Josue 16 - U TIENU MAAMA TILI 2013

Efrayimi leni Manase buoli tinbiini

¹ Ban den toani tiatia ke Josefi buolu yaaba baa yaa diema den cili puoli po, Jurden kpenu kani Jeriko kulima, Jeriko ñinbuna puoli po. U bianu den ñani Jeriko, ki poandi mi fanpienma nni, ki ban kua Beteli juali nni.

² U den ñani lankani, ki gedi Lusi dogu, ki ban tagini ki ñani Ataroti, Ariki yaaba n ye naani.

³ U den ñani lankani, ki jiidi ki teli nintuali, ki goa Yafileti yaaba diema po, ki poandi Beti-Horoni jiidima leni Geseeri dogu, ki ban dagini Mediterane mi ñincianma.

⁴ Josefi puoliŋuani, lani n tie Manase buolu leni Efrayimi buolu yaaba, den boagidi laa diema bi siiga.

Efrayimi buolu yaaba biinu

⁵ Efrayimi buolu n den baa yaa diema bianu den cili puoli po, Atiroti-Adari dogu kani, ki yaa caa hali tanpoli yaa Beti-Horoni,

⁶ ki ban dagini Mediterane mi ñincianma. Nujienu po, u den balini Mikimetati dogu, ki gondi ki teli puoli Taanati-Silo dogu, ki tagini ki ñani Yanoa dogu.

⁷ U bianu yeni den ñani lankani, ki jiidi ki gedi Ataroti leni Naarata, ki ñani Jeriko, ki ban dagini Jurden kpenu.

⁸ U den ñani Tapuwa, ki teli nintuali Kana kpenu po, ki gedi ki dagini Mediterane mi ñincianma kani. Lani n tie Efrayimi buolu n den baa yaa diema.

⁹ Bi go den pugini ba yaa dociami leni yaa dobila n kuu kuu ba, ki ye Manase buolu diema nni.

¹⁰ Efrayimi buolu ki den deli Kanana yaaba, yaaba n den ye Geseeri dogu nni. Bi baa ki ye likani Efrayimi buolu yaaba siiga hali dinla. Ama Efrayimi yaaba den teni ke bi tuuni a tuona leni u paalu.