Mi Coadima 32 - U TIENU MAAMA TILI 2013

Isidayeli buoli siiga, buolitaa kali Jurden puoli

¹ Rubeni buolu leni Gadi buolu den pia yaa yandi n yabi hali boncianla. Bi den diidi ki sua, ke Yayeseli diema leni Galaadi diema tie yaa kaani n ŋani ti yandi po.

² Lanwani, Gadi buolu leni Rubeni buolu den gedi ki laa Musa, o kopadiciamo Eleasari leni li nitaanli yudanba, ki yedi ba:

³ «Yaa dogi n yi Ataroti, Divon, Yayeseli, Nimila, Hesibon, Eleyale, Sebami, Nebo leni Beoni ye

⁴ o Diedo n todi Isidayeli yaaba, ke bi paadi yaa diema yaa niinni. Laa diema ŋani ti yandi po, ki sua tinba a naacenba mo nan pia ti yandi.

⁵ Bi go den yedi: A yaa tuo ti miabu, ŋan cedi tinba a naacenba n diedi laa diema, ki da cedi tin duodi Jurden.»

⁶ Musa den guani ki yedi Gadi leni Rubeni buoli: «Be! Yi kpiiba baa gedi bu toabu ki ŋaa yinba wani n yaa kaa nekanba?

⁷ Be yaa po ke yi bua ki wudi Isidayeli yaaba gbani, ke ban da kua o Diedo n puni ba yaa diema nni?

⁸ Yi yaajanba den tieni yene, min den soani ba Kadesi-Balineya ke bi ban goandi mi diema.

⁹ Bi den gedi hali Ekoli joaloangu. Ban den ban diidi mi diema, bi den guani ki wudi Isidayeli yaaba gbani, ke ban da gedi o Diedo n den puni ba yaa diema yeni po.

¹⁰ O Diedo pali den beni landaali, ke o den poli ki yedi:

¹¹ ‹Yaa jaba n ñani Ejipiti, ki cili yaaba n pia bina piilie leni yaaba n cie yeni, bi siiga oba kuli, kan le min den niani Abalahama, Isaaka leni Jakob yaa tinga, kelima baa ŋoadi n sanu bonŋanla.

¹² Keni yua Yefune bijua Kalebi leni Nun bijua Josue bebe n baa kua mi diema nni, kelima bani n ŋoadi mini o Diedo sanu bonŋanla.›

¹³ O Diedo pali den beni Isidayeli yaaba po, ke o den teni ke bi tieni bina piinaa mi fanpienma nni, hali yaa nifiima n den tieni wani o Diedo yaala n ki dagidi yeni kuli, n bodi ki gbeni.

¹⁴ Yinba ti tuonbiadi benkpela, yi gaa yi yaajanba kaanu, ki biagi o Diedo pabienli Isidayeli yaaba po, ki pugini.

¹⁵ Yi yaa buli o yi nunga, o baa cedi Isidayeli yaaba n yaa ye mi fanpienma nni, ki teni yaa niligu n tie ne kuli, n bodi ki gbeni.»

¹⁶ Bi den nagini Musa kani, ki yedi o: «Ti baa tieni nekanba a yandiena ti yandi po leni i dogi ti diedi yaaba po.

¹⁷ Li yaa puoli, ti baa jaligi ki taa ti jatiadi ki kua Isidayeli yaaba liiga, ki ciani ba o Diedo n bili bi po yaa kaanu yeni po. Lanyogunu ti diedi yaaba baa yaa ye i dopaali nni, naankani ke mi diema niba kan fidi ki nandi ba.

¹⁸ Ti kan lebidi ki kpeni ti diedi nni, ke Isidayeli yaaba, yuakuli ki kaa o tinbiinu nni.

¹⁹ Ti kan gaa leni ba tinbiinu, Jurden duoli bi hali liiga yaa diema nni, kelima li baa sua ke ti gaa ti yaa tinbiinu no Jurden kalu ne po, ki goa puoli.»

