Josue 9 - U TIENU MAAMA TILI 2013

Gabaon yaaba boandi Isidayeli yaaba

¹ Yaa diema n ye Jurden nintuali, lani n tie yaa diema n ye a juana nni, yaama n ye ku joaloangu nni leni yaama n baali mi ñincianma, ki tandi ki gedi hali Liban diema yaa badiba kuli den gbadi Ayi dogu bolinma laabaalo. Lanwani, bani Hititi yaaba, Amori, Kanana, Perisiti, Hiviti leni Jebusi yaaba yaa badiba yeni

² kuli den taani ki tuu ñoabu, ki bua ki tuogi Josue leni Isidayeli yaaba bu toabu.

³ Gabaon dogu yaaba moko den gbadi Josue n den soani Jeriko leni Ayi yaa tuona.

⁴ Bi den tieni u fanu, ki bogini mi sancenjiema, ki tuni bi ŋunbi a kpalipacala leni yaa dayuadi n cadi ke bi guani ki hali hali.

⁵ Bi den pili ban kpaa pia yaa cacaakpela, ki lani a kpacala. Bi dupen den kuodi, ke li gunbili kua o.

⁶ Bi den gedi Josue kani, ke o ye Giligali po li nagili nni, ki yedi wani leni Isidayeli yaaba: «Ti ñani hali yaa diema n foagi. Ti mia yi ke yin kuani o ŋantaado leni ti.»

⁷ Isidayeli yaaba den guani ki yedi ba: «Li fidi ke yi ye yaa kaanu n ki foagi leni ti. Ti baa gaa lede ki kuani o ŋantaado leni yi?»

⁸ Bi den guani ki yedi Josue: «Ti tie a naacenba.» O den yedi ba: «Yi tie ŋmenbe? Yi ñani le?»

⁹ Bi den guani ki yedi o: «Tinba a naacenba ñani hali yaa diema n foagi boncianla ki cua, kelima ti gbadi ke bi maadi Li Miali Diedo, a Tienu maama. Ti gbadi wan den tieni Ejipiti nni yaala kuli

¹⁰ leni wan den soani Amori yaaba badiliediba yaaba n ye Jurden puoli maama, lani n tie Hesibon bado Sihoni leni Basan yaa bado Ogi yua n den ye Asitaroti.

¹¹ Lanwani, ti nikpela leni ti diema yaaba kuli den yedi ke tin bogini mi jiema li sancenli po, ki fii ki cua ki tuogi yi, ki tua yi naacenba, ki mia yin loli leni ti o ŋantaado.

¹² Diidi mani ki le ti dupen. Tin den taa o ki ñani ti diema nni ki kpendi ne, o da den li tuone. Moala o kuodi ki yodi yodi.

¹³ Yaa dayuadi n tie ne, ti den gbieni ti ke ti tie bonpandi, yi laa tin padi padi maama. Ti tiadi leni ti cacaadi kuli cadi, kelima tin cuoni yaa bancianli po.»

¹⁴ Isidayeli yaaba den tuo ki gaa Gabaon yaaba yeni sancenjiema, ki naa mia o Diedo wan doagidi bi po ban baa tieni maama.

¹⁵ Josue den dagini leni ba, ki kuani o ŋantaado leni ba, ki yedi ke o kan kpa ba. Isidayeli yaaba yudanba den poli ke li baa yaa tie yene.

¹⁶ Ban den loli laa ŋantaado ke danataa pendi, Isidayeli yaaba den bandi ke bi tie bi kuantalieba, ki ye bi siiga.

¹⁷ Isidayeli yaaba den cuoni ki pundi bi dogi li dataali daali. Bi dogi den tie Gabaon, Kefira, Beeroti leni Kiriyati-Yearim.

¹⁸ Baa den kpa ba, kelima bani Isidayeli yaaba yudanba den taa o Diedo bi Tienu yeli, ki poli ke bi kan kpa ba. Ama Isidayeli yaaba kuli den yenbidi yenbidi bi yudanba po.

¹⁹ Bi yudanba den yedi ba: «Ti kan fidi ki sii ba, kelima ti den taa o Diedo, Isidayeli Tienu yeli, ki poli.

²⁰ Ti kan kpa ba, ke U Tienu pali n da fii ti po, kelima tin den poli yaa poli po. Ama, diidi tin baa tieni ba maama:

²¹ Tin cedi mani ban yaa ye, ama bi baa yaa pe ti po ti daadi, ki go yaa yii ti po mi ñima.»

²² Josue den yini Gabaon yaaba yeni, ki yedi ba: «Be n teni ke yi boandi ti, ki yedi ke yi ñani hali foagima, ja yi nan ye ti siiga?

²³ Moala yi ye leni ti solindi, yi kan ña ti yonbidi nni, yi baa yaa kpaagi ti daadi, ki yii mi ñima n Tienu diegu po.»

²⁴ Bi den guani ki yedi Josue: «Yaala n teni ke tinba a naacenba tieni laa bonla tie ke ti den gbadi ke o Diedo a Tienu den teni o naacemo Musa li ñoamabonli, ke wan pa yi mi naa diema kuli yin diedi ma, ki go bolini mi niba kuli ban da ye yi siiga. Lane ke yi cuama teni ke ti jie hali boncianla ti miana po.

²⁵ Moala ti ye a nuu nni, tieni ti nani ŋan sua ke li pundi maama.»

²⁶ Josue den tieni bi po nanda: o den gaa ba Isidayeli yaaba nuu nni, ke baa kpa ba.

²⁷ Ama hali landaali, o den bili ke bi baa yaa kpaagi ti daadi, ki yii mi ñima li nitaanli po leni o Diedo padibinbinli po, wani U Tienu n baa gandi naani. Bi tiendi yeni hali dinla.