Luki 1 - U TIENU MAAMA TILI 2013

Mi macilikaama 1.1-4

¹ N buado Teofili, bi niba boncianla den moandi ki diani yaala n den tieni ti siiga togida.

² Bi den diani la ki ŋoadi hali mi cilima, yaaba n den laa laa bonla leni bi nuni, ki tua o Laabaaliŋamo wangikaaba, n togidi ti maama.

³ N den tagidi ki bandi laa bonla kuli bonŋanla ki cili hali li cilima. Min bandi likuli yeni, nmoko sua ke li ŋani min diani a po ki ŋoadi ŋoadi li fuuli,

⁴ ki teni ŋan bandi ke ŋan den baa yaa bangima tie moamoani cain.

Jan Batisi leni Jesu madi maama 1.5—2.52

⁵ Herodi n den kaa ti gbandi po Jude diema nni yaa yogunu, U Tienu kopadicianba siiga yendo den ye ke bi yi o Sakari. O den tie U Tienu kopadicianba caga siiga cagiyenli yua, Abia yaa cagili. O pua moko den tie Alono puoliŋuanu ki yi Elisabeti.

⁶ Bani nibilie yeni kuli den tiegi U Tienu nintuali. Bi den ŋua o Diedo bali maama leni o mabilikaama kuli cain kaa pia tagili.

⁷ Ama baa den pia biga, kelima Elisabeti den tie ŋoaliga. Bani nibilie kuli den kpeligi.

⁸ Sakari kopadiciancagili tuonli yogunu n pundi, o den tuuni o tuonli U Tienu nintuali.

⁹ Bi den toani tiatia nani U Tienu kopadicianba n maani ki tiendi maama, ki gandi o ke o baa kua o Diedo dieli nni ki juu a dugibila.

¹⁰ Ban den juugi a dugibila yaa yogunu, U Tienu niba nitaanli kuli den ye niini ki jaandi.

¹¹ Lani, o Diedo maleki den sedi a dugibila padibinbinli jienu po, ki doagidi o yuli Sakari kani.

¹² Sakari n den laa o, o yama den yagi ke ti jawaandi cuo o.

¹³ Ama Maleki den yedi o: «Sakari, ŋan da jie, U Tienu gaa a miabu, a pua Elisabeti baa maa a po bonjaga, ŋan yini o Jan.

¹⁴ O baa yaa tie a po pamancianli. Yaaba n baa mangi bi pala kelima o madi po baa yaa yabi.

¹⁵ O baa yaa tie niciamo o Diedo nintuali. O kan ño duven leni yaa daama n bia kuli. O baa yaa gbie leni U Tienu Fuoma Yua hali ki da ye o naa tugu nni.

¹⁶ O baa gobidi ki guani Isidayeli buolu niba boncianla o Diedo bi Tienu kani.

¹⁷ O baa yaa cuoni U Tienu nintuali leni Eli yantiali leni o paalu, ki teni bibaanba n guani ki mangi leni bi bila, ki teni bi niyiekaaba n baa bi niteginkaaba yanfuoma. O baa bogini bi niba pala o Diedo po.»

¹⁸ Sakari den yedi maleki: «N baa bandi lede ke lani kuli tie moamoani, kelima n kpeligi, n pua mo podi?»

¹⁹ Maleki den guani ki yedi o: «N yi Gabriyeli, yua n ye U Tienu kani ki tuuni o po. O soani nni ke min maadi leni a, ki go waani a laa laabaaliŋamo yo.

²⁰ Nani ŋan ki dugi n maama po, mani yaama n baa tieni mi yogunu yaa pundi yeni, a baa tua muulo ki kan go fidi ki maadi hali laa bonla n baa n tieni yaa daali.»

²¹ Bi niba yaaba n den ye niini yeni den jii Sakari ke li paki ba leni wan waagi U Tienu diegu nni maama.

²² Wan den ñani, waa fidi ki maadi leni ba. Lane bi den bandi ke o laa li bonlekaala U Tienu diegu nni. O den maadi leni ba leni o nii, ki ji tie muulo.

²³ Sakari tuonli U Tienu diegu nni dana n den gbeni, o den kuni o denpo.

