Mi Coadima 23 - U TIENU MAAMA TILI 2013

¹ Balaam den yedi Balaki: «Maa n po padibinbinalele, ki ŋanbi n po naatonalele leni petonalele.»

² Balaki den tieni Balaam n den yedi o yaala. Li yaa puoli, Balaki leni Balaam den padi padibinbinli kuli po, naatonli leni petonli.

³ Balaam den yedi Balaki: «Ŋan yaa se nekanba, a padijuukaali kani, ke n da baa piadi waamu. Li fidi ke o Diedo n cua ki tuogi nni. Lani, n baa waani a wan baa yedi nni yaala.» O den piadi ki doni ki juaga yuli po.

⁴ U Tienu den cua Balaam kani, ke Balaam yedi o: «N teni ke bi maa padibinbinalele ke n padi padibinbinli kuli po, naatonli leni petonli.»

⁵ O Diedo den kuani Balaam ñoabu nni yaa maama n tie ne, ki yedi: «Lebidi ki guani Balaki kani, ki ban waani o laa maama.»

⁶ Balaam den lebidi ki guani Balaki kani, ki sua ke o se o padijuukaali kani, wani leni Moabi yudanba kuli.

⁷ Balaam den maadi wan pia yaa maama, ki yedi: «Balaki teni ke n ñani Arami diema, ki cua ne, Moabi bado teni ke n ñani puoli juana nni, ki cua ne. Cua ne ki soli n po Jakob puoliŋuani! Cua ne ki wuli a pabienli Isidayeli yaaba po!

⁸ N baa tieni lede ki soli U Tienu n ki soli yua? N baa tieni lede ki bieni n pali O Diedo n ki bieni o pali yua yaa po?

⁹ N ye a joatana yula po ki nua ba, N ye a joabila yula po ki ñuadi ba, Bi tie yaa nibuolu n paadi ki pia bi yekaanu bi baa, Yaaba n ki taa leni nibuotoe.

¹⁰ Ŋme n baa fidi ki coadi Jakob puoliŋuani, Yii n yabi nani mi tanbiima yeni? Ba bi yaa boagidi ba kaaninaa, Ŋme n baa fidi ki waani kaanyendu yaaba coali n da maama? N sugini ki kpe bani bi niteginkaaba yeni yaa kuume, N juodima mo n tua nani bi yaama yeni!»

¹¹ Balaki den yedi Balaam: «A tieni nni be nne? N cuani a ne, ke ŋan soli be, be yaa po yo ke a gaaliti ba?»

¹² O den guani ki yedi Balaki: «Naani n tuonli ki tie min caa, o Diedo n yedi nni yaala bebe ka?»

Balaam gaali Isidayeli yaaba mi taaliema

¹³ Balaki den yedi o: «Cua ne tin gedi kaanto, ŋan baa fidi ki le Isidayeli yaaba kuli naankani. Nekanba, a nua bi nagili kunu yaaba bebe yo, ŋaa nua bikuli. Lanpo, ŋan soli ba n po.»

¹⁴ O den gedini Balaam yaa joa n yi Tisofimi kuanu po, Pisiga juali yuli po. O den maa padibinbinalele, ki padi padibinbinli kuli po, naatonli leni petonli.

¹⁵ Balaam den yedi Balaki: «Ŋan sedi ne, a padijuukaali kani, ke min da piadi ki ban tuogi U Tienu.»

¹⁶ O Diedo den cua Balaam kani, ki den waani o yaa maama n tie ne, ki yedi: «Lebidi ki guani Balaki kani, ki ban waani o laa maama.»

¹⁷ Balaam den lebidi ki guani Balaki kani, ki sua ke o se o padijuukaali kani, wani leni Moabi yudanba. Balaki den buali o: «O Diedo yedi be?»

¹⁸ Balaam den maadi wan pia yaa maama, ki yedi: «Balaki, fii ki cengi nni, Fini Tisipori bijua yeni, Ŋan diadi a tubili, ki cengi nni.

¹⁹ U Tienu ki tie nisaalo ka, ki baa pua mi faama, Waa tie nisaalo ka, ki baa lebidi o yantiali. Waa bili bonla, ki daa tieni la! Naani o baa niani ñoanianu, kaa baa kuani o cuu?

²⁰ U Tienu teni nni li ñoamabonli, ke min gaali laa nibuolu. Wani U Tienu yaa seligi, n kan fidi ki lebidi liba kuli.

²¹ Waa laa tagiliba kuli, Jakob puoliŋuani kani, Waa laa biadimiba kuli, bani Isidayeli puoliŋuani siiga, O Diedo bi Tienu ye leni ba, Bi kpaani ki kpiagidi wani bi bado!

²² U Tienu den ñani ba Ejipiti nni, Ki puni ba o moanua yaa gbanmanu.

²³ Ti buligbandi kan fidi ki tieni, Jakob puoliŋuani liba kuli. Li baabuuli mo kan fidi ki tieni, Isidayeli puoliŋuani liba kuli. U yogunu yaa pundi, bi baa waani Jakob puoliŋuani, Bani Isidayeli puoliŋuani siiga, Wani U Tienu n tieni yaala.

²⁴ Diidi, yaa nibuolu n fii nani o yangbanñua, Ki sedi nani jaganli yeni, Yua n kan duani kaa ŋmani wan cuo yaala, Kaa ñuni wan cuo yaaba yaa soama.»

²⁵ Balaki den yedi Balaam: «A yaa kan soli ba, ŋan nan da gaali ba wani.»

²⁶ Balaam den guani ki yedi Balaki mi naa maama: «Mii den maadi leni a ke n baa tieni o Diedo n baa yedi yaala kuli ka?»

Balaam gaali Isidayeli yaaba mi taataama

²⁷ Balaki den yedi Balaam: «To, lanwani, cua ne, tin go gedi kaanto. Li fidi ke lankani wani, U Tienu baa tuo ŋan soli n po u nibuolu yeni.»

²⁸ Balaki den gedini Balaam Peori juali yuli po, naani n tiegi mi fanpienma.

²⁹ Balaam den yedi Balaki: «Maa n po padibinbinalele, ki ŋanbi n po naatonalele leni petonalele.»

³⁰ Balaki den tieni nani Balaam n den yedi o maama, ki den padi naatonli leni petonli padibinbinli kuli po.