Mi Coadima 4 - U TIENU MAAMA TILI 2013

Levi buolu tuona: Kehati puoliŋuani

¹ O Diedo den maadi Musa leni Alono ki yedi:

² «Yin coadi Levi buolu, yuu n tie Kehati puoliŋuani, yuakuli leni o cuubuliñoabu leni o diegu.

³ Yin coadi yaaba n baa fidi ki soani li tuonli u Kadikaanu Gbandieli kuli nni, ki cili yaaba n pia bina piitaa, ki ban tuoni yaaba n pia bina piimuu.

⁴ Kehati bijaba tuonli u Kadikaanu Gbandieli n tie, ban yaa kubi yaa tiadi n gagidi ki ŋani hali boncianla.

⁵ Isidayeli yaaba yaa yen baa fii, ki cili li cenli, Alono leni o bijaba yen baa loagidi, yaa kpalidoaginkaabu n luagi u kaangagidiŋamu buliñoabu kani yeni,

⁶ ki ŋoagini ku ŋantaadikpaku. Bi baa taa yaa gbangu n juagi, ki go maani ku po. Bi go baa taa yaa kpalibu n moani, ki suudi, ki ŋoagini ku. Li yaa puoli, bi baa taa ku dabugikaadi, ki bugi.

⁷ Bi baa taa yaa cabili n moani ki suudi, ki ladi yaa dupen n gagidi o Diedo po, n yen maa yaa tabili po. Bi baa yuandi ki taa mu tadimu, mu tadiñokaamu, mu tadibuomu leni ban yen kuodi li bonñokaala yaa cuabimu nni. Yaa dupen n yen maa yogunu kuli yeni, baa maa likani.

⁸ Bi baa taa yaa cabili n moani, ki ladi ti tiadi yeni po, ki taa yaa gbangu n juagi, ki poabini ti. Li yaa puoli, ban taa tabili dabugikaadi, ki soali.

⁹ Bi baa taa yaa cabili n moani, ki suudi, ki ŋoagini u fidisantuankaanu, mu fidisanmu, mu babimu, mi fantanpienma tienkaani leni mi kpama n ye yaa tadimu nni.

¹⁰ Bi baa taa u fidisantuankaanu yeni leni u tiadi kuli, ki tieni yaa gbangu n juagi yaa niinni, ki taa likuli ki maani ban yen maandi yaa daadi po, ki bugi yeni.

¹¹ Bi baa taa yaa cabili n moani, ki suudi, ki ŋoagini wula padibinbinli, ki go taa yaa gbangu n juagi, ki ŋoagini li ki pugini. Bi go baa taa li dabugikaadi ki soali.

¹² Bi baa taa u kaangagidiŋamu nni tuonsoantiadi kuli, ki tieni yaa cabili n moani, ki suudi yaa niinni. Bi baa poabini ti yaa gbangu n juagi yaa niinni, ki maani ban yen maandi ti yaa daadi po ki bugi yeni.

¹³ Bi baa ñani yaa fantanpienma n ye li padibinbinli po, ki taa yaa cabili n moani, ki ladi li po.

¹⁴ Bi baa yuandi ki taa li padibinbinli yeni kani tuonsoantiadi kuli, ki maani li po. Laa tiadi tie i fani, i nanjogidi, pelinba leni mu tadimu. Bi baa taa yaa gbangu n juagi, ki ŋoagini ti. Bi baa taa li dabugikaadi, ki soali.

¹⁵ Alono leni o bijaba yaa ŋoagini yaa tiadi n gagidi ki ŋanbi ti ki gbeni, Kehati buolu baa nagini ki taa ti, ki bugi. Ama ban da sii yaa tiagu n gagidi ki ŋani kuli, kelima bi baa kpe. Lani n tie Kehati buolu n baa yaa pia yaa tuonli li gbandieli tuona nni.

¹⁶ O kopadiciamo Alono bijua, Eleasari mo baa kubi mi fidisankpama, ban siagi yaa dugibila, mi pienma pada leni ban yen gagidi bi niba leni yaa kpama. O go baa yaa guu li gbandieli leni yaala n ye lienni leni u kaangagidiŋamu leni u tiabidi bidi.»

¹⁷ O Diedo den maadi Musa leni Alono ki yedi:

¹⁸ «Yin yaa faami mani Kehati cuubuliñoana yaaba po, ke ban da bodi Levi buoli siiga.

