Mi cilima 11 - U TIENU MAAMA TILI 2013

Babeli diefoagili

¹ Lanyogunu ki tinga niba kuli den maadi mabuoyendu leni mayenma.

² Bi den ñani puoli diema ki ban pundi yaa joaloangu n ye Sineari diema nni, ki kali lankani.

³ Bi den yedi biyaba: «Cua mani tin pua i tankonkuomi ki puli yi.» I tankonkuomi den tie bi po nani a tana yeni, ki tinga sinboanma mo den tie bi po nani mi tankpama yeni.

⁴ Bi go den yedi: «Cua mani tin cili ki maa u dogu leni li diefoagili, yaali n baa kpedi ki pundi tanpoli. Lani n tie ti yeli n ña hali boncianla. Yeni, ti kan go yadi ki tinga nni mo.»

⁵ O Diedo den ñani tanpoli ki jiidi ki baa le u dociamu leni bi nisaaliba n maa yaa diefoagili.

⁶ O Diedo den yedi: «Diidi, bi tie nibuoyendu, bikuli go taa mabuoyendu mo. Lani n teni ke bi cili laa tuonli. Moala, puu kan go yie bi po ban jagi ke bi baa tieni yaala kuli yaa niinni.

⁷ Cua mani tin jiidi ki ŋmadi bi maama, lani n tie ban da go gbadi biyaba maama.»

⁸ O Diedo den yadi ba hali foagima mi tinfanma po, ke bi den cedi kaa go maa u dogu yeni.

⁹ Lani yaa po n teni, ke bi yini u dogu yeni Babeli, kelima o Diedo den ŋmadi ki tinga yaaba kuli maama lankane. Li go den tie lankane ke o Diedo den yadi ba mi tinfanma kuli nni.

Sem leni o puoliŋuani togida

¹⁰ Bine n tie Sem yaabila, ki tabolinkaaga n den pendi ke li tieni binalie. Sem n den pia bina kobiga, o den mali Alipakisadi.

¹¹ Sem n den mali Alipakisadi, o den tieni bina kobimuu, ki mali a bonjala leni a bonpola.

¹² Alipakisadi n den pia piitaa n binamuu yaa yogunu, o den mali Sela.

¹³ Alipakisadi n den mali Sela, o go den tieni kobinaa n binataa, ki mali a bonjala leni a bonpola.

¹⁴ Sela n den pia bina piitaa yaa yogunu, o den mali Heberi.

¹⁵ Sela n den mali Heberi, o go den tieni kobinaa n binataa, ki mali a bonjala leni a bonpola.

¹⁶ Heberi n den pia piitaa n binanaa yaa yogunu, o den mali Pelegi.

¹⁷ Heberi n den mali Pelegi, o go den tieni bina kobinaa n piitaa, ki mali a bonjala leni a bonpola.

¹⁸ Pelegi n den pia bina piitaa yaa yogunu, o den mali Reu.

¹⁹ Pelegi n den mali Reu, o go den tieni kobilie n binayia, ki mali a bonjala leni a bonpola.

²⁰ Reu n den pia piitaa n binalie yaa yogunu, o den mali Serugi.

²¹ Reu n den mali Serugi, o go den tieni kobilie n binalele, ki mali a bonjala leni a bonpola.

²² Serugi n den pia bina piitaa yaa yogunu, o den mali Nahori.

²³ Serugi n den mali Nahori, o go den tieni bina kobilie, ki mali a bonjala leni a bonpola.

²⁴ Nahori n den pia piilie n binayia yaa yogunu, o den mali Tera.

²⁵ Nahori n den mali Tera, o go den tieni kobiga n piiga n binayia, ki mali a bonjala leni a bonpola.

²⁶ Tera n den pia bina piilele yaa yogunu, o den mali Abalama, Nahori leni Harani.

Line n tie Tera leni Abalama togida

²⁷ Mine n tie Tera yaabila maama. Tera den mali Abalama, Nahori leni Harani. Harani mo den mali Loti.

²⁸ Harani den kpe o maadogu Uri nni, Kalide diema nni ke o baa Tera da ye.

²⁹ Abalama leni Nahori den taa bi puoba. Abalama pua den yi Sarayi, Nahori yaa pua mo den yi Milika, Harani bisalo. Harani den tie Milika leni Jisika baa.

³⁰ Sarayi den tie ŋoaliga, kaa pia biga.

³¹ Tera den taa o bijua Abalama leni Loti, o bijua Harani bijua, ki go taa o biyuaga Sarayi, o bijua Abalama pua, ke bi fii ki gedi u dogu. Bi den taani ki fii Uri dogu nni, Kalide diema nni ki baa gedi hali Kanana diema nni. Bi den pundi Harani dogu, ki jiidi ki baa yaa ye lankani.

³² Tera bina kuli den tie kobilie n binamuu. Tera den kpe Harani dogu nni.