Mi cilima 41 - U TIENU MAAMA TILI 2013

Faraon dangi ti dangidi

¹ Binalie n den pendi, Faraon den dangi ti dangidi. O den se u kpenciamu Nili kani.

² O den laa ke naañuanalele ya gbengi ki pia mi kpama, ki go ŋani bonŋanla den ñani u kpenu nni, ki se li boanjaali po, ki ŋmani ti muadi.

³ Li yaa puoli, naañuamulele, yaamu n gundi ki go kuodi mo den ñani u kpenu nni, ki cua ki balini ba ki se li boanjaali po.

⁴ Yaa naañuamu n kuodi ki go gundi yeni den ŋmani yaa naañuana n ŋani ki go pia mi kpama yeni. Lani, Faraon den fundi.

⁵ Faraon den guani ki go dangi mi taaliema.

⁶ O den laa disiandilele ke ti gbengi ki go ŋani ki se kankagiyenli po. Li yaa puoli, o go den laa disianmulele, ke mu jugi ke puoli faalu figi ke mu kuodi.

⁷ Mu disiankuonmu yeni den nali ti disiangbeeleleediti yeni. Faraon go den fundi. Lani n den tie o dangidi.

⁸ Lan fii ki faa, Faraon yama den yagi. O den teni ke bi yini Ejipiti ñoagidanba leni bi yanfuodanba kuli. Faraon den togidi ba o dangidi. Oba kuli naa den fidi ki waani Faraon li bundima.

⁹ Lanwani, yua n den tugi yaaba n tendi o bado o bonñokaala kuli yaa yuli yeni den yedi: «Faraon, ŋan sinja n po ke dinla n baa tiadi n tagili, min den bii yaa biili yaa maama.

¹⁰ Faraon pali den biidi o naacenba po, ke o teni ke bi luoni mini leni yua n den tugi yaaba die a bonjekaala kuli yuli, li kpaadidieli yudaano deni.

¹¹ Mini leni wani, ñiayengu ti den dangi yaa dangidi n pia mi bundima.

¹² Laa kpaadidieli den pia Hebilu yaaba siiga jawaayendo ke o den lo leni ti, ki tie li kpaadidieli yudaano yaa yonbo. Ti den togidi o ti dangidi. O den waani ti yuakuli dangidi n bundi yaala.

¹³ Li bonla kuli den tieni nani wan den bundi ti po ti dangidi maama yeni. Faraon den guani ki kuani nni n tuonli nni, ki teni ke bi soadi o lielo mo.»

Josefi bundi Faraon po o dangidi

¹⁴ Faraon den teni ke bi yini Josefi. Bi den jaligi ki ñani o li kpaadidieli nni. O den kuo o yuli leni o langbiadi, ki lebidi o tiadi, ki gedi Faraon kani.

¹⁵ Faraon den yedi Josefi: «N dangi ti dangidi. Oba kuli ki fidi ki baa waani nni tin bundi yaala. Ama n gbadi ke fini wani baa fidi ki bundi ban togidi a yaa dangidi.»

¹⁶ Josefi den guani ki yedi Faraon: «Mini ka baa fidi ki bundi ti dangidi. U Tienu n baa doagidi a po ti dangidi yeni n bua ki yedi yaala.»

¹⁷ Lanwani, Faraon den yedi Josefi: «N dangidi nni, n den se u kpenciamu boanjaali po.

¹⁸ Naañuanalele ya gbengi ki pia mi kpama, ki go ŋani den ñani u kpenciamu nni ki se li boanjaali po, ki ŋmani ti muadi.

¹⁹ Lani n pendi, naañuakuonmulele yaamu yaa noanlima n gundi, hali ke n daa kpa laa laa gundima buolu Ejipiti nni, mo den yuandi ki ñani.

²⁰ Mu naañuakuonmu yaamu n gundi yeni den ŋmani a naañualeleeda ya gbengi ki pia mi kpama yeni.

²¹ Ba ke mu den nali ba, mu den baa ki se ki tie bonkuonmu nani mi kpiama yeni leni mu gundima. Li yaa puoli, n den fundi.

²² Lani n pendi, n go den dangi ti naa dangidi: disiandilele ke ti gbengi ki go ŋani den ye kankagiyenli po.

²³ Disianjugimulele yaamu ke puoli faalu figi mu ke mu kuodi den yuandi ki pudi ti disiangbeedi kani.

²⁴ Mu disianjugimu yeni den nali ti disiangbeedi yeni. N togidi n ñoagidanba laa dangidi, ama baa fidi ki bundi n po. Waani nni lan bua ki yedi yaala.»

²⁵ Josefi den yedi Faraon: «Faraon, a dangiliediti kuli bundi bonyenla yo. U Tienu waani Faraon wan bua tieni yaale.

²⁶ A naañualeleediŋama yeni tie binalele yo, ti disiangbeeleleediti yaadi n ŋani yeni moko tie binalele goge. Likuli tie dangiyende.

²⁷ Yaa naañuamu n den kuodi ki go gundi yeni ki den ŋoadi bi kpiaba puoli yeni, muni moko tie binalele yo, muni leni yaa disianmu n den faani ki jugi ke puoli faalu cua ki waadi mu yeni kuli tie binalele kome.

²⁸ Lanwani, nani min yedi Faraon maama, U Tienu waani Faraon wan baa tieni yaale.

²⁹ Diidi li guokandikaali baa tugini binalele. Li baa yaa tie guocianle Ejipiti diema nni kuli.

³⁰ Laa bina yaa pendi, mi konbiadima baa cua Ejipiti diema nni kuli, ki waagi binalele.

