Matie 10 - U TIENU MAAMA TILI 2013

Bi piiga n tondiliediba

¹ Jesu den yini o piiga n ŋoadikaliediba ki dini ba li bali. O den puni ba u paalu ke ban yaa deli ki ñandi mu cicibiadimu. O go den puni ba u paalu ke ban yaa paagidi bi niba, bi yianbuoli leni bi tadinbuoli kuli po.

² Bi piiga n tondiliediba yeni yela n tie ne: Yua n kpia, Simon ban go yi yua Pieli leni o waalo Andre, Sebede bijua Jaki leni o waalo Jan,

³ Filipi leni Batelemi, Toma leni o lubigaalo Matie, Alife bijua Jaki leni Tade,

⁴ Simon ban yi yua o Yankuadaano leni Judasi Isikarioti yua n den yuandi ki janbi Jesu.

Jesu soani o piiga n tondiliediba

⁵ Bani n tie Jesu n den soani o piiga n niliediba yaaba, ki teni ba yaa ñoamabonli n tie ne:

⁶ «Da gedi mani bi nilanba po, ki da kua Samari yaaba dogi nni mo, ama yin gedi Isidayeli buolu po, bani yaaba n tie nani yaa pe n yaadi yeni.

⁷ Yin tagi naankani kuli, yin yaa wangi ke U Tienu diema nagini.

⁸ Yin yaa paagidi a yiama, ki fiindi bi tinkpiba, ki ŋanbidi a gbaada, ki deli mu cicibiadimu. Yi den baa fanma, yimo n yaa puuni fanma.

⁹ Da ŋuuni mani wula, ŋanjilifa, yaa ka i ligi kuli yi ŋuuni nni,

¹⁰ ki da taa sancenboagili, liadalie, cacaadi yaa ka gbiamu, kelima o tuonsoanlo pundi ki baa o bonjekaala.

¹¹ Yin kua yaa dociamu nni leni yaa dowaalu nni kuli, yin buali ki bandi yaa nilo n baa tuo ki gaa yi cangu yaa ye likani. Yin caani o yaa deni hali yin baa n fii yaa yogunu.

¹² Yi yaa kua yaa diegu nni kuli, yin fuondi ba ki yedi: ‹Mi yanduanma n yaa ye leni yi.›

¹³ Yi yaa sua ke ku diegu yaaba gaa yi cangu, yin gaali ba yaa yanduanma n yaa ye leni ba. Ama bi yàá gaa yi cangu mo, yi gaali n guani yi kani.

¹⁴ Bi yàá tuo ki gaa yi cangu, kaa cengi yi maama, yi yaa ña likani, yin kpia ba yi taatama.

¹⁵ N waani yi i moamoani, ti buudi daali Sodomi leni Gomori yaaba fala kan pundi laa dogu yaaba yaa fala.

Bi niba n baa waani Jesu tondiba yaa fala

¹⁶ Cengi mani: N soani yi nani i pe yene i fuasangbanli siiga. Yin yaa fani nani i we yeni, ki go yaa dingi nani mu kpaajiemu yeni.

¹⁷ Fangi mani yi yula leni bi niba, kelima bi baa yaa co ki caani yi li bujiali kani. Bi baa pua yi i baliji li bali maama bangima diena nni.

¹⁸ Bi baa yaa caani yi guveneerinba leni bi badiba kani kelima n yaa po, ke yin tua bi po siedi bani leni bi nilanba po kuli.

¹⁹ Bi yaa ti cuo ki gedini yi li bujiali kani yaa yogunu, yin da yagi yi yama, yin baa maadi maama leni yin baa yedi yaala kuli po, kelima lanyogunu, bi baa pa yi yin baa yedi yaala.

²⁰ Laa tie yinba ka baa maadi, yi Baa Fuoma, yaama n ye yi niinni, n baa maadi.

²¹ Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba.

²² Bi niba kuli baa nandi yi, kelima n yeli po. Ama yua n baa juuni hali mi juodima baa faabi.

²³ Bi yaa waani yi o falabiado doyendu nni, sani mani ki gedi dotogu. N waani yi i moamoani, yi kan gaani Isidayeli yaaba dogi nni kuli ki gbeni, ke o Joa Bijua daa cua.

²⁴ O ŋoadika ki cie o canbaa, o naacemo mo ki cie o daano.

²⁵ Li dagidi o ŋoadika n yaa tie nani o canbaa, o naacemo mo n yaa tie nani o daano yeni. Bi yaa yini o diedaano Belisebuli, laa pia tama ke bi baa sugidi o diegu nni yaaba ki cie.

Yin baa yaa jie yua

²⁶ Lanwani, yin da jie ba, kelima liba kuli ki ye ki wuo ki kan wuodi. Liba kuli ki ye ki duagi, ke bi kan bandi la.

²⁷ Min yedi yi yaala li biigili nni, waani li mani u yensiinu. Ban soabidi yaama yi tuba nni, kpaani ma mani a diena po.

²⁸ Da jie mani yaaba n baa kpa ti gbanandi, ama ki nan kan fidi ki kpa o naano. Ama yin yaa jie mani yua n baa fidi ki bolini o naano leni ti gbanandi kuli ku fantanbuogu nni.

²⁹ Baa kuadi nuanilie ka falini? Ama baa noanyenga bi siiga kan baa tiipo, ke yi Baa U Tienu ki bua.

³⁰ Ama yinba, ba yi yudi, yi Baa bani ti coali kuli n da maama.

³¹ Lanwani, yin da jie mani puu kuli, yi pia mayuli ki cie i nuani boncianla.

Ki tuo bi ki yie Jesu

³² Lani yaa po, yua n tuo nni bi niba nintuali, nmoko baa tuo o n Baa yua n ye tanpoli nintuali.

³³ Ama yua n nia nni bi niba nintuali, nmoko baa nia o n Baa yua n ye tanpoli nintuali.

Jesu cuama cuani mi paadima

³⁴ Yin da tama ke n cua ki baa teni mi yanduanma n yaa ye ŋanduna nni ka. Mii cua ki baa teni mi yanduanma ka n yaa ye, ama n cuani bu toabu.

³⁵ N cua ki baa teni ki bonjaga n paadi leni o baa, ki bonpuoga n paadi leni o naa, ki biyuaga n paadi leni o yaanaa.

³⁶ O nilo yibalinba baa yaa tie o diegu nni yaaba.

³⁷ Yua n bua o baa bi o naa ki cie mini, waa pundi ki yaa tie n ŋoadika. Yua n bua o bijua bi o bisalo ki cie nni, waa pundi ki yaa tie n ŋoadika.

³⁸ Yua n kaa taa o dapoanpoanli ki bugi ki ŋua nni, waa pundi ki yaa tie n ŋoadika.

³⁹ Yua n bua ki kubi o miali baa biani li. Ama yua n baa biani o miali kelima mini yaa po baa le li.

Yua n gaa Jesu tondo cangu panpaani

⁴⁰ Yua n gaa yi cangu, gaa mini yaa cangu yo, yua n gaa n cangu mo gaa yua n soani nni yaagu yo.

⁴¹ Yua n gaa o saawalipualo cangu, kelima o tie saawalipualo po, baa baa o saawalipualo n baa baa yaa panpaani. Yua n gaa o niteginka cangu mo, kelima o tie niteginka po, baa baa o niteginka n baa baa yaa panpaani.

⁴² N waani yi i moamoani, n ŋoadikaaba na siiga, ba yua yaa jigidi n wa ki cie, yua n puni o mi ñinsoangima ke o ñuni kelima o tie n ŋoadika kuli, kan luo o panpaani.»