Mi Doagidima 3 - U TIENU MAAMA TILI 2013

Saridi Nitaanli po

¹ Ŋan diani Kilisiti Nitaanli yaali n ye Saridi yaa maleki po, ki yedi o: «Yua n pia U Tienu fuoleleedima leni a ŋmabileleeda, yedi yaala n tie ne: ‹N bani a tuona. A yeli ñani ke a fo, ama a kpe.

² Ŋan yaa guu bonŋanla, ki paagi yaala n sieni ki bua ki kpe, kelima n sua ke a tuona naa ŋani ki dagidi cain n Tienu po.

³ Ŋan tiadi ŋan den baa ki go gbadi yaa bangima, ki kubi ma, ki lebidi a yama. A yàá guu bonŋanla, n baa cua a kani nani o suudo yeni, a kan bandi min baa cua ki ludi a yaa yogunu.

⁴ Ba yeni a pia bi niba waamu Saridi, yaaba n kaa joagini bi tiadi. Bi baa yie ti tiapiendi ki yegi leni nni, kelima bi pundi ki baa la.

⁵ Yua n koani mi jama ki paadi, bi baa yieni o ti tiapiendi. N kan duuni ki ñani o yeli li miali tili nni, ama n baa tuo ke n bani o n Baa leni o malekinba nintuali.

⁶ Yua n pia a tuba, wan cengi mi Fuoma n tua Kilisiti Nitaana yaala.› »

Filadelifi Nitaanli po

⁷ Ŋan diani Kilisiti Nitaanli yaali n ye Filadelifi yaa maleki po, ki yedi o: «Yua n Gagidi ki Ŋani, Ki tie o Moamoandaano, Wani yua n kubi Davidi sendabiga, O yaa luodi, oba kuli kan luoni, O yaa luoni mo, oba kuli kan luodi, Wani n yedi yaa maama n tie ne:

⁸ ‹N bani a tuona. Diidi, n luodi ki yaani a po bu buliñoabu, niloba n kan luoni yaabu, kelima a pia u paalu waamu bebe. Ama ba yeni, a kubi n maama ki naa nia n yeli.

⁹ Diidi, yaaba n tie Sutaani nitaanli yaaba, ki pua faama ke bi tie Jufinba ki naa tie yeni, n baa teni ban cua ki gbaani a nintuali, ki bandi ke n bua ŋa.

¹⁰ Nani ŋan den pia li juunli ki go kubi n maama yeni, nmoko baa kubi a mi biigima yogunu, yaama n baa ti cua ŋanduna niba kuli po.

¹¹ N baa cua, li kan waagi. Ŋan yaa kubi ŋan pia yaala kankani ke oba kuli n da fie a badifogiliga.

¹² Yua n koani mi jama ki paadi kuli, n baa teni wan tua benjielu n Tienu diegu nni, ki kan go ña lienni. N go baa diani o po n Tienu yeli leni n Tienu dogu yeli, lani n tie Jerusalemi-paano, yuu n baa ña tanpoli po n Tienu kani ki jiidi. N go baa diani o po n yepanli.

¹³ Yua n pia a tuba, wan cengi mi Fuoma n tua Kilisiti Nitaana yaala.› »

Laodise Nitaanli po

¹⁴ Ŋan diani Kilisiti Nitaanli yaali n ye Laodise yaa maleki po, ki yedi o: «Diidi yua n tie Amina, wani o siedidugika leni o moamoandaano, yua n tie U Tienu tagima kuli cilika, wani n yedi yaala n tie ne:

¹⁵ ‹N bani a tuona. Ŋaa soangi, ŋaa tuoni mo. Li baa yaa ŋani ki cie a po, a yaa bi soangi, bi a yaa bi tuoni.

¹⁶ Yeni yaa po, nani ŋan tie yaala n baligi, kaa tuoni, kaa soangi mo yeni, n baa sii ŋa ki ñani a n ñoabu nni.›

¹⁷ A tua: ‹N tie piado ki pia ke li dagidi ki naa luo puu.› Ama ŋaa bani ke a tie fala daano, ninñinnilo, luodo, juamo, ki go ye mubima.

¹⁸ Lani yaa po, n tundi a ke ŋan da n kani ban ŋanbi yaa wula u maafanu nni, ki tua piado, ki go da n kani ti tiapiendi ki yaa yie ban da go le a mubima fe, ki go da n kani u nunñoagu ki duo a nuni ki yaa nua.

¹⁹ Mini, n fu ki go tundi min bua yaaba leni tundifala. Lanwani, ŋan go baa li yankuali ki pugini, ki lebidi a yama.

²⁰ Diidi, n se bu buliñoabu kani ki tua: Gafala! O nilo yaa gbadi n nialu ki luodi n po bu buliñoabu kuli, n baa kua o deni ki je leni o, omo n je leni nni.

²¹ Yua n koani mi jama ki paadi, n baa teni wan yaa ka leni nni n bali kalikaanu, nani mini n ba n den koani mi jama ki paadi, ki kaa leni n Baa o bali kalikaanu po maama yeni.

²² Yua n pia a tuba, wan cengi mi Fuoma n tua Kilisiti Nitaana yaala.»