Mi Coadima 3 - U TIENU MAAMA TILI 2013

Levi buolu tuona

¹ Diidi Alono leni Musa puoliŋuani, o Diedo n den maadi leni Musa Sinayi juali kani yaa yogunu.

² Diidi Alono bijaba yela nne: O bijakpelo den yi Nadabi. Yaaba n den ŋua wani mo tie: Abihu, Eleasari leni Itamari.

³ Alono bijaba yaaba n den baa mi gagidima, ki den dini li kopadicianbali, ki baa yaa tuuni li kopadiciantuonli n yeni.

⁴ Nadabi leni Abihu den kpe o Diedo nintuali, kelima bi den cuani o Diedo nintuali fantantoama, Sinayi fanpienma nni. Baa den pia bila. Eleasari leni Itamari n den tuuni li kopadiciantuonli, ke bi baa Alono gobidi ba.

⁵ O Diedo den maadi leni Musa, ki yedi:

⁶ «Yini Levi buolu, ki taa ba ki teni o kopadiciamo Alono, ban yaa todi o.

⁷ Bi baa yaa tuuni u Kadikaanu Gbandieli nintuali, ban puogi ba yaa tuona Alono po leni Isidayeli yaaba nitaanli kuli po. Bi baa yaa tuuni li gbandieli tuona.

⁸ Bi baa yaa guu u Kadikaanu Gbandieli tiadi kuli leni ban piani Isidayeli yaaba yaala kuli. Bi baa yaa tuuni li gbandieli tuona.

⁹ Ŋan taa Levi buolu, ki teni Alono leni o bijaba, ban yaa tuuni bi po, Isidayeli yaaba kuli yeli po.

¹⁰ Ŋan teni Alono leni o bijaba yo, n yaa tuuni li kopadiciantuonli. Yua n ki tie Alono buolu yua yaa nagini likani, se wan kpe.»

¹¹ O Diedo den maadi leni Musa, ki yedi:

¹² «Diidi, n gandi Levi buolu Isidayeli yaaba siiga, ke bi gaa Isidayeli yaaba bonjakpiala kuli kaanu. Mini n baa n die Levi buolu,

¹³ kelima mini n die bonjakpiaga kuli. Min den kpa Ejipiti yaaba bonjakpiala kuli yaa daali, n den ŋaa n yuli po Isidayeli nni bonjakpiala kuli. Mini n die bi niba bonjakpiala leni ti yandi kuli yaa bontonkpiamu. N tie Li Miali Diedo.»

Levi buolu coadikpiali

¹⁴ O Diedo den maadi leni Musa Sinayi fanpienma nni, ki yedi:

¹⁵ «Ŋan ŋoadi Levi bijaba, ki coadi bi diedi leni bi cuubuliñoana. Ŋan coadi bi jaba, ki cili yaaba n pia ŋmaalo leni yaaba n cie yeni.»

¹⁶ Musa den ŋoadi ki coadi ba nani o Diedo n den teni o li ñoamabonli maama.

¹⁷ Levi bijaba yela nne: Gersoni, Kehati leni Merari.

¹⁸ Diidi Gersoni bijaba yela, ki ŋoadi bi cuuna n tie maama. Lani n den tie Libini leni Simeyi.

¹⁹ Kehati bijaba nani bi cuuna n tie maama, lani n tie: Amirami, Yitisehali, Hebiron leni Usieli.

²⁰ Merari mo yaa bijaba, nani bi cuubuliñoana n tie maama. Lani n tie: Mali leni Musi. Lani n tie Levi buolu diedi, ki ŋoadi cuubuliñoabu cuubuliñoabu.

²¹ Gersoni n den tie Libini leni Simeyi cuubuliñoana yaaja. Laa cuubuliñoana n tie Gersoni puoliŋuani.

²² Ban den coadi yaaba kuli, ki cili yaa jaba n den pia ŋmayendo leni yaaba n den cie yeni kuli, den taani ki fii niba tudalele n kobimuu (7 500).

²³ Gersoni puoliŋuani cuubuliñoana den kpaagi bi naga li gbandieli puoli, ki goa nintuali po.

²⁴ Gersoni puoliŋuani yudaano den tie Layeli bijua Eliasafi.

²⁵ Bi den puogi Gersoni puoliŋuani u Kadikaanu Gbandieli kubima leni u kaangagidiŋamu kubima leni li gbandieli leni yaa kpalibu n den liibi li leni yaa kpalidoaginkaabu n ye u Kadikaanu buliñoabu po.

²⁶ Bani n go den kubi u luolu caba, u luolu buliñoabu kpalidoaginkaabu, li gbandieli gaanilindima, li padibinbinli leni li gbandieli baabi kuli.

²⁷ Kehati n den tie Amirami, Yitisehari, Hebiron leni Usieli cuubuliñoana yaaja. Bani n den tie Kehati puoliŋuani yaa cuubuliñoana.

