu kuli nni, hali yi pundima nekanba.»

³² Laa bonla yaa niinni, yi naa den dugi o Diedo yi Tienu po,

³³ wani yua n den ye yi liiga ki lingi yi po yin baa sedi ki fuodi naankani. Ku ñiagu, yaa tawaligu n co yen yendi yi sanu li cenli po, u yensiinu mo, ku tawaligu n libini yi po.

³⁴ O Diedo den gbadi yi macianma. O pabienli nni, o den poli ki yedi mine:

³⁵ «N poli ke mi naa nifiibiadima siiga, niloba kuli kan le min niani ke n baa pa yi baanba yaa dieŋanma yeni,

³⁶ li yàá tie Yefune bijua Kalebi yaa ka. Wani, o baa le ma. N go baa pa wani leni o bijaba, wan ŋmaa yaa diema nni yeni, kelima o den ŋoadi mini o Diedo sanu hali bonŋanla.»

³⁷ O Diedo pali den beni mini moko yaa po, kelima yinba yaa po. O den yedi: «Fini moko, a kan kua mi diema yeni niinni.

³⁸ Nun bijua Josue, a todika yeni, wani n baa kua mi niinni. Paagi o gbanu, kelima wani n baa teni Isidayeli yaaba n baa ki je laa diema faali.»

³⁹ Lani, o Diedo den pugini ki yedi yikuli: «Yi yaabila, yin den maliti ke yaaba n baa tua fagidi, yi bijaba, dinla yaaba n ki bani yaala n ŋani bi yaala n ki ŋani yeni, bani n baa kua mi niinni. N taa ma ki puni bane. Li tie bani n baa gedi ki diedi ma.

⁴⁰ Ama yinba wani, lebidi mani ki kua mi fanpienma nni, ki teli mi ñincianma po.»

⁴¹ Lanwani, yi den guani ki yedi nni: «Ti tieni ti tuonbiadi o Diedo po. Ti baa gedi ki ban koani nani o Diedo ti Tienu n puogi ti maama.» Yi siiga yuakuli den taa o jatiagu ki tieni o gbanñagidigu kani, ki tama ke li juali fiema baa yaa tie faala yo.

⁴² Lane o Diedo den yedi nni ke min yedi ba: «Da do ki gedi mani, da koani mani mo, kelima mii ye yi siiga. Lani, yi yibalinba kan deli yi.»

⁴³ N den maadi leni yi, ama yi naa den bua ki cengi. Yi den tua niyiekaaba o Diedo ñoamabonli po. Yi den fii ki gedi leni mi jama ki doni li juali po.

⁴⁴ Amoriti yaaba, yaaba n ye laa juali po den ñani ki tuogi yi ki deli yi nani i naakpansii yeni. Bi den paadi yi, ki cili Seyiiri, ki yaa caa hali Horima.

⁴⁵ Yin den lebidi ki guani, yi den buudi o Diedo kani, ama waa den cengi yi.

⁴⁶ Yi go den sedi Kadesi yeni ke li waagi nani yin den kpa tieni likani yaa dana banlu.