¹⁹ Bi yaa nagini yaala n gagidi ki ŋani hali boncianla yaa yogunu, yin tieni bi po nanda: Yeni, bi baa ye, ki kan kpe. Alono leni o bijaba yen baa cua bi baa yo, ki waani ba, yuakuli n baa soani yaa tuonli leni wan baa tugi yaa tugili.

²⁰ Bi kan kua ki le ban poabini yaa tiadi ke ti gagidi ki ŋani yeni, kelima bi baa kpe.»

Gersoni puoliŋuani

²¹ O Diedo den maadi leni Musa, ki yedi:

²² «Ŋan ŋoadi ki coadi Levi buoli, yii n tie Gersoni puoliŋuani. Ŋan coadi yuakuli leni o cuubuliñoabu leni o diegu.

²³ Ŋan coadi yaaba n baa fidi ki soani tuonli kuli, u Kadikaanu Gbandieli nni, ki cili yaaba n pia bina piitaa, ki ban tuoni yaaba n pia bina piimuu.

²⁴ Ban baa yaa tuuni yaa tuona tie ane:

²⁵ Bi baa yaa kubi yaa kpalicianbu n liibi li gbandieli leni yaabu n tie pegbangu, ki ñaagi li leni yaa gbanjuagigu n ñaagi ku pegbangu yeni. Bani n go baa yaa kubi yaa kpalidoaginkaabu n juani u Kadikaanu Gbandieli buliñoabu kani,

²⁶ leni yaa kpaliti n lindi u luolu leni yaa kpalidoaginkaabu n juani bu buliñoajabu kani, ki duagi yaa luolu n lindi li gbandieli leni li padibinbinli. Bani n go baa yaa kubi, yaa kpaliti n lindi u luolu leni ban tugi yaa tiadi yeni kuli, yaa tiabidi bidi. Bi baa yaa tuuni lienni n pia yaa tuonli kuli.

²⁷ Alono leni o bijaba n baa yaa wangi bani Gersoni puoliŋuani n baa tuuni yaa tuona leni ban baa yaa tugi yaa tuga kuli. Bani n baa yaa wangi ba ban baa yaa tuuni yaala leni ban baa yaa tugi yaala. Yi baa guuni bane ban baa tugi yaala kuli.

²⁸ Lani n tie Gersoni puoliŋuani n baa yaa tuuni yaa tuona u Kadikaanu Gbandieli nni leni o kopadiciamo Alono bijua Itamari n baa yaa gobidi ba ke bi guu yaala.

Merari puoliŋuani

²⁹ Ŋan coadi Levi buolu, yuu n tie Merari puoliŋuani, yuakuli leni o cuubuliñoabu leni o diegu.

³⁰ Ŋan coadi yaaba n baa fidi ki soani tuonli kuli, u Kadikaanu Gbandieli nni, ki cili yaaba n pia bina piitaa, ki ban tuoni hali yaaba n pia bina piimuu.

³¹ Ban baa yaa tuuni yaa tuona tie ane: Bi baa yaa tugi li gbandieli daadi, li kudoe, li dasaana li bunbuna,

³² yaa dasaana n gaani ki lindi u luolu leni li bunbuna, li kpakpaana, li baabi, li tiadi kuli leni yaala n den ye bi tuonli po kuli.

³³ Lani n tie Merari puoliŋuani n baa tuuni yaa tuona u Kadikaanu Gbandieli nni, ke o kopadiciamo Alono bijua Itamari gobidi ba.»

Levi buolu, yaaba n tuuni yaa coali

^34-48 Musa, Alono leni li nitaanli yudanba den coadi Levi buolu kuli, ki ŋoadi yuakuli leni o cuubuliñoabu leni o diegu, nani o Diedo n den yedi maama. Lanwani, bi den coadi Kehati puoliŋuani. Bi den coadi yaaba n baa fidi ki soani tuonli kuli u Kadikaanu Gbandieli nni, ki cili yaaba n den pia bina piitaa, ki ban tuoni yaaba n den pia bina piimuu. Bi den sua ke Kehati cuuli yaaba kuli, taani ki fii tudalie n kobilele n niba piimuu (2 750). Gersoni cuuli yaaba mo kuli, den taani ki fii tudalie n kobiluoba n niba piitaa (2 630). Merari cuuli yaaba moko kuli, den taani ki fii tudataa n niba kobilie (3 200). Lanwani, bikuli den taani ki tie tudanii n kobimuu n niba piinii (8 580).

⁴⁹ Bi den coadi ba nani o Diedo n den yedi Musa maama, ki waani yuakuli n baa yaa tuuni yaa tuonli leni wan baa yaa tugi yaala. Bi den coadi ba nani o Diedo n den puogi Musa maama.