Mi cilima 9 - U TIENU MAAMA TILI 2013

U Tienu ñoanianu Nowe po

¹ U Tienu den seligi Nowe leni o bijaba ki yedi ba: «Yin yaa maa ki pugidi, ki go gbieni ki tinga.

² Ki tinga yandi, tanpoli bonyugiditi, yaala n fo ki balini ki tinga nni leni mi ñincianma nni jami kuli, baa yaa pia yi po li fangili leni i jeje. N taa bikuli ki tieni yi nuu nni.

³ Yaala n fo ki pia miali kuli, n puni la lan tua yi po jiema, nani min puni yi yaala n pudi ki tinga nni kuli maama yeni.

⁴ Ama yin da ŋmani yanga leni ki miali, lani n tie ki soama.

⁵ Yi soama n tie yi miana. Lanwani, yaa nilo bi yaa yanga n bolini laa miali, U Tienu baa faa ki buali o li.

⁶ Yua n wuli o lielo soama, o nisaalilielo n baa wuli omoko yaa soama,

⁷ kelima U Tienu den tagi o nisaalo o yaa nannanli nne. Yinba, yin yaa maa a bila ki pugidi, yin go yadi mani ki tinga nni, ki yaa pili.»

⁸ U Tienu go den maadi leni Nowe leni o bijaba ki yedi ba:

⁹ «Diidi, n kuani o ŋantaado leni yinba leni yi bila yaaba n ŋua yi puoli.

¹⁰ N go kuani o ŋantaado leni yaa bonla n fo ki ye leni yikuli, lani n tie i nuani, ti denyandi, yaala n ñani ku ñinbiagu nni leni ki tinga nni yandi kuli.

¹¹ N niani yi ke tabolinkaaga ñincianma kan go cua ki bolini ki tinga.

¹² U Tienu den yedi, line n tie yaa maalima n doagidi ke n kuani o ŋantaado mini leni yinba. N go kuani o ŋantaado leni yaa bonfuoda n ye leni a kuli nifiima n tuu nifiima.

¹³ N bili n taniano ku tawaligu nni. O baa yaa tie o ŋantaado maalima mini leni ki tinga siiga.

¹⁴ N yaa taani ti tawadi ki tinga tanpoli, o taniano baa doagidi ku tawaligu nni,

¹⁵ ki tiadi n nianli mini leni yinba, a bonfuoda leni mialifo kuli siiga. Mi ñima kan go tua yaa ñincianma n baa bolini mialifo kuli.

¹⁶ O taniano baa yaa ye ti tawadi nni. N baa yaa diidi o, ki tiadi min bili yaa ñoanianu leni ki tinga bonfuoda kuli.

¹⁷ Lani n tie min bili yaa ñoanianu maalima mini leni ki tinga bonfuoda kuli siiga.»

Nowe bijataadiba

¹⁸ Nowe bijaba yaaba n den ñani ku ñinbiagu nni den tie Sem, Kam leni Jafeti. Kam den tie Kanana yaa baa.

¹⁹ Nowe bijataadiba yeni n den mali ki gbieni ki tinga kuli.

²⁰ Nowe den cili ki ko ki tinga ki ŋuu i duventiidi.

²¹ Dayenli o den ñuni duven ki gaadi ki landi o tiadi kuli o gbandieli nni.

²² Kanana baa Kam, den laa o baa mubima, ki waani o naataani ke bi ye niinpo.

²³ Lanwani, Sem leni Jafeti den taa bu kpalibu ki bugi bu bi boacaba po, ki cuoni sinsinpoli ki cua ki pini bi baa mubima. Baa den laa bi baa mubima, kelima bi den buli bi nunmu.

²⁴ Nowe n den fundi ke mi daama kagidi o po, o den gbadi ku waajuogu n tieni o yaala.

²⁵ O den yedi: «Kanana n tua ti solindi yua, Wan tua o kpeliba yonbi kuli yaa yonbo.»

²⁶ O go den yedi: «Li Miali Diedo, Sem n ŋua yaa Tienu n baa ti pagidi, Kanana n tua o yonbo.

²⁷ U Tienu n tandi ki pugini Jafeti piama, Wan yaa ye Sem yaa gbandiena nni, Kanana n tua bi yonbo.»

²⁸ Ki tabolinkaaga n den pendi, Nowe go den tieni bina kobitaa n piimuu.

²⁹ Nowe miali bina kuli den tie bina kobiyia n piimuu, li yaa puoli, o den kpe.