Mi Kpanjama 9 - U TIENU MAAMA TILI 2013

Mi yanfuoma yi bi niba mi jiema po

¹ Mi yanfuoma maa mi dieli, Ki sieni benjielilele,

² Ki kodi ti yandi, Ki ŋanbi mi daama, Ki ŋanbi u saajekaanu.

³ Mi soani mi puotuada Ban ban sedi yaa juana n yiini u dogu po, Ki kpaani ki yedi:

⁴ «Yua yaa yama n pii n jadi ki cua ne.» Ki yedi yaaba n luo mi yama mo:

⁵ «Cua mani ki je n jiema, Ki ño min ŋanbi yi po yaa daama.

⁶ Ña mani mi yanpiima nni, Ki ŋoadi mani mi yanfuoma sanu, Yeni yi baa yaa ye.»

O yanfuodaano leni o japaadaano

⁷ Yua n jaligidi japaadaano lingi o yuli po falige, Yua n tundi o nibiado mo baa le u nisugidu.

⁸ Ŋan da tundi o japaadaano, Kelima o baa nani a. Ŋan tundi o yanfuodaano, o baa bua ŋa.

⁹ Ŋan waani o yanfuodaano yaala n baa pugini o yanfuoma, Ŋan bangi o niteginka yaala baa pugini o banma.

¹⁰ O Diedo fangili n tie mi yanfuoma cilima, Ki bandi yaala n gagidi ki ŋani mo puuni mi yanfuoma.

¹¹ Mini mi yanfuoma, n baa pugini a dana, N baa foagidi a miali.

¹² A yaa tie yanfuodaano, A tie o a yuli po yo, A yaa tie japaadaano mo, fini n baa le fala.

¹³ Mi yanluoma tie nani o puomamaado yene, O yama pii, waa bani liba mo.

¹⁴ O yen kali o dieli buliñoabu kani, Bi, u dogu nni yaa kaani n kpedi po.

¹⁵ O kaa lankani ki tangi ki maadi leni bi santagiba Yaaba n cuoni kaa fiili o po ki tua ba:

¹⁶ «Yua yaa yama n pii n jadi ki cua ne.» Ki yedi yua n luo mi yama mo:

¹⁷ «Ban suni yaa ñima n mani, Li kuali jiema mo n mani ki cie.»

¹⁸ Bi naa bani ke mi kuuma ye lipo, Ke wan yini yaaba peli ki kua bi tinkpiba diema nno.