Marki 3 - U TIENU MAAMA TILI 2013

Jesu paagi yaa joa yaa nuu n faani

¹ Jesu go den kua li bali maama bangima dieli nni. O joa den ye likani ke o nuu faani.

² Yaaba n den ye likani den kpaagi ki baa le Jesu yaa baa paagi o joa yeni mi fuodima daali. Lani, bi baa baa ki kuli o.

³ Jesu den yedi yua yaa nuu n faani: «Fii ki sedi siiga nni ne!»

⁴ Lani, o den yedi ba: «Li bali maama tuo tin tieni bi niba po yaala n ŋani mi fuodima daali, bi yaala n bia yo? Tin gaa o nilo miali, bi tin kpa o yo?» Bi den ŋmini suo.

⁵ Jesu pali den biidi boncianla, kelima bi pajuaga po. O den diidi bikuli leni li pabienli, ki yedi o joa yeni: «Tandi a nuu!» O den tandi o nuu ke u paagi.

⁶ Lanyogunu, Farisieninba den ñani ki ban taani leni o bado Herodi buakaaba, ki juogi ban baa tieni maama ki teni ban kpa Jesu.

Ku niligu taani Jesu kani

⁷ Jesu leni o ŋoadikaaba den piadi, ki go gedi mi ñincianma po. Yaa niligu n yabi den ñani Galile diema nni ki ŋua o.

⁸ Jude diema nni, Jerusalemi dogu nni, Idume diema nni leni yaa diema n ye Jurden kpenu kandima nni, Tiiri leni Sidon dogi nni leni li dobila nni kuli yaaba, ku niligu den ñani boncianla ki cua Jesu kani, kelima bi den gbadi wan tiendi yaala kuli.

⁹ O den waani o ŋoadikaaba ke ban baa o po ku ñinbiagu, wan ti kua lienni ke ku niligu n da mabini o.

¹⁰ O den paagidi bi niba boncianla bi yiani po. Yaaba n laadi fala kelima i yiani po kuli den taani o kani. Bi den tudi biyaba ki bua ki sii o.

¹¹ Mu cicibiadimu danba yaa laa o yaa yogunu kuli, bi yen gbaani o nintuali ki yaa tangi ki tua: «A tie U Tienu Bijua!»

¹² Jesu den maadi leni ba leni li bali ki yiedi bi po, ban da ban waani wan tie yua.

Bi piiga n tondiliediba

¹³ Lani n den pendi, Jesu den doni li juali po, ki yini wan bua yaaba ke bi cua o kani.

¹⁴ O den gandi piiga n nibilie ke ban yaa ye leni o, wan yaa tuuni ba, ke bi caa ki wangi U Tienu maama.

¹⁵ O den puni ba u paalu, ke ban yaa deli ki ñandi mu cicibiadimu mun ña mun ye yaaba yaa niinni.

¹⁶ Bine n tie wan den dini yaa piiga n niliediba li bali yeni: Simon ke o yini o Pieli,

¹⁷ Sebede bijaliediba Jaki leni o waalo Jan, ke o yini ba Boaneje (lani n tie yaa jaba n maadi nani i tatantani yeni),

¹⁸ Andre leni Filipi, Batelemi leni Matie, Toma leni Alife bijua Jaki, Tade leni Simon ban yi yua o Yankuadaano

¹⁹ leni Judasi Isikarioti, yua n den yuandi ki janbi Jesu.

Jesu niba bua ki cuo o

²⁰ Lani n pendi, Jesu den guani o denpo. Ku niligu go den taani boncianla hali ke wani leni o ŋoadikaaba ki den pia lenli ki baa je.

²¹ Jesu niba n den gbadi ke li tie yeni, bi den cua ki baa cuo o, kelima bi den tua: «Waa go pia yama.»

Jesu n deli mu cicibiadimu yaa paalu po

²² Li bali maama banda yaaba n den ñani Jerusalemi ki cua o kani moko den tua: «Mu cicibiadimu bado Belisebuli n ye o niinni ki die o. Wani n puni o u paalu ke o deli ki ñandi mu cicibiadimu mun ye yaaba yaa niinni.»

²³ Jesu den yini ba, ki pua ba mi kpanjama ki buali ba: «Mu cicibiadimu bado Sutaani baa gaa lede ki deli o yuli?

²⁴ Yaa diema n boagidi ki tuogi leni mi yuli, laa diema kan fidi ki yaa ye.

²⁵ Yaa diegu n boagidi ki tuogi leni ku yuli, laa diegu kan fidi ki yaa ye.

²⁶ Lanwani, Sutaani moko yaa fiini mi janjanma ki tuogi leni o yuli, o baa boagidi, o diema kan go yaa ye, o bali baa gbeni.

²⁷ Niloba kan fidi ki kua o gbanmandaano dieli nni ki fie o piama, kali o kpa paadi o ki loli o. Li yaa puole o baa kua o dieli nni ki fagi o piama.

²⁸ N waani yi i moamoani ke bi nisaaliba baa baa sugili tuonbiatoadi kuli po leni ban sugi U Tienu yaa sugidi kuli po.

²⁹ Ama yua n sugi U Tienu Fuoma Yua wani, kan baa sugili abada. O tieni yaa tuonbiadi n baa yaa ye hali yaa yogunu kuli.»

³⁰ Jesu den maadi yeni, kelima bi den tua ke ki cicibiadiga ye o niinni.

Jesu naa leni o waamu

³¹ Jesu naa leni o waamu den cua ki se niinpo, ki soani ke ban yini o.

³² Ku niligu den kaa ki lindi o, ke bi cua ki yedi o: «Diidi, a naa leni a waamu se niinpo ki lingi a.»

³³ O den guani ki yedi ba: «Ŋme n tie n naa leni n waamu?»

³⁴ Lani, o den diidi yaaba n lindi o kuli ki yedi: «Diidi n naa leni n waamu.

³⁵ Yua n tuo ki tiendi U Tienu yanbuama kuli, wani n tie n naataanjaga leni n naataanpuoga leni n naa.»