Mi Coadima 18 - U TIENU MAAMA TILI 2013

Bi kopadicianba leni Levi buolu tuona

¹ O Diedo den yedi Alono: «Yaa tagili n tiendi U kaangagidiŋamu kuli, tugi fini, a bijaba leni a diegu nni yaaba yula po yo. Yaa tagili mo n tieni li kopadiciantuonli kuli nni, tugi fini leni a bijaba yaa yuli po.

² Ŋan taa a kpiiba, a baa buolu, Levi buolu yeni ki nagini ba a baa kani, ke ban yaa ye leni a ki todi a, fini leni a bijaba yaa tuuni siedi gbandieli nni yaa yogunu.

³ Bi baa yaa ŋua ki tiendi a ñoamabona, ki tuuni ban pia yaa tuona kuli li gbandieli nni. Ama ban da nagini yaa tiadi n gagidi leni li padibinbinli, ke yinba leni bani kuli n da ti kpe.

⁴ Bi baa yaa nagi a kani ki tiendi ban pia yaa tuona u Kadikaanu Gbandieli nni. Yua n ki tie Alono buolu yua kuli n da nagini yi kani.

⁵ Yinba yi baa n baa yaa tuuni u kaangagidiŋamu nni leni li padibinbinli kani, ke o Diedo pali n da go ti fii Isidayeli yaaba po.

⁶ Diidi, n gandi yi kpiiba Levi buolu Isidayeli yaaba siiga. N taa ba ki teni yi ke ban yaa tuuni u Kadikaanu Gbandieli nni.

⁷ Fini leni a bijaba mo n baa yaa tuuni yi kopadiciantuonli li padibinbinli kani leni u kaangagidiŋanmoanu nni, yuu n ye bu kpalidoaginkaabu puoli po yeni. Yi kopadiciantuonli yeni tie min puni yi yaa tuonli. Yaa nilamo n nagini likani kuli baa kpe.»

Bi kopadicianba biini

⁸ O Diedo den yedi Alono: «Diidi mini n ba n puni a ŋan yaa guu ban ñani ki puni nni yaa paabu. N puni fini leni a bijaba Isidayeli yaaba n gagidi yaala kuli, ke lan tua yi biinu. Li tie yaa mabilikaama n baa yaa ye yaa yogu n tuu yaa yogu.

⁹ Diidi yaa bonla n gagidi ki ŋani hali boncianla siiga, yaala n ki juu u mu nni, yin die yaala nne: Bi pada, bi paabu, bi tuonbiadi sugili pada, mi guaniŋanbima pada leni ban padi ki puuni ya kuli. Laa bonla yaala n gagidi hali boncianla yeni tie fini leni a bijaba yaa po yo.

¹⁰ Yin je laa jiema nani yaama n gagidi ki ŋani hali boncianla yeni. Bonjaga kuli baa je ma. Mi baa yaa tie yaala n gagidi ki ŋani yi po.

¹¹ Ŋan go die yaala ke li tie a biinu tie Isidayeli yaaba n kpendinni n po yaala leni ban yen tieni yaa maalima n waani ke bi teni nni yeni. N puni la fini leni a bijaba. A diegu nni yua n ki joagini kuli baa je ma. N puni la fini, a bijaba leni a bisiaba lan tua yaa mabilikaama n baa yaa ye yaa yogu n tuu yaa yogu kuli po.

¹² N go puni yinbe Isidayeli yaaba n baa pa nni ki tinga bonluonkakpiala yaala kuli: Lan tie kpapanma, duvenpaano bi ŋalikama.

¹³ Ban baa cuani ki tinga bonluonkakpiala yaala o Diedo po kuli tie a yaale. A diegu nni yua n ki joagini kuli baa je ma.

¹⁴ Isidayeli diema nni, ban gagidi yaala kuli, fini n die la.

¹⁵ Yaala n pia miali ki fo kuli bikpiaga, ban puni yaaga o Diedo kuli tie a yaage. Lan tie nilo bi niba bila siiga leni ti yandi yaa bila siiga. Ama ŋan teni ban daa ki faabi bi niba bikpiala leni yaa yandi n joagini kuli yaa bikpiala.

