Mi Coadima 2 - U TIENU MAAMA TILI 2013

Isidayeli yaaba n baa yaa kpaagi bi toanaga maama

¹ O Diedo den maadi Alono leni Musa ki yedi:

² «Isidayeli yaaba, yuakuli yen baa yaa ye ki kuu o toacagili jakoandicabili kani leni o buolu maalima kani. Bi yen baa tegini li gbandieli ki kpa bi toanaga ki gaani lindi u Kadikaanu Gbandieli.

³ Yaaba n baa kpaa bi toanagili puoli po, baa yaa tie Juda buolu. Bi toatieba yudaano baa yaa tie, Aminadabi bijua Nasoni.

⁴ Bi toanagili pia piilele n tudanaa n niba kobiluoba (74 600).

⁵ Yaaba n baa yaa baali ba, baa yaa tie Isakari buolu. Bi toatieba yudaano tie Tisuari bijua Netaneyeli.

⁶ Bi toacagili pia piimuu n tudanaa n niba kobinaa (54 400).

⁷ Yaaba n go den baa kpaa bi toanagili ki pugini bi yaa po, baa yaa tie Sabuloni buolu. Bi toatieba yudaano tie Heloni bijua Eliabi.

⁸ Bi toacagili pia piimuu n tudalele n niba kobinaa (57 400).

⁹ Lanwani, Juda buolu toacagili niba leni yaa toagola n taa leni ba yaa niba kuli, den taani ki fii kobiga n piinii n tudaluoba n niba kobinaa (186 400). Bani n baa kua liiga.

¹⁰ Yaaba n baa yaa ye ganu po, Rubeni buolu jakoandicabili kani leni bi toacaga tie bine: Rubeni buolu toatieyudaano tie Sedewuri bijua, Elitisuri.

¹¹ Bi toacagili pia piinaa n tudaluoba n niba kobimuu (46 500).

¹² Yaaba n baa yaa baali ba n tie Simeon buolu. Bi toatieba yudaano tie Tisulisadayi bijua Selumieli.

¹³ Bi toacagili pia piimuu n tudayia n niba kobitaa (59 300).

¹⁴ Yaaba n go baa kpaa bi toanagili ki pugini bi po, baa yaa tie Gadi buolu. Bi toatieba yudaano tie Rewuyeli bijua Eliasafi.

¹⁵ Bi toacagili pia piinaa n tudamuu n kobiluoba n niba piimuu (45 650). Lanwani, Rubeni buolu leni yaa toacaga n taa leni ba yaa niba kuli den taani ki fii tuda kobiga n piimuu n tudiyenli n niba kobinaa n piimuu (151 450).

¹⁶ Bani n baa yaa ŋua yaa cagili n ye liiga.

¹⁷ Li yaa puoli, u Kadikaanu Gbandieli baa yegi leni Levi yaaba cagili ki ŋoadi. Laa cagili n baa ye a caga siiga. Bi baa gedi nani ban baa n kali maama, yuakuli o cagili nni leni bi maalima caba.

¹⁸ Yaaba n baa yaa ye nintuali po, Efrayimi buolu jakoandicabili kani tie bine: Efrayimi buolu: Bi toatieba yudaano tie Amihudi bijua Elikama.

¹⁹ Bi toacagili pia tuda piinaa n niba kobimuu (40 500).

²⁰ Yaaba n baa yaa baali ba tie Manase buolu. Bi toatieba yudaano baa yaa tie Pedatisuli bijua, Gamilieli.

²¹ Bi toacagili pia piitaa n tudalie n niba kobilie (32 200).

²² Yaaba n go baa kpaa bi toanagili ki pugini bi po, baa yaa tie Benjamen buolu. Bi toatieba yudaano tie Gideyoni bijua, Abidani.

²³ Bi toacagili pia piitaa n tudamuu n niba kobinaa (35 400).

²⁴ Lanwani, Efrayimi buolu leni yaa toacaga n taa leni ba, yaa niba kuli den taani ki fii kobiga n tudanii n niba kobiga (108 100). Bani n baa tua li cagitaali, ki yaa ŋua Levi buolu.

²⁵ Dan buolu leni yaaba n taa leni ba, ki ye bi jakoandicabili kani, baa yaa ye jienu po. Dan buolu toatieyudaano tie Amisadayi bijua, Ahieseri.

²⁶ Bi toacagili pia piiluoba n tudalie n niba kobilele (62 700).

²⁷ Yaaba n baa yaa baali ba tie Aseri buolu. Bi toatieba yudaano tie Pagieli bijua Okilani.

²⁸ Bi toacagili pia piinaa n tudiyenli n niba kobimuu (41 500).

²⁹ Yaaba n baa kpaa bi toanagili ki pugini bi po, baa yaa tie Nefitali buolu. Bi toatieba yudaano tie Enani bijua Ahila.

³⁰ Bi toacagili pia piimuu n tudataa n niba kobinaa (53 400).

³¹ Lanwani, Dan buolu toacagili leni yaa toacaga n taa leni ba, yaa niba kuli den taani ki fii kobiga n piimuu n tudalele n niba kobiluoba (157 600). Bani n baa juodi ki yaa ŋua puoli leni bi jakoandicabili.»

³² Bani n tie ban den ŋoadi buolu kuli leni toacagili kuli, ki coadi Isidayeli yaaba. Bikuli n den taani ki fii kobiluoba n tudataa n kobimuu n niba piimuu (603 550).

³³ Baa den coadi ki taani Levi buolu leni Isidayeli yaaba buoli, yii n sieni, nani o Diedo n den puogi Musa maama.

³⁴ Isidayeli yaaba den ŋoadi o Diedo n den teni Musa yaa ñoamabona kuli. Bi den kpaagi bi toanaga ki kuu bi maalima caba kani. Bi yaa bi fii li cenli, yuakuli yen ye o buolu nni leni o diegu yaaba siiga.