Levi 27 - U TIENU MAAMA TILI 2013

Mi mapuginkaama 27 Li nianli dunga maama

¹ O Diedo den maadi leni Musa, ki yedi:

² «Yedi Isidayeli yaaba: O nilo yaa niani o Diedo nisaalo, li yaa tie ke li daano ti bua ki pa i ligi ki kuani o nianli yeni, diidi li ligi n baa da maama nne:

³ Li yaa tie yaa joa n pia bina piilie, ki yaa ji caa hali bina piiluoba siiga, o baa bili ke o dunga baa yaa tie kujapiena piimuu, nani u kaangagidiŋamu yaa kujapiena yeni.

⁴ Li yaa tie pua mo, o dunga baa yaa tie kujapiena piitaa.

⁵ Yaa biga n pia binamuu, ki yaa caa hali bina piilie siiga, a baa bili kujapiena piilie bonjaga po, kujapiena piiga bonpuoga po.

⁶ Yaa biga n da pia ŋmayendo, ki yaa caa hali binamuu, bonjaga dunga baa yaa tie kujapienamuu, bonpuoga mo kujapienataa.

⁷ Yaa niba n pia bina piiluoba bi ki cie yeni, a baa bili ke joa yaa dunga baa yaa tie piiga n kujapienamuu, pua mo yaa dunga n yaa tie kujapiena piiga.

⁸ Li yaa tie ke yaa nilo n niani li nianli yeni luo hali ke li pendi, ki naa baa fidi ki pa ŋan bili yaa dunga yeni, a baa taa o ki gedini o kopadiciamo kani. Wani n baa jagi li nianli yeni po, wan sua ke yua n niani li nianli yeni n baa fidi ki pa yaala.

⁹ Li yaa tie ke li nianli yeni tie yaa yandi n tie ban padi yaa yanbuoli o Diedo po, ban niani o Diedo yaa yanga kuli tie yaa bonla n gagidi ki ŋani.

¹⁰ Bi kan lebidi laa yanga, bi kan cuani yaa yanga n ki ŋani ki lebidi leni yaaga n ŋani. Bi kan cuani yaa yanga n ŋani ki lebidi leni yaaga n ki ŋani. Bi yaa lebidi yaa yanga ki baa teni yantoaga, bani bonbilie yeni kuli baa yaa tie yaala n gagidi ki ŋani.

¹¹ Li nianli yanga yeni yaa tie yaa yanbuolu n joagini, ke bi kan fidi ki cuani ka ki padi o Diedo po, bi baa cuani ki yanga yeni ki waani o kopadiciamo.

¹² O kopadiciamo baa waani o dunga, ki ŋoadi ki yaa ŋani bi ki yàá ŋani. Li nianli dunga baa ŋua o kopadiciamo n baa waani maame.

¹³ Li daano yaa bua ki guani ki daa o nianli yanga, o baa pa yeni, ki go pugini ki dunga yeni po bonlimuu kuli siiga bonyenla.

¹⁴ O nilo yaa niani o dieli o Diedo, o kopadiciamo baa waani li nianli yeni dunga, ki ŋoadi li yaa ŋani bi li yàá ŋani. Ki dunga baa se nani o kopadiciamo n waani maama.

¹⁵ O nilo yeni yaa bua ki guani ki daa o dieli, o baa pa li dunga yeni, ki go pugini li dunga yeni po bonlimuu siiga kuli, bonyenla. Lanwani, o baa gaa o cili.

¹⁶ O nilo yaa niani o Diedo o kuanu boagidima, o baa waani ki dunga. A baa biigi leni yaa bonbuolu n baa coagi laa boagidima nni n baa yaa de maama. Li yaa tie ke yaa orje n baa coagi lienni pundi kilo kobitaa, li dunga baa yaa tie kujapiena piimuu.

¹⁷ Li yaa tie mi faabima binli ke o niani o kuanu, bi baa ŋoadi ŋan bili yaa dunga.