²⁰ Musa den yedi ba: «Yi yaa tieni yin yedi yaala, ki taa yi jatiadi ki ban tieni bu toabu o Diedo nintuali,

²¹ yi siiga yaaba n pia ti jatiadi kuli, yaa duodi Jurden o Diedo nintuali, hali wan paadi o yibalinba,

²² li yaa tie ke yi guudi ke o Diedo paadi mi diema ke yi nan lebidi ki guani ne, lani, yii pia panli o Diedo nintuali leni Isidayeli yaaba kani. Lanwani, yi baa diedi yaa diema n tie ne o Diedo nintuali.

²³ Ama yi yàá tieni yeni, yi tieni o Diedo po ti tuonbiadi, yin bandi mo, ke yi tuonbiadi mo baa yaa ŋua yi.

²⁴ Maa mani i dogi yi diedi yaaba po leni a naga yi yanbidi po. Li yaa puoli, yin tieni yin yedi yaala.»

²⁵ Gadi leni Rubeni buoli den yedi Musa: «Ti baa tieni nani fini ti daano n teni ti li ñoamabonli, ki yedi maama.

²⁶ Ti bila, ti puoba, ti yankuli leni ti yandi kuli baa yaa ye nekanba Galaadi dogi nni.

²⁷ Tinba a naacenba yaaba n kubi ti jatiadi bu toabu po mo, baa gedi ki ban koani o Diedo nintuali, nani fini ti daano n yedi maama.»

²⁸ Musa den teni o kopadiciamo Eleasari, Nun bijua Josue leni Isidayeli buoli yaaba po, a ñoamabona Gadi leni Rubeni buoli po.

²⁹ Musa den yedi ba: «Gadi leni Rubeni buoli yaa yegi leni yi ki duodi Jurden ki kubi bi jatiadi, ki ban koani o Diedo nintuali ke yi paadi mi diema, yin teni ba Galaadi diema, man tua bi tinbiini.

³⁰ Ama bi yàá taa bi jatiadi, ki yegi leni yi, yin teni ban kali yi siiga Kanana diema nni.»

³¹ Gadi leni Rubeni buoli den guani ki yedi: «Ti baa tieni o Diedo n yedi tinba a naacenba yaala.

³² Ti baa taa ti jatiadi, ki kua Kanana diema nni, o Diedo nintuali. Yeni, ti baa baa ti yaa tinbiinu Jurden kalu, yuu n tie ne kani.»

³³ Musa den puni Gadi buolu, Rubeni buolu leni Josefi bijua Manase buolu yuu n tie buolu boagidima, Amori yaaba bado Sihoni diema leni Basan bado Ogi diema, ki taani leni mi diema dociami leni mi dobila kuli.

³⁴ Gadi buolu den maa yaa dopaali n yi Divon, Ataroti, Aroyeeri,

³⁵ Atiroti-Sofani, Yayeseli, Yogibea,

³⁶ Beti-Nimida leni Beti-Harani leni a naga ti yanbidi po.

³⁷ Rubeni buolu den maa yaa dogi n yi Hesibon, Eleyale, Kiriyatayim,

³⁸ Nebo, Baali-Meyoni leni Sibima. Bi den lebidi ban den maa yaa dogi yeni yela, ki den baa i po yetoana.

³⁹ Manase bijua Makiri puoliŋuani den tuogi leni Galaadi yaaba bu toabu, ki fie bi diema. Bi den deli Amori yaaba, yaaba n den kaa likani.

⁴⁰ Lanwani, Musa den teni Manase bijua Makiri puoliŋuani Galaadi diema, ke bi kali lankani.

⁴¹ Manase bijua Makiri puoliŋuani den fiini bu toabu, ki fie Amori yaaba dogi, ki yini yi “Yayiiri dogi.”

⁴² Noba mo den fii, ki fie Kenati dogu leni yaa dogi n den baali u. O den taa o yeceli, ki yini u dogu.