Mi Kpanjama 2 - U TIENU MAAMA TILI 2013

Mi yanfuoma faabidi o nilo

¹ N bijua, a yaa gaa n maama, Ki kubi n ñoamabonbilikaana,

² A yaa diadi a tuba ki cengi n yanfuoma, Ki kpaagi a pali nni bonŋanla,

³ A yaa kpaani ki yini mi yanfuoma, Ki kpedi a nialu ki mia ma,

⁴ A yaa lingi ma nani ŋanjilifa yeni, Ki bua ki baa ma nani ŋalimani yeni,

⁵ Lani, a baa bandi o Diedo fangili, A baa baa ki bandi U Tienu.

⁶ O Diedo n puuni mi yanfuoma, Mi banma leni li kpaagili ña o yaa kane.

⁷ O bili o todima bi niteginkaaba po yo. O tie nani li gbankoandigu yeni yaaba N cuoni leni li papienli po.

⁸ O kubi yua n cuoni Mi teginma sanu nni, O kubi o nidugikaaba.

⁹ Lani, a baa bandi mi teginma leni yaala n dagidi, Yaala n tiegi leni yaala n kpendinni mi yemanma kuli.

¹⁰ Mi yanfuoma baa yaa ye a niinni, Mi banma baa pa ŋa li pamanli.

¹¹ Li kpaagili baa yaa guu ŋa, Mi yanfuoma mo baa yaa kubi a.

¹² Lani kuli baa yaa guu ŋa leni mi biadima, Ki faabidi a leni o lantondaano,

¹³ Ki kubi a yaaba n ŋaani mi teginma sani, Ki cuoni yaa sani n biigi niinni.

¹⁴ Bi mangidi bi pala leni ti tuonbiadi tienma, Ki kuani bi yama mi biadima nni.

¹⁵ Bi ŋua yaa sani n goli, Ki wuondi bi bontienkaala.

¹⁶ Yeni a baa faabi leni o cancaginpua, O nilanpua yua n pia ti mamandi,

¹⁷ Wani yua n ŋaa o cakpelo Ki miidi U Tienu n bili yaa ŋantaado.

¹⁸ O diegu diandi ki caa mi kuuma po, O sanu mo caani bi tinkpiba diema nni.

¹⁹ Yua n gedi o po kuli kan go guani, O kan go le li miali sanu mo.

²⁰ Fini, ŋan yaa ŋua bi niŋanba taafuuli, Ki yaa togidi bi niteginkaaba tagu,

²¹ Kelima yaa niba n tiendi yaala N dagidi baa yaa ye mi diema nni. Bi papiendanba baa yaa ye mi niinni.

²² Ama bi baa ñani bi nibiadiba mi diema nni, Bi baa deli ki ñani i janbi danba lienni.