Mi Coadima 11 - U TIENU MAAMA TILI 2013

Isidayeli yaaba n kaa Tabeera

¹ Isidayeli yaaba n kaa Tabeera, bi den yenbidi, ke laa den mangi o Diedo. O Diedo n den gbadi laa yenbidi, o pali den fii. O Diedo mu den cuo bi siiga, ki buoni li nagili kunu.

² Bi den buudi Musa kani. Musa den jaandi ki mia o Diedo, ke u mu gbindi.

³ Bi den yini laa kaanu Tabeera, kelima lankane ke o Diedo mu den cuo bi siiga.

Ku niligu mia ti nandi

⁴ U nankodu den cuo bi nilanba, yaaba n den ye Isidayeli yaaba siiga. Ba Isidayeli yaaba moko den mua ki tua: «Ŋme n baa pa ti ti nandi tin ŋmani?

⁵ Ti tiadi tin den ŋmani yaa jami faala Ejipiti po, a noala, a fela, salimasoa, laayi leni li yaa buoli kuli.

⁶ Moala, ti niali kuodi, tii go pia puu. Tii baadi jetoama kuli, se manni.»

⁷ Manni den mani bonŋanla, ki naani leni yaa sinma n pia u nuulumanu.

⁸ Ku niligu yen yadi ki gandi gandi o. Bi yen naani o li naali po, bi ki tuoni o li tuoli nni. Bi yen ŋaani o li sanli nni, ki pua ti lalaadi. O manu yen tie nani ban pua yaa maada leni mi kpama yeni.

⁹ Ku mangu n yen luoni yaa yogunu i kuani nni yeni, manni moko yen jiidi lanyogunu yo.

¹⁰ Musa den gbadi ke ku niligu nni, buolu kuli kaa bi gbandiena buliñoana kani, ki buudi. O Diedo pali den fii boncianla, ke laa bonla mo den biidi Musa pali.

¹¹ Musa den yedi o Diedo: «Be yaa po ke a faligidi mini a naacemo? Be yaa po ke a tuni nni yaa niligu n tie ne kuli tugili, ke min yaa gobidi ku?

¹² Naani mini n den punbi ku naa niligu kuli, ke a baa yedi nni: ‹Ŋan ŋmabi ba, nani o biyualo n yen ŋmabi ki biga maama yeni, ki gedini ba, hali ŋan den poli ki niani bi yaajanba, ke a baa pa ba yaa diema nni?›

¹³ N baa ñani ti nandi le, ki teni yaa niligu n tie ne kuli? Bi buudi n kani ki tua: ‹Pa ti ti nandi tin ŋmani.›

¹⁴ N kan fidi ki tugi yaa niligu n tie ne kuli mini nbebe, kelima li tugili kpiagi n po boncianla.

¹⁵ A yaa baa yaa tuuni nni nanda, ŋan kpa nni yenma, li yaa tie ke a pali mani n po. Yeni, n kan yaa nua n fala.»

¹⁶ O Diedo den yedi Musa: «Taani a kani, Isidayeli yaaba nikpela siiga nikpela piilele, ŋan bani yaaba ke bi tie nikpela leni yudanba, ku niligu siiga. Ŋan cuani ba u Kadikaanu Gbandieli kani, bani leni fini n taani likani.

¹⁷ N baa jiidi ki maadi leni a likani. N baa taa n Fuoma yaama n ye a niinni yeni, ki kuani ma bi niinni, ke ban fidi ki tugi ku niligu tugili, ki todi a, ke ŋan da go tugi li fini a bebe.

¹⁸ Ŋan yedi ku niligu: Gagidi ki ŋanbi mani yi yula saala po. Yi den baa baa ti nandi ki ŋmani, kelima o Diedo gbadi ke yi buudi ki tua: ‹Ŋme n baa pa ti ti nandi tin ŋmani? Kelima tin den ye Ejipiti po, li den ŋani ti po ki cie.› O Diedo baa pa yi ti nandi yin ŋmani.

