Levi 22 - U TIENU MAAMA TILI 2013

c. O Diedo padijiedi kuana

¹ O Diedo den maadi leni Musa, ki yedi:

² «Waani Alono leni o bijaba ke ban fangi bi yula, ki foagidi leni Isidayeli yaaba n gagidi ki cuani n po yaa padijiedi. Yeni, wani Alono leni o bijaba kan cagini n yeli yaali n gagidi. N tie Li Miali Diedo.

³ Yedi ba: Yi puoliŋuani kuli siiga, nifiima n tuu nifiima, yaa joa n nagini Isidayeli yaaba n gagidi yaa padijiedi o Diedo po, ki nan pia joagindi o niinni, n baa paadi ki ñani laa nilo n nintuali. N tie Li Miali Diedo.

⁴ Alono puoliŋuani siiga, yaa joa n pia mi gbaadima, bi o fado, n cuo yua, yàá ŋanbi o baa, o kan je yaa jiema n gagidi ki ŋani. Li baa yaa tie yeni leni yua n sii yaa nilo n joagini kelima o sii o tinkpilo, bi yua n joagini kelima o biidi o kpataali.

⁵ Yua n joagini kelima o sii yaa bonfuodila n balini tiipo po, bi yua n sii yaa nilo n pia joagindi, ke ti tabi o.

⁶ Yaa nilo n sii laa bonbuolu kuli baa yaa ye leni o joagindi, hali ku yenjuagu. O kan fidi ki je yaa jiema n gagidi ki ŋani. Ama o baa wali.

⁷ Lanwani, u yienu yaa kua, o baa ŋanbi. Lani yaa pendi, o baa je yaa padijiema n gagidi ki ŋani, kelima li tie o jiema.

⁸ O kan ŋmani yankpienga bi moayanga n toadi toadi yaa yanga. Lani n tie wan da ti joagini o baa leni ki yanga yeni. N tie Li Miali Diedo.

⁹ Ban kubi n ñoamabonli yeni kuli, ki da ti kua ti tuonbiadi nni, kelima bi jiema po. Bi yaa joagini laa jiema mo, bi baa kpe. N tie Li Miali Diedo yua n gagidi ki ŋanbidi ba.

¹⁰ Yua n ki tie Alono buolu yua kuli, kan je yaa padijiema n gagidi yeni. Yaa nilo n cani o kopadiciamo deni, bi o tuonsoanlo kan je yaa padijiema n gagidi ki ŋani.

¹¹ Ama o kopadiciamo yaa pia o yonbo, ki daa o leni o ligi, o yonbo yeni wani, baa fidi ki je ma. Ban mali yua o kopadiciamo diegu nni moko baa fidi ki je o kopadiciamo jiema.

¹² O kopadiciamo yaa pia o bisalo ke o kuni yua n ki tie Alono buolu yua, o kan je ban gagidi yaa padijiema o Diedo po yeni.

¹³ Ama o kopadiciamo bisalo yeni calo yaa kpe, bi bi yaa ñani o ke o naa pia bila, ke o kpeni o baa deni nani wan den ñani maama yeni, o baa fidi ki je o baa jiema. Ama yua n ki tie Alono buolu kuli kan je ma.

¹⁴ O nilo yaa dini yaa padijiema n gagidi ki naa faami, o baa guani ki teni o kopadiciamo mi jiema yeni yaa dunga, ki go maani mi dunga yeni po, bonlimuu kuli siiga bonyenla.

¹⁵ Bi kopadicianba n da joagini Isidayeli yaaba n cua ki teni yaa jegagidikaama o Diedo po.

¹⁶ Bi yaa dini ma ke laa bi pundi ban je ma, bi baa tuni Isidayeli yaaba yaa tagili n pundi ban mia sugili. N tie Li Miali Diedo yua n gagidi ki ŋanbidi ba.»

d. Yaa bali maama n ye ti padiyandi gandima po

¹⁷ O Diedo den maadi leni Musa, ki yedi:

¹⁸ «Yedi Alono leni o bijaba kuli mine: Yaa nilo n tie Isidayeli buolu yua, bi yaa caano n kaa yi siiga, yaa bua ki cua ki padi li padijuukaali o Diedo po, o baa cuani yaa yanga n tie bontonga, ki naa pia poadi, lan tie nianli padijuukaali, bi lan tie yanbuama paabu.

¹⁹ O yaa bua min fidi ki gaa o paabu, o baa taa i ne, i pe bi i ŋuabi siiga yaa bontonga n ki pia poadi, ki cuani.

²⁰ Yin da cua ki padi yaa yanga n pia poadi, kelima o Diedo kan gaa yi po.

²¹ Li go baa yaa tie yene, o nilo yaa cua ki padi o Diedo po taanyenma padili, li yaa tie yaa yanga n ñani ti yanciandi nni bi ti yanbidi nni. Li yaa tie ke o cuani li nianli po, bi yanbuama po, o padiyanga yeni baa yaa tie yaaga n ki pia poadoba kuli. Yi yaa bua o Diedo n gaa yi paabu, se ki yanga yeni n da pia poadi kuli.

²² Yi kan cua ki pa yanjuanga, bi yaaga yaa taali n kua, bi moayandi n toadi toadi yaa yanga. Yin da cuani yaa yanga n pia kpagili, bi mu calimu bi li sinali. Yin da cuani laa yanbuolu ki padi li padibinbinli po, ki juu o Diedo po.

²³ A baa fidi ki cuani nua bi pia ke o taayenli foagi bi ke li koabi, li yaa tie yanbuama bi tuondi paabu po. Ama li kan tuo ŋan cuani laa yanga buolu li nianli po.

²⁴ Yin da cua ki padi o Diedo po yaa yanga yaa koncanbila n fadi, bi ban jaa yaaga, yin da padi laa padili buolu yi diema nni.

²⁵ Yi kan gaa laa yandi buolu bi canba kani ki cua ki padi yaa pada n tie yi Tienu jiema yeni. Li tie yaa yandi n biidi ki pia poadi, yi yaa tieni yeni, o Diedo kan gaa yi po.»

²⁶ O Diedo go den maadi leni Musa ki yedi:

²⁷ «Nua, pia bi ŋuabo yaa mali o biga, ki biga yeni baa ye leni o naa danalele. Li yaa pundi dananii ki yaa ji caa, li baa tuo ban taa ka ki padi o Diedo po li padijuukaali.

²⁸ Lan tie nua bi pia, yin da kodi wani leni o biga kuli dayenli.

²⁹ Yi yaa cua ki puni o Diedo i tuondi paabu, yi baa tieni nani lan pundi maama, ke o Diedo n gaa yi po.

³⁰ Yi baa ŋmani ki padiyanga, yin padi ka yaa daali yeni. Yin da teni liba n sieni hali ku tiŋaagu. N tie Li Miali Diedo.

³¹ Yi baa kubi n bali maama kuli, ki go yaa tiendi likuli. N tie Li Miali Diedo.

³² Yin da cagini n yeli yaali n gagidi. Li pundi ke Isidayeli yaaba kuli n fangi n gagidiŋanma. N tie Li Miali Diedo yua n gagidi ki ŋanbidi yi.

³³ N den teni ke yi ñani Ejipiti diema nni, ki bua ki tua yi Tienu. N tie Li Miali Diedo.»