Levi 15 - U TIENU MAAMA TILI 2013

Joa leni pua siiga joagindi bali maama

¹ O Diedo den maadi Musa leni Alono ki yedi:

² «Yedi mani Isidayeli yaaba: O fado n cuo yaa nilo kuli, o joagini kelima li yaa po.

³ Li tie o fado yeni n joagini o. Laa biidi yaa ña, bi ti yàá ña, o joagini.

⁴ Wan duani yaa duanu po kuli joagini, ba wan kali yaa bonkalikaala po mo joagini.

⁵ Yaa nilo n sii o nilo yeni duanu, baa ŋuudi o tiadi ki go wali ki yaa ye leni o joagindi hali ku yenjuagu.

⁶ Yaa nilo n kali o nilo yeni n bi kali yaa bonkalikaala po kuli mo, baa ŋuudi o tiadi ki wali ki yaa ye leni o joagindi hali ku yenjuagu.

⁷ Yua n sii o nilo yeni gbanu baa ŋuudi o tiadi ki yaa ye leni o joagindi hali ku yenjuagu.

⁸ O nilo yeni yaa sii ke o ñinsandi baa yua n ki joagini po, laa nilo baa ŋuudi o tiadi ki wali ki yaa ye leni o joagini hali ku yenjuagu.

⁹ O nilo yeni yaa jagini yaa gaali kuli po mo baa yaa joagini.

¹⁰ Yua n sii o nilo yeni n kali yaala po baa ye leni o joagindi hali ku yenjuagu. Yua n taa o nilo yeni n kali yaali yaa po baa ŋuudi o tiadi, ki wali, ki yaa ye leni o joagindi hali ku yenjuagu.

¹¹ O nilo yeni yaa sii yuakuli leni o nii, ki sua ke o naa bi kpa nidi bonŋanla, wan sii yua yeni baa ŋuudi o tiadi, ki wali, ki yaa ye leni o joagindi hali ku yenjuagu.

¹² Yaa nilo n pia o fado yeni yaa sii yaa tiagu n tie tandi kuli, se ban mudi ku. Ku tiagu yeni yaa tie daadi tiagu, bi baa ŋuudi ku bonŋanla.

¹³ O nilo yeni fado yaa gbeni, ke o bua ki ŋanbi o baa, o baa bili danalele o ŋanbima po. O baa wali ki go ŋuudi o tiadi mi ñinpuubikaama nni. Lani, o baa ŋanbi.

¹⁴ Li daniili, o baa taa kpaajefanmulie bi kpaajenawuundilie ki gedi o Diedo nintuali, ki teni o kopadiciamo u Kadikaanu Gbandieli kani.

¹⁵ O kopadiciamo baa padi mu, yenga n tua ti tuonbiadi sugili miabu padili, ki liega mo n tua padijuukaali. Yeni, o kopadiciamo baa mia o nilo yeni po sugili o fado po, o Diedo nintuali.

¹⁶ O joa yaa joagini o tiadi, o baa wali ki yaa ye leni o joagindi hali ku yenjuagu.

¹⁷ Lan baa yaa tiadi po, bi yaa gbangu po, o baa ŋuudi ti, ki yaa ye leni o joagindi hali ku yenjuagu.

¹⁸ O joa yaa duani leni pua, bikuli baa wali ki yaa ye leni bi joagindi hali ku yenjuagu.

¹⁹ O pua yaa laa o ŋmaalo, o baa yaa ye leni o joagindi hali danalele. Yua n sii o kuli, baa yaa ye leni o joagindi hali ku yenjuagu.

²⁰ Wan dua yaa duanu o ŋmaalo dana nni yeni leni wan kali yaa bonkalikaala po kuli mo baa yaa joagini.

²¹ Yua n sii u duanu yeni baa ŋuudi o tiadi, ki wali ki yaa ye leni o joagindi hali ku yenjuagu.

²² Yua n sii o pua yeni n kali yaa bonkalikaala po, baa ŋuudi o tiadi, ki wali, ki yaa ye leni o joagindi hali ku yenjuagu.

²³ Bonliba yaa bili u duanu po, bi wan kali yaali po kuli, yua n sii laa bonla baa yaa ye leni o joagindi hali ku yenjuagu.

²⁴ O joa yaa duani leni pua o ŋmaalo yeni dana siiga, o pua yeni joagindi baa ŋoadi o hali danalele. Wan baa yaa dua yaa duanu po mo kuli baa yaa joagini.

²⁵ Yaa pua yaa soama n ña dana boncianla ke laa tie o ŋmaalo dana, yaa ka o soañakaama yeni yaa pendi o ŋmaalo dana, o baa yaa ye leni o joagindi hali laa dana, lan tie yeni yaa banlu po kuli, nani o ŋmaalo dana po, lan den tie maama.

²⁶ Wan dua yaa duanu o soañakaama dana yeni niinni, go baa joagini nani o ŋmaalo dana yaa duanu n joagini maama yeni. Wan kali yaa bonkalikaala po mo baa joagini nani o ŋmaalo dana yaa bonkalikaala n joagini maama yeni.

²⁷ Yua n sii laa bonla kuli baa joagini o baa, ki ŋuudi o tiadi, ki wali, ki yaa ye leni o joagindi hali ku yenjuagu.

²⁸ O pua yeni soañakaama yaa gbeni, o baa coadi danalele, lani yaa pendi, o baa ŋanbi.

²⁹ Li daniili, o baa taa kpaajefanmulie bi kpaajenawuundilie, ki cua ki teni o kopadiciamo u Kadikaanu Gbandieli buliñoabu kani.

³⁰ O kopadiciamo baa padi yendo ti tuonbiadi sugili miabu padili po, o lielo mo li padijuukaali po. Yeni, o kopadiciamo baa mia o po sugili o Diedo nintuali, kelima yaa soañakaama n den joagini o yeni po.

³¹ Yi baa waani Isidayeli yaaba, ke bi yaa joagini, ban foagidi n kani, yeni bi kan kpe, kelima bi joagindi po. Li bua yedi, ke bi joagini n yekaanu yuu n ye bi siiga yeni.»

³² Lani n tie yaa bali maama n ye o fado n cuo yaaba, yaa jaba n biidi bi tiadi ki joagini bi baa,

³³ yaa pua n laa o ŋmaalo, yaa pua n pia mi soañakaama, yaa joa n joagini leni yaa pua n ye o ŋmaalo dana nni po.