Josue 19 - U TIENU MAAMA TILI 2013

Simeon buolu biinu

¹ Ban den toani tiatia, Simeon buolu yaaba n den gaa u biinlielu. Bi diema den ye Juda buolu yaa diema siiga.

² Yaa dogi n den ye bi diema nni den tie Beri-Seba, Seba, Molada,

³ Hasari-Suali, Bala, Esem,

⁴ Elitoladi, Betuli, Horima,

⁵ Tisikilagi, Beti-Malikaboti, Hatisadi-Susa,

⁶ Beti-Lebaoti leni Saruheni. Likuli den tie piiga n dogitaa leni li dobila.

⁷ Li go den pia Ayini, Rimon, Eteri leni Asani, doginaa leni li dobila,

⁸ ki taani leni yaa dobila n ye laa gaanma, ki yaa caa hali Baalati-Beri dogu yuu n go tie nuganu yaa Ramati. Lani n den tie Simeon buolu yaaba biinu.

⁹ Bi den ñani Juda buolu yaaba diema nne Simeon buolu yaa biinu, kelima Juda buolu n den baa yaa diema den yabi ki kandi bi po. Lani yaa po yo, ke Simeon buolu diema den ye bani Juda buolu yaa yaama siiga.

Sabuloni buolu biinu

¹⁰ Ban den toani tiatia, Sabuloni buolu n den gaa u biintaalu. Bi diema den tandi ganu po, ki ban pundi hali Saridi dogu.

¹¹ U bianu den ñani lankani, ki teli nintuali po ki ban pundi Marala dogu, ki pendi ki ñani Dabeseti dogu, ki ban dagini yaa kpenu n puubi Yokineami dogu puoli.

¹² U den ñani Saridi, ki gondi ki teli puoli, ki ban pundi hali Kisiloti-Tabori dogu bianu. U den tagini ki ñani Dabirati dogu, ki ban gedi hali Yafia dogu.

¹³ U den suagi ki go teli puoli, ki ban ñani Ita-Katisini, ki gedi Gita-Hefedi. U den ban dagini Rimon dogu, ki pegidi ki cubini Neya dogu.

¹⁴ Nujienu po, u bianu den ligini Hanaton dogu, ki ban tuoni Ifita-Eli joaloangu.

¹⁵ Mi diema yeni den pia piiga n dogilie leni li dobila. Yaa dogi n tie ne den tie laa dogi siiga i tiami: Katati, Nahalali, Simironi, Idala leni Betelemi.

¹⁶ Lani n tie ban den toani tiatia ke Sabuloni buolu yaaba baa yaa diema.

Isakari buolu biinu

¹⁷ Ban den toani tiatia, Isakari buolu n den baa u biinnaalu.

¹⁸ Yaa dogi n den ye bi diema nni den tie Yisireyeli, Kesuloti, Sunem,

¹⁹ Hafarayim, Siyon, Anaharati,

²⁰ Rabiti, Kisiyon, Ebetisi,

²¹ Remeti, Eni-Ganim, Eni-Hada leni Beti-Patisetisi.

²² U bianu den tagini ki ñani Tabori, Sasatisima, Beti-Semesi, ki ban juodi Jurden kani. Bi diema den pia piiga n dogiluoba leni li dobila.

²³ Lani n tie ban den toani tiatia ke Isakari buolu yaaba baa yaa diema.

Aseri buolu biinu

²⁴ Ban den toani tiatia, Aseri buolu n den baa u biinmuulu.

²⁵ Yaa dogi n den ye bi diema nni den tie Helikati, Hali, Beteni, Akesafi,

²⁶ Alameleki, Ameyadi leni Miseali. Nintuali po, u bianu den ŋoadi Siholi-Libinati kpenu, ki gedi ki ban tuoni Karimeli juali.

