Jude 1 - U TIENU MAAMA TILI 2013

I fuondi

¹ Mini Juda, yua n tie Jesu Kilisiti naacemo ki go tie Jaki waalo, n diani li tili yi po, yinba, U Tienu yua n tie Baa n yini yaaba ki bua ba, ki kubi ba Jesu Kilisiti po.

² Mi ninñingbadima, mi yanduanma leni mi buama n yaa pugidi yi po hali boncianla.

Bi bangi-faadanba

³ N buakaaba, n den bua hali boncianla ki diani yi po yaala n tie tikuli n taani ki pia yaa tindima po. Ama n den sua ke li tie n po tiladi min diani ki tundi yi, ke yin koani li dandanli koanli, U Tienu n den teni o nigagidiŋanba yaali, yenma u yogunu kuli po.

⁴ Bi nitianba wuoni ki kua yi siiga. I Diani den maadi laa niba buudi cuonu hali yogu. Bi tie U Tienu yiekaaba, yaaba n lebidi ti Tienu ŋanbili, ke lin tua mi conconma bonla. Bi go yie Jesu Kilisiti, wani yua bebe n tie ti Canbaa leni ti Diedo.

⁵ Ba ke yi bani yaala n tie ne kuli bonŋanla, n bua ki go tiadi yi ke o Diedo den faabi o niba Isidayeli yaaba, ki ñani ba Ejipiti nni. Ama o den yuandi ki bolini bi siiga yaaba n naa den dugi o po kuli.

⁶ Yaa malekinba n naa den kubi ban pia yaa bali, ki ŋaa bi yekaanu, U Tienu kpaa ba yaa kpaadi n baa yaa ye hali yaa yogunu kuli, ki kubi ba li biigili nni, hali ti buudi dacianli n cua.

⁷ O go den tieni yene, Sodomi, Gomori leni li dobila yaaba po. Bani yaaba n den tieni nani laa malekinba yeni, ki puni bi yula mi conconma leni ti cagindi buoli kuli po. Ba moala bi laadi yaa mu n kan gbindi buudi fala, ki tie bi niba kuli po nannanli, ki tuodi ki tundi ba.

⁸ Ama ba yeni, laa niba moko tiendi yene bi gaadima nni, ki cagini bi yula, ki fali U Tienu bali, ki sugidi malekinba yaaba n pia ti kpiagidi.

⁹ Lanwani, ba malekinba yudaano Miseli n den nia leni Sutaani Musa gbanandi po yaa yogunu, waa den tuo ki buni o buudi leni sugidi. Ama o den yedi o: «O Diedo n cuo ŋa.»

¹⁰ Ama laa niba sugidi ban kaa bani yaala. Ba ban bani yaala mo, bi ŋua la nani ti yandi yeni, ke li caani ba mi bodima po.

¹¹ Fala n baa bi po, kelima bi ŋoadi Kayini n den ŋua yaa sanu. Bi go luni bi yula Balaam yaadima nni, kelima bi bua ki baa i panpaani. Bi fiini mi janjanma, ki bodi nani Kore yeni.

¹² Laa niba n go joagini yin taani leni yi kpiiba, ki di yaa jiema. Lankane bi yen di ki go ñu ke li pendi, kaa jie fe, ki nua bi yaa yula bebe. Bi tie nani u faalu n tudi yaa tawala n ki pia ñima yeni. Bi go tie nani li fali tiidi, yii n ki loni ba i yogunu, ama ki kpe ki kuodi cain, ke bi ŋabi yi yeni.

¹³ Bi doagidi bi tuona ya n pia i fe, nani mi ñincianma ñinguona n lengidi ki lu ti ñinpunpudi li boanjaali po maama yeni. Bi go tie nani yaa ŋmabila n yaadi yeni. U Tienu bili bi po ke bi kaanu baa yaa ye li biigicianli nni, hali yaa yogunu kuli.

¹⁴ Li go tie bani yaa po yo, ke Enoki yua n den ŋua Adama, ki tie mi nifiileleedima yua, den pua saawali ki yedi: «Diidi ki le, o Diedo kpendi leni o nigagidiŋanba tuda tuda bam.

¹⁵ O baa jia bi niba kuli buudi, ki cuo yaaba n yie o kuli, kelima ban yie o ki tieni yaala yaa po. O go cuo ti tuonbiadi danba yaaba n yie o yeni, kelima ban sugidi o yaa sugidi po kuli.»

¹⁶ Laa niba tie yaaba n yenbidi, yaaba yaa pala n biidi bi yema po. Bi ŋua bi gbanandi bonbuakaala, ki maadi mi japaamaama, ki banbidi bi niba ki bua ki baa bi kani li baali.

I tundijuodike

¹⁷ Ama yinba n buakaaba, yin yaa tiani ti Diedo Jesu Kilisiti tondiba n den tuodi ki waani yi yaama.

¹⁸ Bi den tua yi: «Mi juodima yogunu li ñuali danba baa yaa ye, yaaba n ŋua bi gbanandi bonbuakaala, ki yie U Tienu.»

¹⁹ Laa niba tie yaaba n tiendi yi siiga nni mi paadima, ki ŋua bi gbanandi bonbuaka-biadila, kaa pia U Tienu Fuoma Yua.

²⁰ Ama yinba n buakaaba, yin yaa suagi liiga yi dandanli yaali n gagidi ki ŋani boncianla nni, ki yaa jaandi leni U Tienu Fuoma Yua yaa paalu.

²¹ Yin yaa kubi yi yula U Tienu buama nni, ki guu ti Diedo Jesu Kilisiti n pa yi yaa miali n kan gbeni, kelima o ninñingbadima po.

²² Yin yaa gba mi ninñima bi nitianba yaaba yaa yama n bangi po.

²³ Yin faabi ba ki faabi ba leni u mu. Yin yaa gba nitoaba po yaa ninñima n kali leni i jeje, ki nan yaa nani ba bi tiayiekaadi, ban den joagini yaadi leni bi gbanandi bonbuakaala.

Ti pagidi U Tienu po

²⁴ U Tienu yua n baa fidi ki kubi yi, ke yin da tuudi ki baa, ki go sieni yi o kpiagidi kani li pamancianli nni, ke yi naa pia ban baa fidi ki kuli yi leni yaala, n baa ti pagidi.

²⁵ Wani U Tienu bebe yua n tie ti Candaano, kelima Jesu Kilisiti ti Diedo po, n yaa baadi ti kpiagidi, ti jigidi, u paalu leni li bali, yaa yogunu n pendi, moala leni yaa yogunu kuli! Amina!