Mi Coadima 7 - U TIENU MAAMA TILI 2013

Ban puni yaa teliti li gbandieli tuonli po

¹ Musa n den tieni ki gbeni li gbandieli yaa daali, o den wuli lini leni li tiadi po kuli mi gagidima kpama, ki gagidi li. Li yaa puoli, o den wuli li padibinbinli leni li tiabidi bidi po, ki gagidi li.

² Lanwani, Isidayeli yudanba, bi buoli yudanba yaaba n den gobidi li coali yeni, den cuani bi paabu.

³ Bi den cuani bi paabu o Diedo nintuali ke li tie: Telitiluoba yaadi n liibi leni piiga n neelie. Lani n tie yudanbilie kuli teligu, yudaano mo kuli nua. Bi den gedini li kuli li gbandieli nintuali.

⁴ O Diedo den maadi leni Musa, ki yedi:

⁵ «Gaa bi kani laa paabu, ke lan yaa ye u Kadikaanu Gbandieli tuonli po. Ŋan teni bi paabu yeni Levi buolu, ki ŋoadi yuakuli leni o tuonli n tie maama.

⁶ Musa den taa ti teliti leni a naatona yeni, ki teni Levi buolu.

⁷ O den teni Gersoni puoliŋuani telitilie leni naatonanaa, ki ŋoadi nani bi tuonli n tie maama.

⁸ O den taa telitinaa leni naatonanii ki teni Merari puoliŋuani, ki ŋoadi nani bi tuonli n tie maama. O kopadiciamo Alono bijua Itamari n den gobidi ba.»

⁹ Ama waa den teni Kehati puoliŋuani wani liba kuli, kelima bi den li baa yaa bugi ti tiagagidikaadi yeni bi boacaba po yo. Lini n tie bi tuonceli.

Isidayeli yaaba paabu li padibinbinli gagidima daali po

¹⁰ Bi yudanba den cuani li padili li padibinbinli pandima po, ban den wuli li po mi kpama, ki gagidi li yaa daali. Bi yudanba den cuani bi paabu li padibinbinli nintuali.

¹¹ O Diedo den yedi Musa: «Bi yudanba siiga, daali kuli niyendo baa cuani ki pa o paabu li padibinbinli pandima po.»

^12-83 Ban den kpendinni bi paabu maama nne: Li dakpiali, Juda buolu yudaano Aminadabi bijua Nasoni n den cuani o yaa paabu. Li dalieli, Isakari buolu yudaano Tisuari bijua Netaneyeli n den cuani o yaa paabu. Li dataali, Sabuloni buolu yudaano, Heloni bijua Eliabi n den cuani o yaa paabu. Li danaali, Rubeni buolu yudaano, Sedewuri bijua Elitisuri n den cuani o yaa paabu. Li damuuli, Simeon buolu yudaano, Selumieli bijua, Tisulisadayi n den cuani o yaa paabu. Li daluobili, Gadi buolu yudaano Dewuyeli bijua Eliasafi n den cuani o yaa paabu. Li daleleeli, Efrayimi buolu yudaano Amihudi bijua, Elikama n den cuani o yaa paabu. Li daniili, Manase buolu yudaano, Pedatisuli bijua, Gamilieli n den cuani o yaa paabu. Li dayiali, Benjamen buolu yudaano Gideyoni bijua Abidani n den cuani o yaa paabu. Li dapiigili, Dan buolu yudaano, Amisadayi bijua, Ahieseri n den cuani o yaa paabu. Li piiga n dayenli, Aseri buolu yudaano, Okilani bijua, Pagieli n den cuani o yaa paabu. Li piiga n dalieli, Nefitali buolu yudaano Enani bijua, Ahila n den cuani o yaa paabu. Yuakuli n den cuani yaa paabu den tie line: Ŋanjilifa tadiga ke ki kpiagu pundi kujapiena kobiga n piitaa leni ŋanjilifa tadibiga ban baa tiendi mi soama naani ki miini ke ki kpiagu pundi kujapiena piilele nani u kaangagidiŋamu yaa kujapiena yaa kpiagu yeni. Laa tialiediti kuli den gbie leni ban kali yaa yoma leni mi kpama mi pienma padili po. Yuakuli go den cuani wula tadiñokaaga ke ki kpiagu tie kujapiena piiga, ke ki gbie leni tulale. Yuakuli den cuani li padijuukaali po naatonli leni petonli leni yaa pebiga n pia binli. Yuakuli den cuani ŋuabuali ti tuonbiadi sugili padili po. Yuakuli go den cuani mi taanyenma padili po naatonalie, petonamuu, ŋuabuanamuu leni pebilamuu ya n pia binli binli.

⁸⁴ Lani n tie Isidayeli buoli yudanba n den puni yaala li padibinbinli pandima po, ban den wuli li po mi gagidima kpama yaa daali. Li den tie ŋanjilifa piiga n tadimulie, ŋanjilifa piiga n tadibuomulie leni wula tadiñokaamu, piiga n bonmulie.

⁸⁵ Ŋanjilifa tadiga kpiagu kuli den tie kiloyendo leni grami kobitaa. Tadibuoyenga kuli yaa kpiagu den tie grami kobilele. Lanwani, ŋanjilifa yaa tiadi kpiagu kuli den taani ki tie, piilie n kilonbinaa, ke li da leni u kaangagidiŋamu kujapiena yaa kpiagu.

⁸⁶ Bi yaa taa u kaangagidiŋamu bonbiigikaala yaa kpiagu po, mu wula tadiñokaamu piiga n bonmulie yeni, kpiagu den tie kujapiena kobiga n piilie, kelima tadiñokayenga kuli yaa kpiagu den tie kujapiena piiga.

⁸⁷ Li padijuukaali yandi kuli den taani ki fii: piiga n naatonalie, piiga n petonalie, piiga n pebilalie yaaba n den pia binli binli leni yaa paabu n den yegi leni li pada. Bi den padi piiga n ŋuabuanalie ti tuonbiadi sugili miabu padili po.

⁸⁸ Mi taanyenma padiyandi kuli den taani ki fii: piilie n naatonanaa, petona piiluoba, ŋuabuana piiluoba leni pebila piiluoba, yaaba n da den pia binli binli. Lani n tie ban den cuani yaa paabu li padibinbinli pandima po, li gagidima n pendi.

⁸⁹ Musa yaa den kua u Kadikaanu Gbandieli nni yaa yogunu, ki baa maadi leni o Diedo, o yen gba ke u nialu ña selubanba yaaba n se ku ŋantaadikpaku biili po yeni siiga. Lani n tie U Tienu n yen maadi leni o maama.