²⁴ Yogunuba n den pendi, o pua Elisabeti den punbi. O den ye deeni yogunu kuli hali ŋmaalimuu, ki maadi leni o yuli ki tua:

²⁵ «O Diedo tieni n po line yo wan jagi ke o baa ñani n po i fe yaa yogunu bi niba siiga.»

Maleki tuodi ki waani Jesu madi maama

²⁶ Sakari pua tugu ŋmaluobilo nni U Tienu den soani yaa maleki n yi Gabriyeli Nasareti dogu, yuu n ye Galile diema nni.

²⁷ O den soani o li puowandiali kani. Yua n den tie yaa joa n yi Josefi yaa toginaa ki tie Davidi diegu nni yua. Li puowandiali yeni den yi Mariyama.

²⁸ Maleki yeni den cua o kani ki yedi o: «N fuondi a, fini yua n baa li ŋanbili U Tienu kani. O Diedo ye leni a.»

²⁹ Mariyama yama den yagi boncianla laa maama po, ke o buali o yuli laa fuondi n bua ki yedi yaala.

³⁰ Maleki den yedi o: «Mariyama, ŋan da jie, kelima a baa li ŋanbili U Tienu kani.

³¹ Diidi, a baa punbi ki maa bonjaga. Ŋan yini o Jesu.

³² O baa yaa tie niciamo, bi baa yini o tanpolijoma Tienu Bijua. Li Miali Diedo U Tienu n baa kaani o o yaaja Davidi gbandi po,

³³ wan yaa die Jakob buolu hali yaa yogu kuli. O diema mo kan baa juodima abada.»

³⁴ Mariyama den yedi maleki: «Min kaa bani joa yeni, lani mo ba gaa lede ki tieni?»

³⁵ Maleki den guani ki yedi o: «U Tienu Fuoma Yua baa cua a kani, tanpolijoma Tienu paalu baa yini a po. Lani yaa po, bi baa yini ŋan baa maa yaa bigagidiŋanga yeni U Tienu Bijua.

³⁶ Diidi, a kpiilo Elisabeti, omoko punbi bonjaga o puociandi nni. Ban den tua yua ke o tie ŋoaliga yeni, ji ye o ŋmaluobilo nne.

³⁷ U Tienu ki pia wan kan fidi yaala.»

³⁸ Mariyama den yedi: «N tie o Diedo yonbo, lan tua n po nani ŋan yedi maama.» Maleki den ñani o kani.

Mariyama gedi ki ban fuondi Elisabeti

³⁹ Lanyogunu Mariyama den fii ki jaligi ki gedi yaa dogu n ye a juana po, Jude diema nni.

⁴⁰ O den kua Sakari deni ki fuondi Elisabeti.

⁴¹ Elisabeti n den gbadi Mariyama fuondi yaa yogunu, o biga den jeli o tugu nni, U Tienu Fuoma Yua den gbieni Elisabeti

⁴² ke o kpaani: «A baa li seli ki cie bi puoba kuli, a tugu nni biga mo baa li seli.

⁴³ Be n teni ke n baa ke fini n Diedo naa, cua n kani?

⁴⁴ Diidi, min gbadi a fuondi yaa yogunu liga, ki biga ban jeli n tugu nni leni li pamancianli.

⁴⁵ Li pamanli ye leni fini yua n daani ke o Diedo n soani ke bi yedi a yaa bonla baa tieni.»

Mariyama pagi o Diedo

⁴⁶ Mariyama den yedi: «N naano kpiagi o Diedo,

⁴⁷ N pali mani hali boncianla, Kelima wani U Tienu n Candaano po.

⁴⁸ O Diedo laa mini o yonbo po. Dinla liiga nifiima n tuu nifiima kuli Baa yedi ke li pamanli ye leni nni,

⁴⁹ Kelima wani U Paaciamu Daano Tieni n po yaa bonla n yabi. O yeli gagidi ki ŋani.

⁵⁰ Nifiima n tuu nifiima kuli, O baa yaa gba yaaba n fangi o ninñima.

⁵¹ O doagidi o nuu paalu, Ki yadi ti japaadi danba.