¹⁹ Yi kan ŋmani ti dayenli bi danalie, bi danamuu bi dana piiga bi dana piilie ka.

²⁰ Ama yi baa ŋmani ti ŋmamunli, ki guo hali tin yaa ña yi miani nni, hali yi yama n ña ti niinni. Li baa soani yeni, kelima yi fali o Diedo yua n ye yi siiga, ki buudi o nintuali ki tua: ‹Be yaa po yo, ke ti den ñani Ejipiti po?› »

²¹ Musa den yedi: «Min ye yaa niba siiga pundi niba tuda kobiluoba, ke a nan yedi ke a baa pa ba ti nandi ban ŋmani hali ŋmamunli.

²² Naani ba bi yaa kodi bi po, ti yanbidi leni i ne, li baa dagidi ba? Naani bi yaa kpa bi po mi ñincianma nni jami kuli, ba lani baa dagidi ba?»

²³ O Diedo den guani ki yedi Musa: «Naani mini o Diedo paalu pia u bianu? Ne leni yogunu waamu, a baa le min yedi yaala yaa baa tieni, bi li yaa kan tieni.»

U Tienu puni bi nikpepiileleediba o Fuoma

²⁴ Musa den ñani ki gedi ki ban togidi ku niligu, o Diedo maama kuli. O den taani ku niligu nikpela siiga, nikpela piilele, ki sieni ba ki lindi li gbandieli.

²⁵ O Diedo den jiidi ku tawaligu nni, ki maadi leni Musa. O den taa o Fuoma yaama n ye Musa po yeni, ki kuani bi nikpepiileleediba yeni niinni. U Tienu Fuoma n den kua bi niinni yaa yogunu, bi den cili ki pua saawali, ama baa den suagi liiga.

²⁶ Jabilie den ye li nagili nni, Elidadi leni Medadi. Ba ke baa den gedi li gbandieli po, U Tienu Fuoma den jiidi bi po, kelima bi den taa li coali nni. Bani moko, den cili ki pua saawali li nagili nni.

²⁷ Jawaayendo den sani ki ban waani Musa, ki yedi: «Elidadi leni Medadi pua saawali li nagili nni.»

²⁸ Nun bijua, Josue yua n den tie Musa duogili hali o jawaama nni, den yedi Musa: «Musa n daano, yie bi po!»

²⁹ Musa den guani ki lebidi o: «Naani a poni leni ba, mini yaa po yo? Li bi ŋani U Tienu n kuani o Fuoma Isidayeli yaaba kuli nni, ke bikuli n tua saawalipuaba.»

³⁰ Lani, Musa leni Isidayeli yaaba nikpela yeni den lebidi ki guani li nagili nni.

U Tienu soani a ñinkpakpala

³¹ O Diedo den teni ke u faalu fii mi ñincianma kani, ki tugi ki cuani a ñinkpakpala, ki wuli li nagili nni. A ñinkpakpala yeni n den ladi yaa banli li nagili gaanilindima, den pundi dayenli cenli. Bi doginma mo, den pundi nukpanduna lie.

³² Landaali, li ñiagu leni li fiifaama yentunli kuli, ku niligu den fii ki gedi ki ban wuo a ñinkpakpala yeni. Yua n ki den wodi ke li yabi, den baa ke li pundi kilo tuda tuda. Bi den ladi a, ki gaani li nagili.

³³ Hali ke bi da den babi babi ti nandi, ki daa ŋmani ke li dingi yeni, o Diedo pali den fii ku niligu po, ke o den ŋaa ku niligu po yaa yianu n bia hali boncianla.

³⁴ Bi den yini laa kaanu Kibiroti-Hataafa, kelima bi den piini lankane, ki nanmiadiga n den cuo yaaba, ke bi kpe.

³⁵ Isidayeli yaaba den fii Kibiroti-Hataafa, ki gedi Hatiseloti, ki ban kpaa bi nagili likani.