Mi cilima 4 - U TIENU MAAMA TILI 2013

Kayini leni Abeli togida

¹ Adama den bandi o pua Awa, o den punbi ki mali Kayini. O den yedi: «O Diedo todi nni ke n mali o joa.»

² O go den mali Kayini waalo Abeli. Abeli den tua yankpaalo, Kayini mo kpakpaalo.

³ Yogunuba n den pendi, Kayini den cuani bu paabu U Tienu po, yaabu n tie ki tinga bonluonkaala.

⁴ Abeli moko den cuani o yaa paabu, yaabu n den tie o yankulu nni o pebikpiala leni bi kpama. O Diedo den nuali Abeli yaa paabu leni ki nunmanga.

⁵ Ama waa den nuali Kayini leni o paabu kuli leni nunmanga. Lani, Kayini pali den beni boncianla ke o nunga kuli biidi.

⁶ O Diedo den yedi Kayini: «Be yaa po yo ke a bieni a pali, ke a nunga mo go biidi?

⁷ I moamoani a yaa tieni yaala n ŋani, a nunga baa yaa ŋani. Ama a yaa tieni yaala n bia, ti tuonbiadi dua a buliñoabu kani, ki sugini ki diedi a. Ama fini, ŋan moandi ki paadi ti.»

⁸ Die ba yeni, Kayini den yini o waalo Abeli ke bi gedi li fuali po. Ban den ye lipo, Kayini den bibi o waalo Abeli, ki kpa o.

⁹ O Diedo den yedi: «Kayini, a waalo Abeli ye le?» O den guani ki yedi o: «Mii bani. Naani n tie n waalo guudo yo?»

¹⁰ Lanwani, U Tienu den guani ki yedi o: «A tieni be? A waalo soama bubula nialu ñani ki tinga nni ki pundi n kani.

¹¹ Moala liiga, a baa yaa tie ti solindi yua ki tinga nni, yaaga n den yaadi ki ñoabu ki gaa a waalo soama a nuu nni yeni.

¹² A yaa koni ki tinga, ki kan guani a po ki baali. A baa yaa tie o lianliamo leni o puapuagido ki tinga nni.»

¹³ Kayini den yedi: «O Diedo, n tagili panpaani kpiagi ki cie n gbanmanu.

¹⁴ Diidi, dinla a deli ki ñani nni ki naa tinŋanga nni. N baa yaa wuo naani n foagi leni a. N baa yaa tie lianliamo leni o puapuagido ki tinga nni. Yua n laa nni kuli baa kpa nni.»

¹⁵ O Diedo den yedi: «O nilo yaa kpa Kayini, o baa guani ki baa o biadima panpaani taalimilele, kelima Kayini po.» O Diedo den tieni mi maalima Kayini po, ke yua n laa o kuli n da kpa o.

¹⁶ Lanwani, Kayini den sani ki foagidi leni o Diedo. O deni den ye Nodi diema nni, yaama n ye Edeni puoli po.

Kayini puoliŋuani

¹⁷ Kayini den bandi o pua ke o den punbi ki mali Enoki. Lan pendi, o den cili o dogu ki yini u o bijua Enoki yeli.

¹⁸ Enoki den mali Iradi, Iradi den mali Mehujaeli, Mehujaeli den mali Metusaeli, Metusaeli mo den mali Lemeki.

¹⁹ Lemeki den taa puobilie, puoyendo den yi Ada, o lielo mo Tisila.

²⁰ Ada den mali Yabali, yua n den tie yaa nibuolu n yen ye a gbandiena nni, ki kpaa bi yandi kuli yaaja.

²¹ O waalo den yi Yubali. Yubali den tie yaa nibuolu n pua ti gogiditi, ki go tie yaaba n piebi mu yelimu kuli yaaja.

²² Tisila moko den mali Tubali-Kayini, yua n den maa yaa tiadi n tie ti kumoandi leni ti kuboandi kuli. Tubali-Kayini waalo, yua n den tie pua, den yi Naama.

²³ Lemeki den yedi o puoba Ada leni Tisila: «Cengi mani n maama bonŋanla. Diadi mani yi tuba ki cengi n yedima. N den kpa o nilo kelima o den faligi nni. N den kpa o jawaalo kelima o den poagili nni.

²⁴ Bi yaa guani i biadipanpaani Kayini po taalimilele, Bi baa guani Lemeki po piilele n taalimilele.»

²⁵ Adama go den bandi o pua ke o go mali bonjaga. O den yini o yeli Seti, kelima o den yedi: «U Tienu den puni nni bonjatoaga, ke o gaa Abeli kaanu, Kayini n den kpa yua.»

²⁶ Seti moko den mali bonjaga ki yini o Enosi. Lanyogunu yo, ke bi niba den cili ki jaandi Li Miali Diedo yeli nni.