Mi Coadima 1 - U TIENU MAAMA TILI 2013

Li coali 1—4 Isidayeli buoli yaaba coadikpiali

¹ Isidayeli yaaba ñama Ejipiti binlieli, cilie dakpiali, o Diedo den maadi leni Musa li gbandieli nni, ki yedi:

² «Fini leni Alono n coadi Isidayeli yaaba nitaanli kuli. Yin diani bi jaba kuli yela, yuakuli leni o buolu leni o diegu.

³ Fini leni Alono, yin coadi yaa jaba n ye Isidayeli yaaba toacaga nni, ki pundi bina piilie bi ki cie, ki baa fidi ki gedi bu toabu.

⁴ Yin gandi buolu kuli siiga diedanyendo, wan yaa todi yi.

⁵ Yaa jaba n baa yaa todi yi, baa yaa tie bine: Rubeni buolu nni, Sedewuri bijua Elitisuri.

⁶ Simeon buolu nni, Tisulisadayi bijua, Selumieli.

⁷ Juda buolu nni, Aminadabi bijua Nasoni.

⁸ Isakari buolu nni, Tisuari bijua Netaneyeli.

⁹ Sabuloni buolu nni, Heloni bijua Eliabi.

¹⁰ Josefi bijaba siiga, Efrayimi buolu nni, Amihudi bijua Elisama. Manase buolu nni, Pedatisuli bijua Gamilieli.

¹¹ Benjamen buolu nni, Gideyoni bijua Abidani.

¹² Dan buolu nni, Amisadayi bijua, Ahieseri.

¹³ Aseri buolu nni, Okilani bijua, Pagieli.

¹⁴ Gadi buolu nni, Dewuyeli bijua Eliasafi.

¹⁵ Nefitali buolu nni, Enani bijua Ahila.»

¹⁶ Laa niba n tie ban den yini yaaba. Bi den tie badijaba bi yaajanba buoli siiga, ki go tie Isidayeli toatieba tudili tudili yudanba.

¹⁷ Lanwani, Musa leni Alono den taa laa jaba ban den gandi yaaba yeni,

¹⁸ ki yini ki taani Isidayeli yaaba kuli, cilie dakpiali. Bi den kali ki baani laa jaba yela, ki coadi yaaba n den pia bina piilie leni yaaba n den cie bina piilie, ki ŋoadi yuakuli leni o buolu leni o diegu.

¹⁹ Musa den coadi ba Sinayi fanpienma nni, nani o Diedo n den puogi o maama.

²⁰ Yaala n tie Jakob bijakpelo Rubeni bijaba po, ki ŋoadi bi buolu, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi,

²¹ ban den coadi yaaba Rubeni buolu nni, den tie jaba tuda piinaa n tudaluoba n kobimuu (46 500).

²² Simeon bijaba po, ki ŋoadi bi buolu, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi,

²³ ban den coadi yaaba Simeon buolu nni, den tie jaba tuda piimuu n tudayia n kobitaa (59 300).

²⁴ Gadi bijaba po, ki ŋoadi bi buolu, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi,

²⁵ ban den coadi yaaba Gadi buolu nni, den tie jaba tuda piinaa n tudamuu n kobiluoba n piimuu (45 650).

²⁶ Juda bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

²⁷ ban den coadi yaaba Juda buolu nni, den tie jaba tuda piilele n tudanaa n kobiluoba (74 600).

²⁸ Isakari bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

²⁹ ban den coadi yaaba Isakari buolu nni, den tie jaba tuda piimuu n tudanaa n kobinaa (54 400).

³⁰ Sabuloni bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi,

³¹ ban den coadi yaaba Sabuloni buolu nni, den tie jaba tuda piimuu n tudalele n kobinaa (57 400).

³² Josefi bijaba, Efrayimi bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

³³ ban den coadi yaaba Efrayimi buolu nni, den tie jaba tuda piinaa n kobimuu (40 500).

³⁴ Manase bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

³⁵ ban den coadi yaaba Manase buolu nni, den tie jaba tuda piitaa n tudalie n kobilie (32 200).

³⁶ Benjamen bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

³⁷ ban den coadi yaaba Benjamen buolu nni, den tie jaba tuda piitaa n tudamuu n kobinaa (35 400).

³⁸ Dan bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

³⁹ ban den coadi yaaba Dan buolu nni, den tie jaba tuda piiluoba n tudalie n kobilele (62 700).

⁴⁰ Aseri bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

⁴¹ ban den coadi yaaba Aseri buolu nni, den tie jaba tuda piinaa n tudiyenli n kobimuu (41 500).

⁴² Yaala n den tie Nefitali bijaba po, ki ŋoadi bi buoli, bi cuubuliñoana leni bi diedi, joa kuli joa, ki cili yaaba n den pia bina piilie leni yaaba n den cie yeni, yaaba n den baa fidi ki taa jatiadi kuli,

⁴³ ban den coadi yaaba Nefitali buolu nni, den tie jaba tuda piimuu n tudataa n kobinaa (53 400).

⁴⁴ Bani n tie Musa, Alono leni Isidayeli piiga n badijaliediba n den coadi yaaba. Buolu kuli nni, niyendo.

⁴⁵ Ban den coadi Isidayeli yaaba siiga yaaba kuli, ki ŋoadi bi diedi, ki cili yaaba n den pia bina piilie leni yaaba n den cie yeni, Isidayeli yaaba, yaaba n den baa fidi ki taa jatiadi kuli,

⁴⁶ ban den coadi yaaba kuli den taani, ki tie jaba tuda kobiluoba n tudataa n kobimuu n piimuu (603 550).

Levi buolu tuonceli

⁴⁷ Baa den coadi ki taani Levi buolu leni yaa buoli n sieni.

⁴⁸ O Diedo den maadi leni Musa, ki yedi:

⁴⁹ «A yaa baa coadi Levi buolu, ŋan da coadi ki taani ba Isidayeli yaaba siiga.

⁵⁰ Ŋan puogi bani Levi buolu siedi gbandieli tuonli, li tiadi leni lin die yaala kuli. Bi baa yaa tugi li gbandieli yeni leni li tiadi kuli, ki go tuuni lienni n pia yaa tuona. Bi yen baa kpa bi nagili ki gaani li gbandieli yeni.

⁵¹ Yi yaa baa fii kaanu, bani n baa kpaadi kpaadi li gbandieli. Yi yaa yen baa n sedi kaanu, ki kpaa yi nagili, bani n go baa kpaa li gbandieli. Yua n ki tie Levi buolu yua yaa nagini li, se wan kpe.

⁵² Isidayeli yaaba, yuakuli baa kpaa o toanagili ki kuli leni o jakoandicabili, ki ŋoadi yuakuli leni o toacaga n tie maama.

⁵³ Ama Levi buolu wani baa kpaa bi toanagili ki lindi siedi gbandieli, yeni n tie n pali n da ti fii Isidayeli yaaba nitaanli po. Levi buolu n baa yaa kuu li siedi gbandieli.»

⁵⁴ Isidayeli yaaba den tieni o Diedo n den teni Musa yaa ñoamabona kuli, ki naa poadi liba kuli.