⁵² O jiini i paaciami danba bi bali kalikaani po, Ki fiini taliginba.

⁵³ O guoni a konkonba li bonŋanla, Ki cabi a piada leni i nikuomi.

⁵⁴ O todi o naacenba Isidayeli yaaba. O tiadi o ninñingbadima yogunu kuli po,

⁵⁵ Nani wan den yedi ti yaajanba, Abalahama leni o puoliŋuani maama.»

⁵⁶ Mariyama den kali Elisabeti kani ke li bua ki pundi ŋmaalitaa, ki guani ki kuni o denpo.

Jan Batisi madi

⁵⁷ Elisabeti maayogunu den pundi ke o mali bonjaga.

⁵⁸ O yieninlieba leni o kpiiba den gbadi ke o Diedo gbadi o po mi ninñincianma, ki taani ki mangi bi pala leni o.

⁵⁹ Li daniili, bi den cua ki baa kuani ki canpandiga ku koanciagu. Bi den bua ki yini o o baa yeli Sakari.

⁶⁰ Ama o naa den yedi: «Yeni ka, o baa yaa yi Jan.»

⁶¹ Bi den yedi o: «A kpiiba siiga ki pia yua n yi laa yeli.»

⁶² Bi den maadi o baa mi muulima nni, ki bua ki bandi wan bua ki biga n yaa yi maama.

⁶³ Sakari den mia wan baa diani naani, ki diani lipo: «O yeli yi Jan.» Li den paki bikuli.

⁶⁴ Lanyogunu lanyogunu Sakari lanbu den tabidi, ke o fidi ki yaadi ki pagi U Tienu.

⁶⁵ Ti jawaandi den cuo bi yieninlieba kuli. Yaaba n den ye Jude diema nni kuli den maadi laa bonla kuli bi siiga.

⁶⁶ Yaaba n den gbadi likuli den kubi la bi pala nni ki tua: «Ki naa biga baa tua be?» Moamoani, o Diedo nuu den kubi o.

Sakari n pua yaa saawalo ki biga po

⁶⁷ Ki biga baa Sakari den gbie leni U Tienu Fuoma Yua ki pua saawali ki yedi:

⁶⁸ «O Diedo Isidayeli Tienu n baa ti pagidi, Kelima o laa o niba po ki daa ki faabi ba.

⁶⁹ O fiini ti po o naacemo Davidi diegu nni Yaa Candaano n pa.

⁷⁰ O tieni wan den teni ke o saawalipua-gagidiŋanba Maadi yaala hali yogu.

⁷¹ O den niani ke o baa gaa ti ti yibalinba nuu nni, Leni yaaba n nani ti kuli yaa nuu nni.

⁷² Yeni o gbadi ti yaajanba po mi ninñima, Ki tiadi o: ŋantaado yua n gagidi ki ŋani po,

⁷³ Wan den poli ki kuani yua leni ti yaaja Abalahama,

⁷⁴ Ke o baa gaa ti ti yibalinba nuu nni Ki teni tin yaa jaandi o kaa jie,

⁷⁵ Ki yaa cuoni o nintuali leni mi gagidiŋanma Leni mi teginma hali ti miali dana kuli nni.

⁷⁶ Fini ki canpandiga, bi baa yaa yi ŋa U Tienu yua n ye hali tanpolijoma yaa saawalipualo Kelima a baa gaa o Diedo liiga, Ki yaa ŋanbidi o sani,

⁷⁷ Ki teni o niba n le o tindima, Kelima o tieni bi po sugili bi tuonbiadi po.

⁷⁸ Ti Tienu yaa ninñingbadicianma po, O teni ke o yenma ñani tanpoli Ki yendi ti po nani u yienu n pudi maama yeni,

⁷⁹ Ki baa yendi yaaba n ye li biigili nni Leni mi kuuma jinjingu nni po, Ki gobidi ti ke tin kua ki yaa cuoni Mi yanduanma sanu nni.»

⁸⁰ Ki biga yeni den kpedi ki go fandi bonŋanla, ki ye li fuali nni hali yaa daali ke o den ti doagidi o yuli Isidayeli yaaba po.