¹⁸ Li yaa tie mi faabima binli n pendi ke o niani o kuanu, o kopadiciamo baa coadi ki bandi yaa bina banlu n sieni mi faabima binli n cua. O baa wadi ki dunga, lan yaa da leni yaa bina n sieni, ki bili o nilo yeni po ki dunga.

¹⁹ Yua n den niani o kuanu yeni, yaa bua ki guani ki daa o cuu, o baa pa ŋan bili o po yaa dunga, ki pugini ki dunga yeni po, bonlimuu kuli siiga bonyenla. Lanwani, o baa gaa u.

²⁰ O nilo yeni yàá guani ki daa o kuanu, ki nan kuadi wu nitoa po, o kan go fidi ki guani ki daa laa kuanu.

²¹ Yaa nilo n den daa yeni yaa ñani lienni mi faabima binli, u kuanu yeni baa tua o Diedo yaa kuanu yo, hali yaa yogunu kuli, nani o nilo n niani yaala leni li poli yeni. O kopadiciamo n baa yaa die u.

²² O nilo yaa niani o Diedo wan daa yaa kuanu ke laa tie faali,

²³ o kopadiciamo baa waani ki dunga, ki ŋoadi yaa bina n sieni mi faabima binli n cua. O nilo yeni baa pa ki dunga yenma landaali, kelima li tie yaa bonla n gagidi o Diedo po.

²⁴ Mi faabima binli yaa cua, bi baa guani u kuanu yua n den kpa kuadi u yeni, wani yua n den die laa tinga yeni.

²⁵ Laa dunga kuli baa ŋua u kaangagidiŋamu yaa kujapiena buolu yo. Kujapienyenli kuli tie gera piilie.

Bu paabu buoli

²⁶ Niloba kan fidi ki taa o yandi bontonkpiaga ki pa U Tienu, kelima yaaba n kpa mali kuli, o Diedo n die. Li yaa tie nua, pia bi ŋuabo, o Diedo n die o.

²⁷ Li yaa tie yaa yanga n joagini yaa bontonkpiaga, bi baa guani ki daa ki faabi ka, ki ŋoadi ŋan bili ki po yaa dunga, ki pugini ki dunga yeni po bonlimuu kuli siiga, bonyenla. Bi yàá goa ki daa ki faabi ka, a baa kuadi ka ki ŋoadi ŋan bili yaa dunga yeni.

²⁸ O nilo n baa niani yaala leni li poli o piama kuli o Diedo, li kan tuo ki guani ki kuadi, li kan tuo ki guani ki daa mo. Ba li yaa tie nilo, bi yanga bi kuanu, bi dieli, o nilo n niani yaala leni li poli kuli, li baa gagidi o Diedo po cain.

²⁹ Ban niani yaa nisaalo leni li poli, oba kuli kan fidi ki guani ki daa ki faabi o, se ban kpa o.

³⁰ Ki tinga bonluonkaala diim kuli tie o Diedo yaala, lani n tie i kuani yaala, bi i kuani nni tiidi bonluonkaala kuli, li gagidi o Diedo po.

³¹ O nilo yaa bua ki guani ki daa bonliba o diim yaa niinni, o baa pugini ki dunga yeni po bonlimuu kuli siiga bonyenla.

³² Ti yanciandi leni ti yanbidi kuli diim po, o yankpaalo gbiamu n gagidi o yandi siiga, yandi piiga siiga, yaa yanga yeni kuli, baa yaa tie yaa bonla n gagidi ki ŋani o Diedo po.

³³ Bi kan biigi ki le ki yanga yaa ŋani bi ki yàá ŋani, bi didi kan lebidi yantoaga mo. Bi yaa ñani yanyenga ki bua ki lebidi leni yantoaga, bani bonbilie yeni kuli baa tua yaa bonla n gagidi ki ŋani. Bi kan fidi ki guani ki daa ba.»

³⁴ Lani n tie o Diedo n den teni Musa yaa bali maama Isidayeli yaaba po, Sinayi juali po.