Mi cilima 3 - U TIENU MAAMA TILI 2013

O joa leni o pua miidi U Tienu kuali

¹ U Tienu n den tagi yaa moayandi kuli siiga, o wa n den fani ki cie bikuli. O wa yeni den yedi o pua: «Naani li li tie moamoane ke o Diedo yedi: ‹Yin da ŋmani u koaŋamu tiidi bonluonkaala kuli?› »

² O pua den yedi o wa: «Ti baa fidi ki ŋmani u koaŋamu tiidi bonluonkaala.

³ Ama yaa tibu n se u koaŋamu siiga yaa bonluonkaala wani, U Tienu den yedi: ‹Yin da ŋmani la, ki da sii la mo, ke yin da ti kpe.› »

⁴ O wa den yedi o pua: «Yi kan kpe ba.

⁵ Li tie ke U Tienu bani ke yi yaa ŋmani la yaa daali, yi nuni baa ŋubidi, ke yi baa yaa tie nani wani yeni, ki bani mi ŋanma leni mi biadima paadima.»

⁶ O pua den laa ke bu tibu bonluonkaala mani mi jiema po, ki go ŋani bu nunbu po, ki tie yaa bonbuadila n baa teni o nilo n baa mi yanfuoma. O den cie bu bonluonkaala ki ŋmani, ki puni o calo yua n den ye o kani, ke omo ŋmani.

⁷ Bikuli nuni den ŋubidi ke bi den bandi ke bi ye mubima. Bi den ŋali ti kankanfaadi, ki tieni a kpataana.

⁸ Bi den gbadi o Diedo U Tienu nialu ke o den goadi u koaŋamu nni ku yenjuaboandigu. O joa leni o pua den sani ki wuoni u koaŋamu tiidi siiga, ki foagidi leni o Diedo U Tienu nunga.

⁹ Li Miali Diedo U Tienu den yini o joa ki yedi o: «A ye le?»

¹⁰ O den yedi: «N gbadi a nialu u koaŋamu nni ki jie ki sani ki wuoni, kelima n ye mubima.»

¹¹ Li Miali Diedo U Tienu den yedi: «Ŋme n waani a ke a ye mubima? Naani a ŋmani min den kuani a ke ŋan da ŋmani yaa tibu bonluonkaala yene?»

¹² O joa den yedi: «Ŋan den puni nni yaa pua yeni, wani n teni nni bu tibu yeni bonluonkaala ke n ŋmani.»

¹³ Li Miali Diedo U Tienu den yedi o pua: «Be yaa po yo ke a tieni line?» O pua den yedi: «O wa n boandi nni, ke n ŋmani.»

¹⁴ O Diedo U Tienu den yedi o wa: «Nani ŋan tieni lani yeni, A baa yaa tie ti solindi yua ti denyandi kuli siiga Leni ti moayandi kuli siiga. A baa yaa fuli a tugu po, Ki di mi tama hali a miali banlu.

¹⁵ N baa bili ti yibalindi fini leni o pua siiga, A puoliŋuani leni o puoliŋuani siiga. O baa mudi a yuli, Amo baa poagili o taajentindili.»

¹⁶ O den yedi o pua: «N baa pugini a po fala ŋan punbi yaa yogunu. A baa maa leni fala. A gbanandi bonbuakaala baa teni ŋan ŋoadi a calo, O baa diedi a.»

¹⁷ O den yedi o joa: «Nani ŋan cengi a pua maama, Ki ŋmani min den kuani a ŋan da ŋmani yaa tibu bonluonkaala yeni, Ki tinga baa tua ti solindi yaaga, kelima fini yaa po. A baa yaa baadi ki niinni a bonjekaala leni fala, Hali a miali banlu.

¹⁸ Ti moabiaditi leni i konkoni baa pudi ki tinga po, A baa yaa di yaa bonjekaala n ye u kuanu nni.

¹⁹ A baa soani li tuonli ki mande, ki nan baa li bonjekaala, Hali ŋan baa guani ki tinga nni, Ŋan den ñani naankani, Kelima a tie mi tama, ki go baa guani mi tama nni.»

²⁰ Adama den yini o pua yeli Awa, kelima o den tie mialifo kuli naa.

²¹ Li Miali Diedo U Tienu den tieni ti gbandi liada Adama leni o pua po, ki lani ba.

²² Li Miali Diedo U Tienu den yedi: «Moala ke o nisaalo kpandi ki tua nani tinba yeni, ki bandi mi ŋanma leni mi biadima paadima, tin yie o po ke wan da tandi o nuu ki cie li miali tibu bonluonkaala ki ŋmani, ki yaa ye ki naa pia juodima.»

²³ Li Miali Diedo U Tienu den deli ki ñani Adama Edeni koaŋamu nni, ke wan yaa ko ki tinga wan ñani yaaga yaa niinni yeni.

²⁴ Wan den deli Adama yeni, o den sieni selubanba ke bi fuundi yaa jugisiemu n pia u mu Edeni koaŋamu puoli, ke ban yaa guu li miali tibu sanu.