LOMA YAABA 13 - U TIENU MAAMA TILI 2013

Tuo mani li bali danba n bili yaala

¹ Nilo kuli n tuo mi diema bali danba n bili yaala, kelima bali kuli ki ye kaa ñani U Tienu kani. U Tienu n dini yaa bali danba n ye kuli.

² Lanwani, yua n yie li bali danba maama, yie U Tienu ñoamabonle. Yaaba n yie ma, baa cuani bi yula po u cuonu.

³ Yua n tiendi yaala n tiegi kan yaa jie mi diema bali danba, se yua n tiendi yaala n bia. A bua ki da jie li bali daano? Yaa tiendi yaala n tiegi, yeni, o baa pagi a.

⁴ Li bali daano tie U Tienu naacemo, yua n tuuni a ŋamu po. Ama a yaa tiendi yaala n bia ŋan yaa jie, kelima wan bali ki jugisiega yeni, laa tie fanma fanma po ka. O tie U Tienu naacemo, ki baa teni yaaba n tiendi mi biadima, ki fiini U Tienu pali n baa bi biadima panpaani.

⁵ Lanwani, li tie tiladi yin tuo ki yaa ŋua mi diema bali danba. Laa tie kelima bi baa fidi ki cuo yi bebe ka, ama yi pala siedi moko yaa po.

⁶ Li tie lani yaa po yo, ke yi pa li lubili moko. Mi diema bali danba tie U Tienu naacenba laa tuonli po.

⁷ Lanwani, yin pa bikuli yaala n bili. Li yaa tie o lubigaalo, yin pa o li lubili, li yaa tie li bancanli danba, yin pa ba li bancanli. Yua n pundi ki baa li fangili, yin fangi o. Yua n pundi ki baa ti jigidi, yin jigini o.

Mi buama yi lieba po

⁸ Yin da pia panli oba kuli po, li yàá tie yi lieba buama panli yaa ka. Yua n bua o lielo, kubi U Tienu bali maama n bili yaala cain.

⁹ Lani yaa po yo, ke U Tienu mabilikaama yedi: Ŋan da conbi, ŋan da kpa nilo, ŋan da su, ŋan da tieni mi siedifaama, ŋan da pia li nunponbiadili. Lani leni yaa mabilikaama n sieni kuli, taani yaa mabilikaama n tie ne yaa niinne: Ŋan bua a lielo nani ŋan bua a yuli maama yeni.

¹⁰ Yua n bua o lielo kan tieni o yaala n bia, kelima li bali maama kuli taani ki ye mi buama nne.

Yin bogini ki yaa guu Jesu cuama

¹¹ Moala u yogunu pundi ke yin fundi yi guama nni, kelima mi faabima yogunu nagini moala ki cie tin den daani yaa yogunu.

¹² Ku ñiagu bii ke li waagi, mi faama nagini. Lanwani, tin landi li biigili yaa tuonbiada, ki nan la mi yenma tuonŋama, nani ti toatiadi yeni.

¹³ Tin yaa tiendi mani yaala n dagidi nani bi niba n tiendi yaala u yensiinu, ki da tuo mi jiema n diedi ti yantiana, ki foagidi leni li dañoli, mi conconma, ti cagindi, mi niama leni li nunponli.

¹⁴ Yin la o Diedo Jesu Kilisiti yaa tagu nani li liadili yeni, ki da cedi yi gbanandi bonbuakaala n diedi yi.