Josue 14 - U TIENU MAAMA TILI 2013

Josue n boagidi Kanana diema maama

¹ Diidi o kopadiciamo Eleasari, Nun bijua Josue leni Isidayeli buoli yudanba n den boagidi Isidayeli yaaba yaa tinmu, Kanana diema nni.

² Bi den toani tiatia, ki boagidi ki teni teni yaa buoyiadi leni yaa buolu boagidima n sieni bi yaa tinmu, nani o Diedo n den puogi Musa maama.

³ Musa den boagidi ki teni i buoliedi leni buolu boagidima bi yaa biinu Jurden duoli po. Ama waa den teni Levi buolu yaaba wani biinu yaa buoli n sieni siiga.

⁴ Josefi yaabila den boagidi ki tie buolilie, lani n tie Manase leni Efrayimi. Levi buolu yaaba wani ki den baa tinga mi diema nni. Ban den baa yaala bebe n tie, ban baa yaa ye yaa dogi nni leni yaa tinmu n lindi laa dogi, bi yandi leni bi piama po.

⁵ Isidayeli yaaba den boagidi mi diema, ki ŋoadi o Diedo n den waani Musa maama.

Josue teni Kalebi Hebiron diema

⁶ Ban den ye Giligali, dayenli Juda buolu yaaba den nagini Josue kani. Yefune bijua Kalebi, Keni buolu yua den yedi wani Josue: «A bani o Diedo n den yedi U Tienu nilo Musa yaala mini leni fini po, tin den ye Kadesi-Balineya yaa yogunu?

⁷ O Diedo naacemo Musa n den soani nni, ke n ñani Kadesi-Balineya ki ban goandi mi diema, li den sua ke n pia bina piinaa. Min den guani, n den togidi o tin ban laa yaala, ke li tiegi cain.

⁸ Yaaba n den yegi leni nni ki gedi den maadi ki wudi bi niba gbani. Ama mini, n den dugi o Diedo n Tienu po cain.

⁹ Landaali Musa den poli ki yedi: ‹Ŋan tagini ki goandi yaa fuuli yeni, baa tua fini leni a puoliŋuani yaa biinu hali yaa yogunu kuli, kelima a dugi o Diedo n Tienu po.›

¹⁰ Dinla n tie piinaa n binamuu leni o Diedo n teni Musa laa ñoamabonli, Isidayeli yaaba n den cuoni mi fanpienma nni yaa yogunu. Hali lanyogunu, ki taa ki pundi dinla U Tienu teni ke n baa ki fo nani wan den niani maama. Moala, n ji pia piinii n binamuu.

¹¹ N baa ki pa nani min den pa maama, Musa n den soani nni min ban goandi mi diema yaa yogunu. N baa ki pia u fidu nani lanyogunu yene, ki baa fidi ki tieni bu toabu bi lan tie yaa tuonli kuli.

¹² Lanwani, moala ŋan teni nni o Diedo n den niani li yogunu ke o baa pa nni yaa juali yeni. A den gbadi ke Anaki buolu yaaba ye lienni, ke yaa dociami ke i bilinciami maa ki lindi mo ye lienni. O Diedo yaa ye leni nni, n baa deli ba nani wani o ba n den yedi maama.»

¹³ Josue den gaali Yefune bijua Kalebi, ki teni o Hebiron dogu ke u tua o biinu.

¹⁴ Li tie yeni ke hali dinla, Yefune bijua Kalebi, Keni buolu yua yaabila baa ki die Hebiron, kelima o den dugi o Diedo Isidayeli Tienu po cain.

¹⁵ Hebiron den kpa yi Kiriyati-Arba, lani n tie Arba dogu. Arba den tie Anaki buolu yaaba siiga, yaa joa yaa yeli n ñani ki cie. Lani, bu toabu den gbeni mi diema nni, ke yuakuli fuodi.