¹⁶ Ŋan baa bili yaa panpaani yaa bonjaga n pundi ŋmaalo po baa yaa tie kujapienamuu, nani u kaangagidiŋamu yaa kujapienli kpiagu n da maama, yaala n pundi gera piilie.

¹⁷ Ama ŋan da gaa daafaabima ligi, i ne, i pe leni i ŋuabi wani yaa bontonkpiamu po, kelima laa yandi wani tie yaadi n ŋani. A yen baa kodi ti ki wuli mi soama li padibinbinli po, ki ñani mi kpama ki juu, lan tua bi padijuukaali, yaa padili yaa nuulu n mani o Diedo po.

¹⁸ Ti yandi yeni nandi baa yaa tie a po nani li bengunli, yaali ke bi yen tieni yaa maalima n waani ke bi teni la o Diedo, bi nani li jienpanli yeni.

¹⁹ Lanwani, Isidayeli yaaba n baa ñani yaala, yaa paabu n gagidi o Diedo po yeni kuli, tie a yaa biinu yo. Lani n tie min puni a yaa biinu, fini, a bijaba leni a bisiaba. Li tie yaa mabilikaama n baa yaa ye yaa yogu n tuu yaa yogu kuli po. Li tie o Diedo nintuali, yaa ñoanianu n ki pia fidima, fini leni a puoliŋuani po yaa yogunu kuli.»

²⁰ O Diedo den yedi Alono: «A kan baa tinbiinu min baa pa Isidayeli yaaba yaa diema yeni niinni. Mini o Diedo n tie a tinbiinu leni a faali Isidayeli yaaba siiga.

Levi buolu biini

²¹ Levi buolu panpaani u Kadikaanu Gbandieli tuonli po, baa yaa tie Isidayeli yaaba n kpendinni yaa diim.

²² Isidayeli yaaba kan go nagini u Kadikaanu Gbandieli. Lani n tie ban da ti tugi tuonbiadiba ki kpe.

²³ Levi buolu n baa yaa tuuni u Kadikaanu Gbandieli nni, ki yaa tugi bi tagili tugili. Li baa yaa tie yaa mabilikaama n baa ye yaa yogunu n tuu yaa yogu yi nifiima yaama n baa ŋoadi kuli siiga.

²⁴ Ama n puni Levi buolu, Isidayeli yaaba n ñani yaa diim o Diedo po yeni. Li tie lani yaa po, ke n maadi bi po, ki yedi: ‹Bi kan baa tinbiinu Isidayeli yaaba siiga.› »

²⁵ O Diedo den maadi leni Musa, ki yedi:

²⁶ «Ŋan maadi leni Levi buolu, ki yedi ba: ‹Yi yaa yen gaa Isidayeli yaaba kani min puni yi yaa diim, ke o tie yi biinu yeni, yin ñani lienni bu paabu o Diedo po. Lani n tie diim yaa diim.

²⁷ Bi baa coadi yin baa ñani n po yaala yeni, nani ban baa ñani yaa ŋalikama u jalu nni, yaa ka nani ban baa ñani yaa duvenpaano duven tiidi bonluonkaala datuodikaanu maama yeni.

²⁸ Yeni yimoko baa yaa ñandi yin gaani Isidayeli yaaba kani yaa diim yeni niinni, bu paabu o Diedo po. Yi baa teni o kopadiciamo Alono, yin ñani yaa paabu o Diedo po yeni.

²⁹ Yin gaani yaa paabu kuli nni, yi baa ñani bu paabu o Diedo po. Yaala n ŋani ki pia mayuli ki cie kuli siiga, yin ñani yaa biinu n gagidi.›

³⁰ Ŋan yedi ba: ‹Yi yaa ñani yaala n pia mayuli ki cie yeni, diim baa yaa tie Levi yaaba po, nani o kpakpaalo n die yaala n ñani u jalu nni leni yaala n ñani u datuodikaanu maama yeni.

³¹ Yinba leni yi diegu nni yaaba, yi baa je laa jiema, yin baa naani kuli, kelima lani n tie yin tuuni yaa tuonli u Kadikaanu Gbandieli nni yeni panpaani.

³² Yi yaa ñani yaala n pia mayuli ki cie yeni, tuonbiadiba kuli ki go ŋua yi. Lanwani, yi kan biidi Isidayeli yaaba paabu, yaabu n gagidi yeni, yi didi kan kpe mo.› »