LOMA YAABA 1 - U TIENU MAAMA TILI 2013

I fuondi leni li tili mayuli 1.1-17 I fuondi

¹ Mini Poli yua n tie Jesu Kilisiti naacemo, U Tienu n den yini ki gandi yua ke n tua o tondo ki baa yaa wangi o Laabaaliŋamo, n diani li tili yinba yaaba n ye Loma po.

² Hali yogu, U Tienu den niani u ñoanianu o Laabaaliŋamo po, ki teni ke o saawalipuaba diani o i Diani yi n gagidi ki ŋani nni.

³ O Laabaaliŋamo yeni maadi o Bijua maama fuule. A yaa diidi ban mali o yaa buolu nni, o tie Davidi puoliŋuanu.

⁴ Ama li doagidi leni U Tienu Fuoma Yua paalu po, ke o tie U Tienu Bijua, kelima o fiima bi tinkpiba siiga yaa po. Wani n tie ti Diedo Jesu Kilisiti.

⁵ O yaa po yo, ke ti den baa li ŋanbili ki tua o tondiba, ke tin yaa gobidi i nibuoli kuli, ban daani o ki tuo o maama.

⁶ Yimoko tie laa niba siiga yaaba, yinba Jesu Kilisiti Nitaanli yeni.

⁷ N diani yi po, yinba yaaba n ye Loma ki tie U Tienu buakaaba kuli, wan yini yinba yaaba ke yi gagidi o po. Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

Poli sugini ki gedi ki le Loma yaaba

⁸ N kpa tuondi n Tienu yikuli po, Jesu Kilisiti yeli nni, kelima bi maadi yi dandanli maama ŋanduna nni kuli.

⁹ U Tienu, min ŋua yua leni payenli, ki wangi o Bijua Laabaaliŋamo, tie n siedo, ke n tiadi ki taagi yikuli yela yogunu kuli

¹⁰ n jaandi nni, ki naa cedi. N miadi o ke li yaa tie o yanbuama, min fidi ki baa u sanu, ki cua yi kani.

¹¹ N bua hali bonŋanla ki le yi, ki boagidi leni yi U Tienu Fuoma Yua n puni yaa paabu, ke yin yaa se ki pa,

¹² bi mo, n yaa cua yi kani, tikuli n baa li papaali, kelima mini leni yinba n taani ki pia yaa dandanli po.

¹³ N kpiiba, n bua yin bandi ke n den lindi ki jagi ke n baa cua yi kani, ki baa bonluonkaaliba yi siiga, nani min de baa nibuotoe siiga maama. Ama hali moala, bonliba yen pigini n sanu ke mii fidi ki cua.

¹⁴ Li tie n po tiladi ke min gedi bi nunfandanba leni bi yanboandanba po, yaaba n bani u cogu leni yaaba n ki bani kuli po.

¹⁵ Lani yaa po, n bua hali boncianla ki yaa wangi yinba yaaba n ye Loma moko o Laabaaliŋamo.

O Laabaaliŋamo paalu

¹⁶ Mii jie i fe o Laabaaliŋamo wangima po. Li tie U Tienu paalu yaaba n daani kuli yaa tindima po, ki cili Jufinba, ki ŋoadi bi nilanba.

¹⁷ O Laabaaliŋamo yeni doagidi U Tienu n saa bi nisaaliba po i moamoani ke bi tiegi maama, kelima li dandanli po leni li dandanli bebe yaa po, nani lan diani maama: «O niteginka baa yaa ye, kelima o dandanli yaa po.»

U Tienu n jagi yaala o nisaalo tindima po 1.18—4.25 Bi nisaaliba n pia yaa tagili U Tienu kani

¹⁸ U Tienu pabienli doagidi tanpoli po, ki baa cuo yaaba n yie o, ki tiendi yaala n ki tiegi kuli, bani yaaba n moandi ki ñii i moamoani leni bi biadima.

¹⁹ O nilo n baa fidi ki bandi yaala wani U Tienu po doagidi. U Tienu doagidi bi po la.

²⁰ U Tienu paalu yuu n ki pia gbenma leni wan tie maama, naa tie bi nisaaliba n baa fidi ki le yaala. Ama hali ŋanduna tagima yogunu, laa bonla kuli doagidi wan tagi yaala yaa niinni. Lani n teni ke baa pia ban baa fidi ki tabi yaala, ki gaa bi yula.

²¹ Ba ke bi bani wani U Tienu, baa kpiagidi o ki go tuondi o nani lan pundi maama, ama bi yaadi bi yanluoma nni. Bi yanpiima teni ke bi kua li biigili nni.

²² Ba ke bi kpiagidi bi yula ke bi tie yanfuodanba, bi tua yanluodanba.

²³ Bi lebidi U Tienu yua n kan kpe yaa kpiagidi, ki kpiagidi a nannana, ya n naani leni o nisaalo yua n baa kpe, ti bonyugiditi, ti yandi leni li bonbalinkaala.

²⁴ Li tie lani yaa po yo ke U Tienu mo ŋaa ba bi tuonjoagima nni, nani bi pala n bua ban yaa tiendi maama. Lani, bi jigidi bi yula hali ki tiendi yaala n pia i fe bi gbanandi po.

²⁵ Bi lebidi ki ŋaa U Tienu moamoani, ki ŋua mi faama. Bi kpiagidi U Tienu n den tagi yaala, ki ŋaa wani o Tagido oba, yua n pundi ki yaa baadi ti pagidi hali yaa yogunu kuli. Amina!

²⁶ Li tie lani yaa po ke U Tienu mo ŋaa ba, ke bi gbanandi fiima, yaama n tie ti cagindi ki jigidi ba, n paadi ba. Ba bi puoba ŋaa U Tienu n bili bi po yaala, ki cagini bi yula.

²⁷ Bi jaba moko ŋaa U Tienu n bili ke ban yaa taagi leni bi puoba maama. Bi gbanandi fiima co nani u mu yeni jatoaba po, ki teni ke bi cagini leni jatoaba. Lanwani, bi baadi bani bi ba yaa panpaani n dagidi bi yaadima yeni po.

²⁸ Nani bi nisaaliba n den sua ke laa pundi ban bandi U Tienu yeni, U Tienu mo ŋaa ba ke bi yantiabiada paadi ba, ke ban yaa tiendi yaala n ki pundi.

²⁹ Yaala n kaa tiegi kuli gbie bi pala nni, yaala n bia, mi ŋaliŋabuama leni mi biadima. Bi pala go gbie leni li nunponli, mi kukpama, li koanli, mi niama buoli kuli, bu nunfanbiadibu leni ku tugutongu.

³⁰ Bi go tie ñoakpalidanba, ki maadi bi lieba po yaala n bia. Bi tie U Tienu yibalinba, yusiedanba, japaadanba leni yaaba n pagi bi yula. Bi cili yaa biadima n ki den kpa ye, ki go tie danyiekaaba mo.

³¹ Baa pia yanfuoma, baa kuandi ban niani yaa ñoaniani, baa pia nitoaba po padingili leni ninñingbadima.

³² Ba ke bi bani U Tienu mabilikaama yaama n tiegi ki yedi ke li pundi ke yaaba n tieni laa bonbiadila n kpe, bi tiendi la bani bi ba, ki go saagi yaaba n tiendi yeni po i moamoani.