Mi cilima 2 - U TIENU MAAMA TILI 2013

¹ Lanwani, U Tienu den tagi tanpoli, ki tinga leni yaala n ye lienni kuli ki gbeni.

² U Tienu n den baa soani yaa tuonli kuli, o den soani ki gbeni li. Li daleleeli, o den fuodi.

³ U Tienu den seligi li daleleeli ki gagidi li kelima o den cedi o tuonli, wan den tagi ki tieni yaala kuli, ki fuodi landaali.

Edeni koaŋamu

⁴ Line n tie tanpoli leni ki tinga cilima, o Diedo U Tienu n den tagi la yaa yogunu.

⁵ Fatuuguba kuli daa den ye ki tinga po, muadiba mo kuli daa den pudi. Li den tie kelima o Diedo U Tienu daa den teni ke ki taaga mini ki tinga nni, niloba kuli mo daa den ye ki baa ko ki tinga.

⁶ Ama ku mangu yen fii ki luoni ki tinga po, ki soangi mi tinfanma kuli.

⁷ O Diedo den taa ki tinga tama ki tagi o nisaalo. O den fuo o miani nni li miali fuoma, ke o nisaalo tua yaa miali n fo.

⁸ Lanwani, o Diedo U Tienu den tieni u koaŋamu Edeni kani, ki tiegi puoli po. O den taa wan tagi yaa nilo ki kuani o lienni.

⁹ Li Miali Diedo U Tienu den teni ke i tiidi buoli kuli pudi ki tinga po, yii ŋani bu nunbu po, ki go mani mi jiema po. Li miali tibu den se u koaŋamu siiga nni leni mi ŋanma leni mi biadima bandima tibu.

¹⁰ Yaa kpenu n puubi den ñani Edeni nni, ki baa yaa soangidi u koaŋamu. Likani, u den boagidi ki tua kpentaananaa.

¹¹ U kpenkpialu yi Pison, li tie yaa kpenu n lindi Hafila diema kuli, wula n ye naankani.

¹² Laa diema yaa wula ŋani cain. Yaa tisinma n yi bideliomi leni yaa tanli n pia mayuli, ke li dunga pa ki yi onigisi kuli ye laa diema nne.

¹³ U kpenlielu yi Gihoni, wuni n tie yaa kpenu n lindi Kusi diema kuli.

¹⁴ U kpentaalu yi Hidekela, wuni n tagi Asiiri yaa puoli po. U kpennaalu mo yi Efrati.

¹⁵ Li Miali Diedo U Tienu den taa o nisaalo ki kuani Edeni koaŋamu nni, ke wan yaa ko ki go guu u.

¹⁶ Li Miali Diedo U Tienu den bili o nilo po yaa ñoamabonli n tie ne: «A baa fidi ki ŋmani u koaŋamu yaa tiidi bonluonkaala kuli.

¹⁷ Ama ŋan da ŋmani mi ŋanma leni mi biadima bandima tibu bonluonkaala, kelima a yaa ŋmani la yaa daali, a baa kpe.»

¹⁸ O Diedo den yedi: «Laa ŋani ke o nisaalo n yaa ye o bebe. N baa tagi o po o todika yua n naani leni o.»

¹⁹ Li Miali Diedo U Tienu den taa ti tandi ki tagi ti moayandi leni tanpoli bonyugiditi kuli. O den teni ke bi cua o nisaalo kani, ke wan le wan baa cili ba yaa yela. Lani, bonfuodila kuli baa yaa kubi o nisaalo n baa pa o yaa yeli.

²⁰ O nilo den puni ti denyandi, tanpoli bonyugiditi leni ti moayandi kuli a yela, ama waa den laa o yuli po, yaa todika n naani leni o.

²¹ Lanwani, o Diedo U Tienu den teni ke mi guacianma cuo o joa, ke o guani. O den ñani o kalikpaba siiga nni kpabiyenli, ki teni ke ti gbanandi go guani ti kaanu ki ŋanbi.

²² Li Miali Diedo U Tienu den taa li kalikpabili, wan den ñani yaali o joa kani ki tagi o pua, ki gedini o o joa kani.

²³ O joa den yedi: «Moala wani, diidi ki le yua n tie n kpabili yaa kpabili Leni n gbanandi yaa gbanandi. Bi baa cili o yeli o pua, Kelima bi den ñani o o joa yaa niinne.»

²⁴ Li tie lani yaa po yo ke o joa baa ña o baa leni o naa kani, ki ban taani leni o pua, ban tua gbananyendi.

²⁵ O joa leni o pua kuli den ye mubima, ke fe ki pia ba lipo.