Mi Kpanjama 3 - U TIENU MAAMA TILI 2013

Mi yanfuoma leni li fangili U Tienu po

¹ N bijua, ŋan da sundi min bangi a yaala, Ŋan kubi n ñoamabonbilikaana,

² Kelima li baa foagidi a miali Leni a yemanma dana.

³ Ŋan da ŋaa mi buama leni mi teginma, Ki la laa bonliedila a tulu nni, Ki bili la a pali nni.

⁴ A yaa kubi laa bonla, U Tienu leni bi niba pala baa yaa mani a po, Fini leni bani baa yaa mani.

⁵ Bili a dugidi kuli o Diedo kani, Ki da dugi a yanfuoma po ka.

⁶ Dugi o Diedo po, Ŋan baa tieni yaala kuli nni, O baa pendi a sanu.

⁷ Da yini a yuli yanfuodaano, Ki yaa fangi o Diedo, Ki foagidi leni mi biadima.

⁸ Lanwani, li baa faabi a leni ti yanyagidi, Ki dingi a fala.

⁹ Ŋan kpiagi o Diedo leni a bonpiakaala, Ki pa o a kpaandi bonluonkakpiala.

¹⁰ A yaa tiendi yeni, a buabuana baa gbie bonŋanla, A daboba baa gbie leni duven hali ki landi landi.

¹¹ N bijua, o Diedo yaa tundi a tundifala, Ŋan da fali o tundi. O yaa funi leni a, lan da biidi a pali.

¹² O Diedo tundi wan bua yua fala nne, Nani o jamado n tundi o bibuadiga maama yeni.

Mi yanfuoma leni mi yemanma

¹³ Li pamanli ye leni yaa nilo n baa mi yanfuoma, Ki baa ki tua yanfuodaano.

¹⁴ Mi ñuadi cie ŋanjilifa, Mi bonbaakaala cie wula.

¹⁵ Mi pia ti kpiagidi ki cie u lanmoanu. Bi niba n fidi ki kuani bi yama yaala yaa niinni kuli, Liba ki pia fuoma ki pundi ma.

¹⁶ Mi yanfuoma kubi li miafoagili mi jienu, Mi ganu mo kubi ŋalimani leni ti kpiagidi.

¹⁷ Mi sani ŋani cain, I taginma mo pia mi yanduanma.

¹⁸ Mi yanfuoma tie miali tibue yaaba n baa ma po, Ki tie yemanma yaaba n pia ma kuli po.

¹⁹ O Diedo tagi ki tinga leni mi yanfuome, Ki go tagi tanpoli mo leni mani.

²⁰ O yaa banma po yo, Ke ki tinga kuli kuli den pudi mi ñima, Ke ti tawadi mo tua taaga ki mi.

U Tienu kubi o yanfuodaano

²¹ N bijua, ŋan kubi mi yanfuoma leni li kpaagili bonŋanla, Ki da tuo lan foagidi a kani.

²² Li baa cuani a po li miamoanli leni mi yemanma.

²³ Lanwani, a baa yaa cuoni ke a jigi co, Liba mo kan kadi ki lu ŋa.

²⁴ A yaa duani, jawaandi kan cuo ŋa, A yaa dua, a guama baa yaa mani.

²⁵ Ŋan da jie bonludikabiadila, Bi, nibiadiba yaa cua ki baa ŋa.

²⁶ O Diedo baa kubi a, Ki ñani bontuudikaala kuli a sanu nni.

Ŋan bua a lielo

²⁷ Ŋan yaa pia u fidu, Ŋan da yie ke a kan todi yua n luo.

²⁸ A lielo yaa bua bonla ke a pia la, Ŋan da yedi o: «Kuni ki nan faa ki cua ne, n baa teni a.»

²⁹ A lielo yaa ye leni a ke o yama dua, Ŋan da jagi ke a baa tieni o yaala n bia.

³⁰ Ŋan da koani leni nilo fanma fanma po, O yàá tieni a liba.

³¹ Nunponli n da cuo ŋa o nibiado po. Ŋan da togidi o tagu mo.

³² O Diedo nani bi nibiadiba, Ama o danli leni bi niteginkaaba.

³³ O Diedo solindi ye bi nibiadiba diedi po, Ama o seligidi bi niteginkaaba yaa diedi.

³⁴ O ñuadi a ñuañuada, Ama o puuni li yumiinli danba o ŋanbili.

³⁵ Ti kpiagidi n tie bi yanfuodanba biinu, Ama bi yanluodanba wani yaa biinu tie i fe yo.