Mi cilima 18 - U TIENU MAAMA TILI 2013

U Tienu waani ke Sala baa maa bonjaga

¹ O Diedo den doagidi Abalahama kani ke o ye Manmire seni tiidi kani. Wan den kaa o gbandieli buliñoabu nni u yensiicocolu,

² Abalahama den yaadi ki diidi, ki laa nibitaa ke bi se o nintuali. Wan den laa ba yaa yogunu, o den fii ki sani ki tuogi ba, ki gbaani ki pugi ba.

³ O den yedi bi siiga nni yendo: «N Diedo, li yaa tie ke a pali mani n po, n mia ŋa ŋan da pendi ki foagidi leni a naacemo.

⁴ Cedi min yini ban cuani yi po mi ñima waamu, yin nigidi yi taana, ki fuodi bu naa tibu tinga.

⁵ N baa gedi ki baa mi jiema waamu ki pugini yi fidu. Li yaa pendi, yi baa fidi ki suagi liiga, lani n tie yin da ña yi naacemo kani fanma.» Bi den guani ki yedi o: «Tieni nani ŋan yedi maama.»

⁶ Abalahama den gedi tontoni ki kua o gbandieli nni Sala kani, ki yedi o: «Tontoni, ŋan taa mi yonŋanma yiemutaa ki buuni ki ŋanbi mi jiema.»

⁷ Abalahama go den sani ki gedi o yankulu po, ki taa ki naabiga yaaga n ŋaani ki pia mi kpama, ki teni o naacemo ke o ŋanbi o tontoni.

⁸ O go den taa mi naaŋankpama leni mi naaŋanma, ki taa ban den ŋanbi yaa naabiga yaa nandi, ki sieni likuli bi nintuali. O den ye leni ba bu tibu tinga ban den di yaa yogunu.

⁹ Lanwani, bi den yedi o: «A pua Sala ye le?» O den guani ki yedi ba: «O ye li gbandieli nni.»

¹⁰ Bi siiga yendo den yedi: «N go baa cua a kani binli po u naa yogunu. Diidi a pua Sala baa maa bonjaga.» Sala den ye o puoli po li gbandieli buliñoabu kani, ki cengi.

¹¹ Abalahama leni Sala den kpeligi ki podi. Sala naa go den daani ke o baa baa biga. O den laa o pali nni ki yedi:

¹² «Moala ke n podi boncianla, naani n go pia joa ŋantaadi? N daano mo podi.»

¹³ O Diedo den yedi Abalahama: «Be yaa po ke Sala laa ki yedi: ‹Naani li tie moamoane ke min podi boncianla maama ne, n go baa fidi ki maa?› »

¹⁴ Naani li pia o Diedo n kan fidi ki tieni yaala? Binli po lan bili yaa yogunu yaa cua, n baa cua a kani, li baa sua ke Sala mali bonjaga.

¹⁵ Sala n den jie yeni, o den nia ki yedi: «Mii laa ba.» O Diedo den guani ki yedi o: «Moamoani a laa.»

¹⁶ Laa niba den fii ki baa suagi liiga, bi den pegidi ki noanli Sodomi po. Abalahama den yegi leni o ki piadi ba.

¹⁷ Lanwani, o Diedo den yedi: «Naani n baa wuoni Abalahama min baa tieni yaala?

¹⁸ Li tie i moamoani cain ke Abalahama baa tua yaa nibuolu n yabi, ki pia u paalu. Ki tinga nibuoli kuli baa baa li seli kelima o po.

¹⁹ N den gandi wani ke wan bili li ñoamabonli o bijaba leni o diegu yaaba po, yaaba n baa ŋoadi o puoli, ki baa yaa kubi o Diedo sanu, ki go tiendi yaala n tiegi, ki kubi mi teginma. Li tie lani yaa po ke o Diedo baa tieni Abalahama po wan den niani o yaala kuli.»

²⁰ O Diedo den yedi: «Bi niba mua Sodomi leni Gomori yaaba biadima, bi tuonbiadi yabi hali ke li pendi.

²¹ Lani n teni ke n baa jiidi ki le ban tiendi yaala yaa naani nani min gba maama. Li yàá tie yeni mo, n baa bandi.»

²² Bi jaliediba den fii ki suagi Sodomi po. Ama o Diedo wani den sedi leni Abalahama.

²³ Abalahama den nagini ki yedi: «Naani a baa teni bi niteginkaaba n taani ki bodi leni bi nibiadiba?

²⁴ Daalinba niteginkaaba piimuu n ye u dogu nni, naani a baa bolini laa dogu, ki kan tieni sugili u po, kelima niteginkaaba piimuu yeni po?

²⁵ A kan tuo o niteginka n taani ki kpe leni o nibiado. A kan tuo o niteginka n tua yenma leni o nibiado. Laa tuonli buolu foagi leni a. Li foagi leni a cain. Naani yua n ja ti buudi leni ki tinga yaaba kuli, o kan tieni mi teginma?»

²⁶ O Diedo den yedi: «N yaa laa niteginkaaba piimuu Sodomi dogu nni, n baa tieni u dogu kuli po sugili, kelima bi yaa po.»

²⁷ Abalahama go den guani ki maadi ki yedi: «Diidi, n ñigini ki maadi leni n Diedo mini yua n tie mi wagima leni mi fantanpienma bebe.

²⁸ Daalinba niteginkaaba piimuu yeni siiga, nibimuu bebe n baa poadi. Naani a baa bolini u dogu kuli kelima bi nimuudiba yaaba n poadi yeni po?» O Diedo den guani ki yedi o: «N yaa laa niteginkaaba piinaa n nibimuu u niinni, n kan bolini laa dogu.»

²⁹ Abalahama go den maadi leni o ki yedi: «Daalinba bi yaa ye niteginkaaba piinaa bebe te?» O Diedo den yedi: «N kan tieni puu kelima laa nipiinaadi po.»

³⁰ Abalahama den yedi: «N Diedo n da bieni o pali ke n go baa maadi. Daalinba bi yaa ye niteginkaaba piitaa bebe mo te?» O Diedo den yedi: «N kan tieni puu n yaa laa niteginkaaba piitaa.»

³¹ Abalahama go den yedi: «Diidi n paagi n pali ki maadi leni n Diedo. Daalinba bi yaa ye niteginkaaba piilie bebe te?» O Diedo den yedi: «N kan bolini u kelima laa nipiiliedi po.»

³² Abalahama go den yedi: «N Diedo n da bieni o pali, n go baa maadi yenma bebe. Daalinba bi yaa ye niteginkaaba piiga bebe mo te?» O Diedo den yedi: «N kan bolini u kelima laa nipiiga po.»

³³ O Diedo n den maadi leni Abalahama ki gbeni yaa yogunu, o den gedi. Abalahama den guani o denpo.