Mi Coadima 34 - U TIENU MAAMA TILI 2013

Kanana diema tinbiani

¹ O Diedo den maadi leni Musa, ki yedi:

² «Teni yaa ñoamabonli n tie ne Isidayeli yaaba, ki yedi ba: Yi yaa ti ban kua Kanana diema nni yaa yogunu, diidi mani yaa diema n baa tua yi faali nne: Lani n tie Kanana diema leni mi tinbiani.

³ Nuganu po kalu baa cili Tisini fanpienma kani, ki kuu leni Edomi. Lani, nuganu po kalu, yi tinbianu baa cili mi ñincianyaama kunu, ki yaa caa puoli po.

⁴ Yi tinbianu baa pegidi ganu po, ki kandi Akirabim, ki tagini Tisini po, ki ban tuoni Kadesi balinma. U baa tagini Hatisali-Adari po, ki ŋoadi Asimon.

⁵ U go baa cili Asimon, ki pegidi ki gedi Ejipiti kpenu po, ki ban tuoni mi ñincianma.

⁶ Yi tinbianu nintuali po, baa yaa tie mi ñincianma. Lani, n baa tua yi tinbianu, nintuali po.

⁷ Diidi yi tinbianu nujienu po n baa yaa tie maama nne: Ki cili mi ñincianma, yi baa taa ki ban tuoni hali Hori juali kani.

⁸ Yi go cili Hori juali kani, ki taa u tinbianu yeni, ki teli Hamati dogu buliñoabu po, u tinbianu n ban tuoni Tisedadi.

⁹ U tinbianu baa ŋoadi ki tagini Sifiloni po, ki ban tuoni Hatisali-Enani. Lani n baa tua yi tinbianu, nujienu po.

¹⁰ Puoli po, yi baa taa yi tinbianu, ki cili Hatisali-Enani, ki ban tuoni Sefami.

¹¹ U tinbianu baa jiidi Sefami, ki ŋoadi Livila po, Ayini puoli. U tinbianu baa jiidi, ki ban tuoni Kinereti ñincianma jaali puoli po.

¹² U tinbianu go baa jiidi, ki teli Jurden, ki ban tuoni mi ñincianyaama. Lani n baa tua yi diema leni mi diema gaanilindima kuli.»

¹³ Musa den teni Isidayeli yaaba li naa ñoamabonli, ki yedi: «Lani n tie yin baa toa tiatia, ki boagidi yaa diema, o Diedo n den bili ban teni i nibuoyiadi leni nibuolu boagidima yaa diema n yeni.

¹⁴ Rubeni buolu, ki ŋoadi u diedi n tie maama leni Gadi buolu, ki ŋoadi u diedi n tie maama, den gaa bi yaa faali. Manase buolu yuu n tie buolu boagidima yeni moko, den gaa u yaa faali.

¹⁵ Laa buoliedi leni yuu n tie buolu boagidima yeni, den gaa bi yaa faali Jurden kandima, ki tiegi Jeriko, ki goa puoli kalu po.»

Yaa yudanba n die mi diema boagidima yela

¹⁶ O Diedo den maadi leni Musa, ki yedi:

¹⁷ «Diidi yaa jaba n baa boagidi yi mi diema yela nne: O kopadiciamo Eleasari leni Nun bijua Josue.

¹⁸ Yi go baa taa nibuolu kuli nni yudanyendo, mi diema boagidima po.

¹⁹ Diidi laa jaba yela nne: Juda buolu po, li den tie Yefune bijua Kalebi.

²⁰ Simeon buolu po, li den tie Amihudi bijua Samueli.

²¹ Benjamen buolu po, li den tie Kisiloni bijua Elidadi.

²² Dan buolu po, o yudaano den tie Yogili bijua Buki.

²³ Josefi puoliŋuani, Manase buolu po, o yudaano den tie Efodi bijua Hanieli.

²⁴ Efrayimi buolu po, o yudaano den tie Sifitani bijua Kemueli.

²⁵ Sabuloni buolu po, o yudaano den tie Palinaki bijua Elitisafani.

²⁶ Isakari buolu po, o yudaano den tie Asani bijua Palitieli.

²⁷ Aseri buolu po, o yudaano den tie Selomi bijua Ahihudi.

²⁸ Nefitali buolu po, o yudaano den tie Amihudi bijua Pedaheli.»

²⁹ Bani n den tie o Diedo n den puogi yaaba, ke ban boagidi Kanana diema Isidayeli yaaba siiga.