Mi cilima 8 - U TIENU MAAMA TILI 2013

¹ U Tienu den tiadi Nowe, ti moayandi leni ti denyandi yaadi n den ye leni o ku ñinbiagu nni kuli po. U Tienu den teni ke u faalu figi ki tinga nni, ke mi ñima ñuudi ki wadi.

² U kulu ñinbuna leni tanpoli bona kuli den luoni, ke ki taaga naa go den mi.

³ Mi ñima den cili ki ñuudi ki tinga nni. Mi ñima den wadi hali dana kobiga n piimuu bianu.

⁴ Cilele piiga n daleleeli, ku ñinbiagu den sedi Ararati juana yuli po.

⁵ Mi ñima den wadi wadi ki pundi hali cipiiga. Cipiiga dakpiali, a juana yula den ñiidi.

⁶ Dana piinaa n pendi, Nowe den luodi wan den tieni ku ñinbiagu yaa bonli.

⁷ O den ŋaa li kankali ke li ñani ki lindi ki goa, hali ki tinga n ban kuodi yaa yogunu.

⁸ O go den ŋaa ki kpaajiega mo, ki bua ki bandi mi ñima yaa wadi mi tinfanma nni.

⁹ Ama ki kpaajiega ki den baa kan baa jagini naani, lanwani ki den lebidi ki guani Nowe kani ku ñinbiagu nni, kelima mi ñima da den baa ki ye u tingbanu kuli po. Nowe den tandi o nuu ki cuo ka ki kuani ku ñinbiagu nni.

¹⁰ O den guudi danalele goga, ki go den ŋaa ki kpaajiega ke ki ñani ku biagu nni.

¹¹ Ku yenjuagu, ki kpaajiega den guani o kani ki babi olivie tibu faagu o ñoabu nni. Lanwani, Nowe den bandi ke mi ñima den wadi ki tinga nni.

¹² O go den guudi danalele, ki ŋaa ki kpaajiega ke ki gedi. Ama kaa go den guani o kani.

¹³ Kobiluoba n binyenli binli, ciyendo dakpiali, mi ñima den ñuudi. Nowe den pindi ku ñinbiagu bonpinkaala ki diidi ki sua ke mi tinfanma kuodi.

¹⁴ Cilie piilie n danalele, ki tinga den kuodi cain.

¹⁵ Lanwani, U Tienu den yedi Nowe:

¹⁶ «Ña ku ñinbiagu nni, fini leni a pua, a bijaba leni a biyuamu.

¹⁷ Go ñani yaa yandi buoli kuli n den ye leni a ku ñinbiagu nni yeni: i nuani, ti yandi leni li bonbalinkaala kuli. Teni ban ña ki yadi ki gbieni ki tinga kuli.»

¹⁸ Nowe den ñani leni o bijaba, o pua leni o biyuamu.

¹⁹ A bonfuoda moko: li bonbalinkaala, i nuani, yaala n balini tiipo, bonla kuli leni li buolu, bikuli den ñani ku ñinbiagu nni.

²⁰ Nowe den maa li padibinbinli o Diedo po. O den gandi ti yandi leni i nuani siiga yaaba n ŋani ki padi a padijuukaana li padibinbinli po.

²¹ O Diedo den gbadi yaa nuulu n mani o po. Lanwani, o Diedo den maadi o pali nni mi naa maama: «N kan go soli ki tinga kelima o nisaalo po, kelima o pali nni, o li tia mi biadima hali o biwaama yogunu. N kan go bolini yaala n fo kuli nani min tieni maama moala yeni.

²² Hali ki tinga n baa yaa ye, Ti jaadi leni u jetaagu, Ti wadi leni ku tontongu, Ku siagu leni li fali, U yensiinu leni ku ñiagu kan gbeni.»