²⁸ Ban den coadi bi jaba kuli, ki cili yaaba n den pia ŋmaalo leni yaaba n den cie yeni kuli, den taani ki fii niba tudanii n kobiluoba (8 600). Bani n den ye u kaangagidiŋamu tuonli po.

²⁹ Kehati cuubuliñoana den kpaagi bi nagili li gbandieli ganu po.

³⁰ Kehati puoliŋuani yudaano den tie, Usieli bijua Elitisafani.

³¹ Bi den puogi bani Kehati buolu, ke ban guudi ku ŋantaadikpaku leni yaa tabili ke bi yen maandi ban gagidi U Tienu po yaa dupen, u fidisantuankaanu, a padibinbina, u kaangagidiŋamu tiadi, ban tuuni leni yaa tiadi, bu kpalidoaginkaabu leni yaala n den ye lienni kuli.

³² Levi buolu yudanciamo den tie o kopadiciamo Alono bijua Eleasari. Wani n den gobidi yaaba n den tuuni u kaangagidiŋamu nni.

³³ Merari n den tie Mali leni Musi cuubuliñoana yaaja. Bani n den tie Merari puoliŋuani yaa cuubuliñoana.

³⁴ Ban den coadi yaaba, ki cili yaa jaba n den pia ŋmaalo leni yaaba n den cie yeni, den taani ki fii tudaluoba n niba kobilie (6 200).

³⁵ Merari cuubuliñoana yudaano den tie Abihayili bijua Tudiyeli. Bi den kpaagi bi nagili li gbandieli jienu po.

³⁶ Bi den piani bane li gbandieli daadi, li kudoe, li dasaana, li bunbuna, li tiabidi bidi leni yaa tiadi n den ye lienni kuli.

³⁷ Bani n go den kubi u luolu dasaana leni u bunbuna, u kpaana leni u baabi.

³⁸ Yaaba n den kpaagi bi nagili ki guu u kaangagidiŋamu ki goa puoli po, lani n tie u Kadikaanu Gbandieli nintuali, den tie Musa, Alono leni o bijaba. Bi den tuuni li gbandieli tuonli Isidayeli yaaba kuli po. Yua n ki den tie Alono buolu yaa den nagini likani, se wan kpe.

³⁹ Musa leni Alono n den coadi Levi buolu, nani o Diedo n den yedi maama, ki ŋoadi bi cuubuliñoana, yaa jaba n den pia ŋmaalo leni yaaba n den cie yeni, den taani ki fii piilie n niba tudalie (22 000).

A bikpiala daafaabima

⁴⁰ O Diedo den yedi Musa: «Coadi Isidayeli yaaba bonjakpiala kuli, ki cili yaaba n pia ŋmaalo leni yaaba n cie yeni. Ŋan diani bikuli yela.

⁴¹ Ŋan paadi Levi buolu, ke ban gaa n po Isidayeli yaaba bonjakpiala kaanu, ki yaa tie mini o Diedo n die yaaba. Bi yandi moko baa gaa n po Isidayeli yaaba yandi yantonkpiamu kaanu, ki yaa tie min die yaa yandi.»

⁴² Musa den coadi Isidayeli yaaba bonjakpiala kuli, nani o Diedo n den yedi o maama.

⁴³ Ban den coadi Isidayeli yaaba bonjakpiala yaaba, ki cili yaaba n pia ŋmaalo leni yaaba n den cie yeni kuli, den taani ki fii piilie n tudalie n kobilie n piilele n nibitaa (22 273).

⁴⁴ O Diedo den maadi leni Musa, ki yedi:

⁴⁵ «Ŋan paadi Levi buolu, ke ban gaa n po Isidayeli yaaba bonjakpiala kaanu, ki yaa tie mini o Diedo n die yaaba. Ŋan paadi bi yandi moko, ke tin gaa Isidayeli yaaba yantonkpiamu kaanu, ki yaa tie mini o Diedo n die yaa yandi. Levi yaaba baa yaa tie min die yaaba. N tie Li Miali Diedo.

⁴⁶ Isidayeli yaaba bonjakpiala coali cie Levi buolu, kobilie n piilele n nibitaa. Bi yaa daafaabima tie line:

⁴⁷ Ŋan bili kujapienamuu pani yuakuli po. Ŋan baa gaa yaa kujapiena yeni kpiagu n yaa da leni u kaangagidiŋamu yaa kujapienli kpiagu, lani n tie gera piilie.

⁴⁸ Ŋan teni Alono leni o bijaba laa kujapiena, yaa niba n paani yeni, daafaabima po.»

⁴⁹ Musa den gaa a kujapiena yeni, yaaba n ki baa Levi buolu daafaabima yeni kani.

⁵⁰ O den gaa i ligi Isidayeli yaaba bonjakpiala kani, ke li den tie tudili n kobitaa n piiluoba n kujapienamuu (1 365), nani u kaangagidiŋamu yaa kujapienli yeni.

⁵¹ Musa den taa mi daafaabima kujapiena, ki teni Alono leni o bijaba ki ŋoadi o Diedo ñoamabonli, nani o Diedo n den puogi o.