Matie 20 - U TIENU MAAMA TILI 2013

Duven tiidi kuanu tuonsoanba

¹ Jesu den yedi: «Tanpoli diema tie nani yaa koadaano n den ñani ku tiŋaapanpangu, ki baa taa bi tuonsoanba o duventiidi kuanu tuonli po.

² Wani leni bani den maadi ki kadi, ke o baa pa ba kujapienyenli yenli daali kuli. Li yaa puoli, o den cedi ke bi gedi o kuanu po.

³ U yienu n den paagi ke o go ñani, o den laa nitoaba ke bi ye ki daaga nni kaa tuuni liba.

⁴ O den yedi ba: ‹Yimo n gedi mani n kuanu po, n baa pa yi lan dagidi.›

⁵ Bi den gedi. O go den ñani u yensiinu leni li yenlebidili kuli ki tieni yeni.

⁶ U yienu n bua ki kua yaa yogunu, o go den ñani ki laa nitoaba ke bi se ki daaga nni. O den buali ba: ‹Be yaa po ke yi tundi ki se ne kaa tuuni liba?›

⁷ Bi den guani ki yedi: ‹Oba naa taa ti tuonli.› O den yedi ba: ‹Yimo n gedi n kuanu po.›

⁸ Ku joaboandigu n den pundi, o koadaano den yedi o tuonsoanjiido: ‹Yini bi tuonsoanba na ki pa ba bi pani, ki cili leni yaaba n yuandi ki kua, ki ban juodi leni yaaba n kpa kua.›

⁹ Yaaba n den kua ke u yienu bua ki baa yeni, den cua ki gaa kujapienyenli yenli.

¹⁰ Yaaba n den kpa kua mo den cua ki tama ke bi baa gaa ki cie yeni, ama bimoko den gaa kujapienyenli yenli.

¹¹ Ban den gaa, bi den yenbidi o koadaano po,

¹² ki tua: ‹Yaaba n yuandi ki kua, soani u yogunu waamu bebe, ke a nan taani ki pani bani leni tinba kuli yenma, tinba yaaba n tundi ki tuuni ki yenbiadiga nni ki laadi fala.›

¹³ O koadaano den guani ki yedi bi siiga nni yendo: ‹N danli, mii tudi a po. Tii bi maadi ki kadi ke n baa pa ŋa kujapienyenli ka?

¹⁴ Gaa ŋan die yaala ki fuadi likani. N pia u sanu ki teni yua n yuandi na nani min pani a maama.

¹⁵ Mii pia sanu ki tieni min die yaala min bua maama bi? Li nunponli cuo ŋa, kelima min ŋani yeni po yo?› »

¹⁶ Jesu den juodi ki yedi: «Yene ke puoli yaaba baa ti tua liiga yaaba, liiga yaaba mo baa ti tua puoli yaaba.»

Jesu waani mi taataama ke o baa kpe ki go fii

¹⁷ Jesu n den do ki caa Jerusalemi leni bi piiga n niliediba, o den piadi leni ba. Li cenli siiga, o den yedi ba:

¹⁸ «Cengi mani, ti do ki caa Jerusalemi. Bi baa cuo o Joa Bijua ki teni bi kopadicianba yudanba leni li bali maama banda. Bi baa jia o buudi ki bili ke ban kpa o.

¹⁹ Bi baa teni o bi nilanba ban ñuadi o, ki pua o i baliji, ki kpaa ki tabini o li dapoanpoanli po. Ama li dataali daali, o baa fii bi tinkpiba siiga.»

Jaki leni Jan naa miabu

²⁰ Li yaa puoli, Sebede bijaba naa den nagini Jesu kani leni o bila, ki gbaani o nintuali ki baa mia o bu miabu.

²¹ Jesu den buali o: «A bua be?» O den guani ki yedi o: «N bua ŋan bili ke a yaa ti kaa ti gbandi po yaa yogunu, n bilieda na n yaa kaa yendo a jienu, yendo mo a ganu.»

²² Jesu den guani ki yedi: «Yii bani yin miadi yaala. Yi baa fidi ki ño min baa ño yaa tadiñokaaga bi?» Bi den yedi o: «Ti baa fidi.»

²³ O den guani ki yedi ba: «Moamoane ke yi baa ño min baa ño yaa tadiñokaaga, ama ki kaani o nilo n jienu yaa ka n ganu, laa ŋua mini, li tie n Baa n bili la yaaba yaa po yo.»

²⁴ Ŋoadikaaba piiga yaaba n sieni n den gbadi lani, bi pala den beni bi naataanliediba yeni po.

²⁵ Jesu den yini ba ki yedi: «Yi bani ke i nilanbuoli badiba mabindi ba, bi paatieba mo die ba leni u paalu.

²⁶ Lan da tie yeni yi siiga. Yi siiga yua n bua ki tua niciamo kuli, wan tua yi naacemo.

²⁷ Yua mo n bua ki tua liiga yua kuli, wan tua yi yonbo.

²⁸ Lani n cedi ke o Joa Bijua ki cua ke bi niba n yaa tuuni o po ka, ama o cua ki baa yaa tuuni bi niba po, ki pa o miali, ki daa ki faabi bi niba boncianla.»

Jesu noadi juamalie

²⁹ Jesu leni o ŋoadikaaba n den ña Jeriko dogu nni, yaa niligu n yabi den ŋua o.

³⁰ Juamalie den kaa u sankunu. Ban den gbadi ke Jesu tagini ki baa pendi, bi den tangi: «Ti Daano, Davidi Bijua, gbadi ti po mi ninñima.»

³¹ Ku niligu den funi leni ba ki yedi ke ban suo, ama bi go den tangi ki pugidi: «Ti Daano, Davidi Bijua, gbadi ti po mi ninñima.»

³² Jesu den sedi ki yini ba ki buali: «Yi bua min tieni yi po be?»

³³ Bi den guani ki yedi: «Ti Daano, ti bua ŋan pa ti ti nuni n yaa nua.»

³⁴ Mi ninñima den cuo Jesu ke o sii bi nuni. Lanyogunu bi nuni go den nua, ke bi ŋoadi o.