Levi 12 - U TIENU MAAMA TILI 2013

O pua yaa mali wan baa ŋanbi o baa maama

¹ O Diedo den maadi leni Musa, ki yedi:

² «Waani Isidayeli yaaba yaa maama n tie ne: O pua yaa punbi ki mali bonjaga, o baa yaa ye leni o joagindi hali danalele, nani wan den ye o ŋmaalo nni ke li tie maama. O baa yaa ye leni o joagindi hali laa dana banlu.

³ Li daniili, bi baa kuani ki biga ku ciagu.

⁴ O pua yeni go baa guudi piitaa n danataa o ŋanbima po. O kan kua u kaangagidiŋamu nni hali o ŋanbima dana yeni yaa pendi.

⁵ O yaa mali bonpuoga, o baa yaa ye leni o joagindi hali piiga n dananaa, nani wan den ye o ŋmaalo nni ke li tie maama. O go baa guudi piiluoba n danaluoba o ŋanbima po.

⁶ Li yaa tie bonjaga bi bonpuoga yaa madi po, ke o ŋanbima dana pundi, o baa taa yaa pebiga n pia binyenli li padijuukaali po, ki go taa ku kpaajenawuungu bi ki kpaajiefanga ti tuonbiadi sugili miabu padili po, ki cua ki teni o kopadiciamo u Kadikaanu Gbandieli kani.

⁷ O kopadiciamo baa gaa ki padi ba o Diedo nintuali. O baa mia o po o tuonbiadi sugili, yeni o baa ŋanbi. Lani n tie yaa bali maama n bili yua n mali bonjaga bi bonpuoga po.

⁸ O pua yeni yaa kan fidi ki baa ki pebiga, o baa taa kpaajefanmulie bi kpaajenawuundilie ki cuani. Yendo baa tua li padijuukaali, o lielo mo baa tua ti tuonbiadi sugili miabu, lani, o baa ŋanbi.»