³¹ Mi baa jugi mi diema hali bi niba n ban sundi yaa guoli n den tieni Ejipiti diema nni.

³² Laa dangidi n tieni figilimilie Faraon po yeni, li bua ki yedi ke U Tienu bili ke laa bonla baa tieni tilade. O baa teni lan jaligi ki tieni mo.

³³ Moala, yaama n ye n tie mine: Se Faraon n moandi ki baa yaa joa n pia mi yama, ki go tie yanfuodaano, ki teni wan diedi Ejipiti diema.

³⁴ Faraon n moandi ki gandi bi niba ki puogi ba, ban gaa li lubili yuakuli n baa ko yaa kpaandi yaa niinni. Bi yaa boagidi ti kpaandi yeni kaanimuu, kaanyendu n tua li lubili. Ti kpaandi kuli yaa kaanmuulu yeni ban yaa piadi ki biliti u, hali li guoli yaa binleleeda n ban pendi.

³⁵ A binleleeda yaa kpaandi kuli, ban taani ti ki dogini likuli ban gandi yaa kaanu, ki teni Faraon o ba n bandi ke li bonla kuli cuoni nani lan pundi maama, ki baa yaaba n baa yaa guu ti.

³⁶ Bi baa paadi ki bili laa kpaandi mi diema nni, ki bogini ki guudi mi koma binleleeda ya n kpendi Ejipiti diema nni yeni yaa po. Lani yaa ka, mi koma baa jugi mi diema.»

Josefi tua Faraon koanbali

³⁷ Laa maama den mangi ki go dagidi Faraon leni o naacenba kuli po.

³⁸ Faraon den yedi ba: «Naani ti baa fidi ki go baa yua n tie nani o naa joa, ki pia U Tienu Fuoma o niinni?»

³⁹ Faraon den yedi Josefi: «Yaala n teni ke U Tienu waani a line kuli yeni, yua go pia banma, bi yanfuoma nani fini yeni ki ye.

⁴⁰ Fini n baa yaa tugi n diema yuli, n niba po mo, ŋan yedi yaama, mani n baa yaa ye. Ti gbandi, min kaa yaadi yaa po bebe n baa yaa tie mini leni fini siiga mi paadima.»

⁴¹ Faraon den yedi Josefi: «Moala n puni a u sanu ŋan diedi Ejipiti diema kuli.»

⁴² Faraon den pidi o ñoagibima ki pilini Josefi. O den lani o yaa tiadi n ŋani ki pia ti kpiagidi, ki go den lani o wula laanu.

⁴³ O den teni ke bi kaani o o teligu yaagu n ŋua Faraon yaagu puoli, ki teni ke bi niba ye liiga ki kpaani ki tua: «Gafala mani daa! Yi faami mani daa!» Faraon den tieni yeni ki teni ke o diedi Ejipiti diema.

⁴⁴ Faraon go den yedi Josefi: «Mini n tie o bado. Oba kuli kan fidi ki tieni bonla Ejipiti diema nni ke ŋaa puni o li sanu.»

⁴⁵ Faraon den puni Josefi li yeli. Laa yeli n den tie Tisafinati-Panea. O den puni o o pua ke o yi Asinati, Poti-Fera, Oni kopadiciamo bisalo. Lanwani, Josefi den ñani ki baa diidi Ejipiti diema kuli.

⁴⁶ Josefi den pia bina piitaa wan den cua ki sedi yaa daali Ejipiti bado Faraon nintuali. Li yaa puoli, o den gaani i dogi nni kuli, ki baa bandi Ejipiti diema.

⁴⁷ Li guoli yaa binleleeda nni, bi niba den soani hali bonŋanla.

⁴⁸ Josefi den taani laa binleleeda yaa kpaandi Ejipiti diema nni. O den teni ke bi taani ti kpaandi kuli i dociami nni. A dobila nni mo yaa kpaandi, bi den taa ti ki cuani i dogbengi nni.

⁴⁹ Josefi den dogini ŋalikama nani mi ñincianma jaali tanbiili yeni, hali ke baa go den coadi lan den yabi ki da maama, kelima bi kan go den fidi ki coadi.

⁵⁰ Hali ke mi koma binkpiali daa den cili, Josefi pua Asinati yua n den tie Oni kopadiciamo, ban yi yua Poti-Fera bisalo den mali o po bonjalalie.

⁵¹ Josefi den yini o bijakpelo Manase, kelima o den yedi U Tienu teni ke n sundi n fala leni n baadiegu kuli.

⁵² Wan den yuandi ki mali yua mo, o den yini o Efrayimi, kelima o den yedi, U Tienu puni nni li baali min laa fala yaa diema nni.

⁵³ Ejipiti nni, li guoli binleleeda den pendi.

⁵⁴ Nani Josefi n den yedi maama, a binleleeda koma den cili. Yaa diema n sieni kuli yaa niinni, mi koma den ye, ama Ejipiti diema nni wani, li bonjekaala den ye.

⁵⁵ Mi diema nni yaaba kuli n den luo mi jiema yaa yogunu, bi den cua ki kpaani ki mia Faraon li bonjekaala. O den yedi ba: «Gedi mani Josefi po ki ban tieni wan baa yedi yi yaala.»

⁵⁶ Mi koma den ye Ejipiti diema nni kuli, ki kubi bi niba boncianla. Josefi den teni ke bi luodi a buabuana i dogi nni kuli, ki kuadi Ejipiti yaaba po ŋalikama. Mi koma den baa ki biagidi ki pugidi Ejipiti nni.

⁵⁷ Yaa diema n sieni kuli yaa niba den kpendi Ejipiti nni ki baa magi ŋalikama Josefi kani, kelima mi koma den biagi boncianla ki tinga nni kuli.