Marki 10 - U TIENU MAAMA TILI 2013

Jesu ñani Galile ki cua Jerusalemi 10 Jesu maadi li puoñanli maama

¹ Jesu den fii ki ñani likani, ki gedi Jude tinga yaaga n ye Jurden kpenu kandima. Bi niba go den taani o kani hali boncianla. O den bangi ba nani wan maani ki tiendi maama.

² Farisieninba bi tianba den cua o kani, ki bua ki dia o ku madiagu ki buali o: «Naani li bali maama tuo o joa n ñani o pua?»

³ Omo den buali ba: «Musa den bili yi po lede?»

⁴ Bi den yedi o: «Musa den tuo o joa n diani li puoñatili o pua po, ki ñani o.»

⁵ Jesu den yedi ba: «Li tie yi pajuaga po yo, ke o diani ki bili yi po laa ñoamabonli.

⁶ Ama ŋanduna tagima cilima yogunu, U Tienu den tagi o joa leni o pua.

⁷ Li tie lani yaa po yo, ke o joa baa ña o baa leni o naa kani ki taani leni o pua,

⁸ bani nibilie yeni n tua gbananyendi. Lanwani, baa go tie bilie ka, bi ji tie yende.

⁹ Lani yaa po, U Tienu n taani yaala, o nisaalo n da paadi la.»

¹⁰ Ban den guani bi candeni, Jesu ŋoadikaaba den buali o laa maama fuuli.

¹¹ O den yedi ba: «Yua n ñani o pua ki go taa puotoa kuli conbi, ki tudi wan den kpa pia yaa pua po.

¹² O pua moko yaa ñani o calo kani ki kuni jatoa, o conbi.»

Jesu gaali a biwaala

¹³ Bi niba den kpendinni Jesu kani a biwaala, ke wan sii ba ki gaali ba. O ŋoadikaaba den funi leni yaaba n kpendinni ba.

¹⁴ Jesu n den laa lani, o pali den beni ke o yedi o ŋoadikaaba: «Cedi mani a biwaala n cua n kani, ki da deli ba, kelima U Tienu diema tie yaaba n tie nani a biwaala ne po yo.

¹⁵ N waani yi i moamoani ke yua n kaa tuo U Tienu diema nani ki biwaaga yeni, kan kua lienni.»

¹⁶ Lani, o den taa a bila ki ŋmabi ba, ki maani bi po o nii ki gaali ba.

O jawaapiado

¹⁷ Jesu n den fii lankani ki baa suagi liiga, o joa den sani ki cua o kani ki gbaani o nintuali ki buali o: «O canbaanŋamo, n baa tieni lede ki baa yaa miali n kan gbeni?»

¹⁸ Jesu den buali o: «Be yaa po ke a yini nni niŋamo? U Tienu bebe yaa ka, oba kuli ki ŋani.

¹⁹ A bani li bali maama n bili yaala: Ŋan da kpa o nilo, ŋan da conbi, ŋan da su, ŋan da tieni mi siedifaama a lielo po, ŋan da janbi oba yin pia yaa ŋantaado yi siiga kuli nni; Ŋan yaa jigindi a baa leni a naa.»

²⁰ O joa yeni den guani ki yedi o: «Canbaa, n kubi lani kuli hali n biwaama nni.»

²¹ Jesu den diidi o ki bua o ki yedi o: «Bonyenla n poadi a kani. Gedi ki ban kuadi ŋan pia yaala kuli, ki pa la a luoda, lani, a baa baa ŋalimani tanpoli po. Li yaa puoli, ŋan cua ki ŋoadi nni.»

²² O joa yeni nunga den biidi laa maama po, ke o tagini ki ban caa leni li pabiidili, kelima o ŋalimano den yabi.

²³ Jesu den diidi ki lindi o ŋoadikaaba ki yedi ba: «Li pa hali boncianla a piada n baa ki kua U Tienu diema nni.»

²⁴ Li den paki o ŋoadikaaba. Lani, Jesu go den yedi ba: «N bila, U Tienu diema nni kuama pa boncianla.

²⁵ Ku yuoyuogu n tagini mi kpalipienbonma nni, dingi ki cie o piado kuama U Tienu diema nni.»

²⁶ Li go den paki o ŋoadikaaba hali boncianla ke bi yedi biyaba: «Li yaa tie yeni, ŋme nan baa fidi ki faabi?»

²⁷ Jesu den diidi ba ki yedi: «Bi nisaaliba kan fidi la, ama U Tienu po wani, yaala n pa kuli ki ye.»

²⁸ Pieli den yedi o: «Diidi ki le, tinba, ti den fii ki ŋaa likuli ki ŋoadi a.»