²⁷ Puoli po, u den teli Beti-Dagon dogu, ki ban pundi Sabuloni buolu diema leni Yifita-Eli joaloangu nni. U den pegidi ki teli nujienu po, ki ban tuoni Beti-Emeki leni Neyieli. U den ŋoadi yeni, ki ban cua ki ñani yaa dogi n tie ne: Kabuli,

²⁸ Hebiron, Rehobi, Hanmoni leni Kana, ki ban dagini Sidon u dociamu.

²⁹ Lankani u bianu den gondi ki teli Rama dogu leni ban maa i bilinciami ki lindi Tiiri dogu yuu. U den suagi ki teli Hosa dogu, ki cua ki ñani Mahalabi, Akisibi,

³⁰ Ako, Afeki leni Rehobi, ki ban juodi Mediterane mi ñincianma kani. Mi diema dogi kuli den taani ki tie piilie n dogilie leni li dobila.

³¹ Lani n tie ban den toani tiatia ke Aseri buolu yaaba baa yaa diema.

Nefitali buolu biinu

³² Ban den toani tiatia, Nefitali buolu n den baa u biinluobilu.

³³ Nuganu po, bi diema bianu den cili Helefi dogu leni Tisaananim dogu ticianbu seni kani, ki cua ki ñani Adama-Nekebi leni Yabineeli, ki gedi Lakum dogu, ki ban dagini Jurden.

³⁴ Nintuali po, u bianu den pegidi ki teli Asinoti-Tabori, ki cua ki pendi u dogu yeni, ki gedi Hukoki dogu. Ganu po, u den balini Sabuloni buolu diema, nintuali po mo, u den balini Aseri buolu diema. Puoli po, Jurden kpenu n den tie u bianu.

³⁵ Yaa dogi n den pia i bilinciami ke i maa ki lindi den tie: Tisidimi, Tiseli, Hamati, Rakadi, Kinereti,

³⁶ Adama, Rama, Hatisori,

³⁷ Kadesi, Edreyi, Eni-Hatisori,

³⁸ Jileyoni, Migidali-Eli, Holemi, Beti-Anati leni Beti-Semesi. Likuli den tie piiga n dogiyia leni li dobila.

³⁹ Lani n tie ban den toani tiatia ke Nefitali buolu yaaba baa yaa diema.

Dan buolu biinu

⁴⁰ Ban den toani tiatia, Dan buolu n den baa u biinleleelu.

⁴¹ Yaa dogi n den ye bi diema nni den tie Tisoreya, Esitaoli, Idi-Semesi,

⁴² Saalabini, Ayaloni, Yitila,

⁴³ Elon, Timina, Ekiron,

⁴⁴ Eliteke, Gibetoni, Baalati,

⁴⁵ Yehudi, Bene-Bedaki, Gati-Rimoni,

⁴⁶ Me-Jarkoni, Rakon leni yaa tinga n lindi Jafa dogu.

⁴⁷ Dan buolu diema den ŋmadi ba, ke bi gedi ki ban baa Lesemi dogu, ki paadi u. Bi den kpa u niba, ki diedi u cain ki kali lankani. Bi den taa bi yaaja Dan yeli, ki yini u dogu yeni Dan.

⁴⁸ Lani n tie ban den toani tiatia ke Dan buolu yaaba baa yaa diema.

Bi teni Josue Timinati-Selaki dogu

⁴⁹ Isidayeli yaaba n den boagidi mi diema ki gbeni, bi den teni Nun bijua Josue u biinu bi diema nni.

⁵⁰ Bi den ŋoadi o Diedo ñoamabonli, ki teni Josue wan mia yaa dogu, lani n tie Timinati-Selaki dogu, yuu n ye Efrayimi juana nni. Josue den guani ki maa u, ki kali lankani.

⁵¹ Lani n tie o kopadiciamo Eleasari, Nun bijua Josue leni Isidayeli yaaba yudanba n den toani tiatia, ki boagidi boagidi yaa biini. Bi den kali Silo dogu nni, o Diedo nintuali, u Kadikaanu Gbandieli buliñoabu kani, ki boagidi mi diema. Lani n tie ban den boagidi mi diema ki gbeni maama.