²⁹ Jesu den guani ki yedi o: «N waani yi i moamoani ke laa pia yua n fii ki ŋaa o diegu, o baa, o naa, o naataani, o bila yaa ka o kuani, kelima mini leni o Laabaaliŋamo po,

³⁰ ki kan baa likuli taalima kobiga kobiga ki daa ye ŋanduna na niinni. O baa baa ku diegu, baa, naa, i naataani leni i kuani. O go baa baa bi niba n waani o fala boncianla. Yaa yogunu n kpendi mo, o go baa baa yaa miali n kan gbeni.

³¹ Die liiga yaaba siiga niba boncianla, baa tua puoli yaaba, puoli yaaba siiga mo, niba boncianla baa tua liiga yaaba.»

Jesu waani mi taataama ke o baa kpe ki go fii

³² Bi den tagi u sanu ki do ki caa Jerusalemi. Jesu den ye bi liiga ki cuoni. O ŋoadikaaba yama den yagi, ke yaaba n den yegi leni ba mo kuli den ye leni ti jawaandi. Jesu go den taa bi piiga n niliediba, ki piadi leni ba, ki waani ba yaala n baa tieni o, ke laa pia tama.

³³ O den yedi ba: «Cengi mani, ti do ki caa Jerusalemi. Bi baa cuo o Joa Bijua ki teni o bi kopadicianba yudanba leni li bali maama banda. Bi baa jia o buudi, ki bili ban kpa o. Bi baa teni o bi nilanba.

³⁴ Bi baa ñuadi o ki sii o po ti ñinsandi, ki pua o i baliji ki kpa o. Ama kuuma dataali, o baa fii bi tinkpiba siiga.»

Jaki leni Jan miabu

³⁵ Sebede bijaba, Jaki leni Jan, den nagini Jesu kani ki yedi o: «Canbaa, ti bua ŋan tieni ti po tin baa mia ŋa yaala.»

³⁶ O den yedi ba: «Yi bua min tieni yi po be?»

³⁷ Bi den yedi o: «A yaa ti kali a kpiagidi bali kalikaanu, ŋan pa ti tin kali, yendo a jienu, yendo mo a ganu.»

³⁸ Jesu den guani ki yedi ba: «Yii bani yin miadi yaala. Yi baa fidi ki ño min baa ño yaa tadiñokaaga nni bi? Yi baa fidi ban batisi yi ban baa batisi nni yaa batisima?» Bi den yedi o: «Ti baa fidi.»

³⁹ Jesu den guani ki yedi ba: «Moamoane ke yi baa ño min baa ño yaa tadiñokaaga nni, bi baa batisi yi ban baa batisi mini yaa batisima.

⁴⁰ Ama ki kaani o nilo n jienu yaa ka n ganu, laa ŋua mini, li tie U Tienu n bogini ki bili la yaaba yaa po yo.»

⁴¹ Ŋoadikaaba piiga yaaba n sieni n den gbadi lani, bi pala den beni Jaki leni Jan po.

⁴² Jesu den yini ba ki yedi: «Yi bani ke ban nua yaaba ke bi tie i nibuoli yudanba yeni mabindi ba, ke bi paatieba mo die ba leni u paalu.

⁴³ Ama lan da tie yeni yinba siiga. Yi siiga yua n bua ki tua niciamo kuli, wan tua yi naacemo.

⁴⁴ Yua mo n bua ki tua yi liiga yua kuli, wan tua yuakuli yonbo.

⁴⁵ O Joa Bijua naa cua ke bi niba n yaa tuuni o po ka, ama o cua ki baa yaa tuuni nitoaba po, ki pa o miali, ki daa ki faabi niba boncianla.»

Jesu paagi o juamo Bartime

⁴⁶ Jesu leni o ŋoadikaaba den pundi Jeriko dogu nni. Ban den ña laa dogu nni, bi den yegi leni yaa niligu n yabi, ke o juamo yua n miadi, Time bijua yua n yi Bartime, kaa u sankunu.

⁴⁷ Wan den gbadi ke yua n baa pendi tie Jesu, Nasareti yua, o den tangi: «Jesu, Davidi Bijua, gbadi n ninñima.»

⁴⁸ Yaa niba n yabi den funi leni o ki yedi ke wan suoni, ama o go den tangi boncianla ki pugidi ki tua: «Davidi Bijua, gbadi n ninñima.»

⁴⁹ Jesu den sedi ki yedi: «Yini mani o na!» Bi den yini o juamo ki yedi o: «Paagi a pali, fii, o yi ŋa.»

⁵⁰ O juamo yeni den luni o kpalibu ki fii yenma ki cua Jesu kani.

⁵¹ Jesu den buali o: «A bua min tieni a po be?» O juamo den guani ki yedi o: «Canbaa, n bua ŋan pa nni n nuni n noadi.»

⁵² Jesu den yedi o: «Gedi, a dandanli paagi a.» Lanyogunu o nuni go den noadi, ke o ŋua Jesu ki yegi leni o.